8. ANGUIANO. BICO DE CUEVAS

En primeras besitan lo bico de Cuevas, un de ros tres bicos d´Anguiano chunto á Mediavilla y Eras. Como diz a mazada: “3 bicos, 3 puens, 3 tipos de chens”.

Cuevas ye á bels zentenals de metros d´Anguiano-Mediavilla, d´o que ye deseparau por l´arriu Najerilla y chuñiu por la puen de “Madre de Dios”, d´o sieglo XVIII.

 

01

Mapa de la Rioja. Mapa d´a Rioxa.

Plantificau en a marguin cucha de l´arriu Najerilla, se troba en a partida conoxita como “Barriouso” chunto la ilesia de San Pedro, d´o sieglo XVI. Dend´astí se´n fue enamplando en paralel ta l´arriu. Cuevas ye estau tradizionalmén un bico ganader.

A ros de Cuevas lis izen “Covachines”.

 

02

Iglesia de San Pedro del barrio de Cuevas. Ilesia de San Pedro de ro bico de Cuevas.

As fiastas suyizas de Cuevas son estatas as dos de San Juan: Baltista y Ebanchelista. Ta San Juan d´o 24 de chunio se i fa misa y prosezión por o bico y de tardis chicolatada; y ta San Pedro misa en a ilesia.

Una liyenda diz que “dos hermanos, Juan y Pedro, construían la iglesia del barrio y que, al morir Pedro sin terminar de edificarla, el otro la finalizó en solitario, llamándola San Pedro en recuerdo del difunto.”

A esplicazión más lochica será, posiblemén, que San Pedro ye estau eslixiu por a pesca y San Juan por o culto pagán á ros solstizios.

A primer menzión de Cuevas se troba en un decumén d´o monesterio de Valvanera d´o 1082, en o que aparix como teste d´una escretura de benda una presona d´o bico de “Covas”.

Cuevas estió desinau por Valvanera ta estar l´alox de l´almenistrazión d´o suyo siñorío d´Anguiano. Yera constimeso por ilesia, bibiandas ta monches y sirbians, almadazens, estrabiellas y una guarta. Lo 1660 Valvanera se´n esfizió d´o siñorío, esdebenindo dita ilesia una armita adebotata á Ntra. Sra. de las Nieves.

Enxamás ye estau un poblato sindependién, pero en espleitaba d´autonomía rispetibe á Anguiano en l´almenistrazión común.

Se´n aproxeman ta lo cabalto d´o bico, do ye la ilesia de San Pedro -de ros sieglos XV y XVI, feita en manposatería y sillariellos, de planda retangular y con nau en dos trampos y capitero con cubillar de gualtas de cruzerías estrelatas- y dende ra que alufran una sobrixién ambiesta sopre l´arriu Naxariella.

 

03

Barrio de Cuevas, detrás el río Najerilla. Bico de Cuevas, dezaga l´arriu Naxeriella.

Un poqué más abaxo pillan capazico dende luen con un bizín que ye triballando en un güerto; á ros Zerris lis truca lo suyo chocán azento.

Marchan t´Anguiano, ta lo bico Mediavilla, do ye la Casa la Billa y la ilesia parroquial de San Andrés.

ANGUIANO

Anguiano (con antiga anomenazión ‘Anguidano’, poderba esdebenir de ro griaco, con o sinificato de “puasto agundán en auguas”; unautra teyoría diz qu´esdebenirba d´o bascón, sinificando “pueyo de paxenters amugatos”) ye una billa d´a comunaldá autonoma d´a Rioxa, redoliata por as Peñas de Oro y lo Collado de Cervanco ta l´este y la bersán oriental d´a Sierra de Cameros Nuevo ta lo güeste, de 557 abitadors, á 663 mts. d´altaria y á 45 kms. de Logroño capetal.

 

04

Vista de Anguiano. Ambiesta d´Anguiano.

Á los d´Anguiano lis izen “Zarrios”.

Una tradizión muito suyiza ye la Cabalgata de Rais, dau que los rais bienen de nueis á caballo por o mon, alcompañatos por una catafila de tieders que lis menaban ta lo lucar.

Lo dominche d´antis de l´Aszensión baxan en romería de l´armita la imachen d´a Madalena -chunto con güeito danzaires- dica la ilesia parroquial de San Andrés, do i remane dica las “fiestas de gracias”, o zaguer sabato de setiambre, cuan tornará ta lo santugario.

 

05

Iglesia de San Andrés. Ilesia de San Andrés.

A patrona d´a billa, Santa María Madalena, se i zilebra cada 22 de chulio. As fiastas se´n apolargan una semanata e i fan la sonata “danza de los Zancos”, en a cuala ra mosica de dos donzainas y un tamborino cambeyan o son de ro “Paso de la Santa” por o de ra “Tocata”, y os güeito mozos bestius con trache tradizional con faldas, trucando castañetas y menaus por lur caporal, o Cachiberrio, se´n abientan sopre unas changas de cuasi meyo metro d´altas, chirando como galdrufas por una costera de tantonicos anomenata “Cuesta de los danzadores”, do i son paraus as chens que ban aturando lurs cayitas; difizil, perigloso, pero un espeitaclo unico y polidismo.

06

Danzadores de zancos bajando la cuesta de los danzadores. Danzaires de chancas baxando ra costera de ros danzaires.

Iste ritual se i fa dos begatas diyarias, á ras 2 y á ras 8 d´a tardi, os diyas 22 y 23 de chulio, lo 21 de chulio á ras 8 d´a tardi y o zaguer cabosemana de setiambre á ras 2 y á ras 7  d´a tardi.

Lo 1603 aparix mentata por primer begata la “Danza de Anguiano” en un decumén y ya i diziban que no se perdese ista tradizión. L´antropologo y folclorista Julio Caro Baroja “señala que sus orígenes son ritos paganos a la vez que religiosos, y los relaciona con ceremonias propiciatorias de buenas cosechas y fecundidad de los campos”.

Dimpués d´iste danze, i executan “los Troqueaos”  en os que ros danzaires, ya sin de changas, bailotían á l´estilo “palotiau”, estrucaziando uns cuentr´autros os palitroques d´abillanera. Toz istos danzes se i fan en compaña d´a imachen de ra Madalena.

M. Martín remera que la patrona d´o lucar tergüelano famillar, Pancrudo, tamién ye Santa María Madalena; lo que chuñiu á la proxemedá de ros puntals Pancrudos y l´apertenexenzia meyebal d´ista redolada á Nabarra -que ros suyos naturals entrebinieron dezisibamén en a reconquiesta y repoblanzia d´o Sur d´Aragón- son “casolidaz” que li risultan de ro más socherens…..

 

07

Vista desde Anguiano (1). Ambiesta d´Anguiano

Lo 15 de setiambre se i fa la romería ta Valvanera.

Una d´as fiastas perditas ye San Blas, lo 3 de febrer.  En ixa se´n aplegaban ta misa con unas madexas de cotón ta i fé-las bendezir. Dimpués, toz os pariens se ligaban ta lo cuello ixe cordiel, fendo-li un nugo y rezando-li un Painuestro. En repitiban ixo durán nueu diyas. O zaguero lo se´n quitaban y lo i cremaban.

Unautra fiasta yera la “Semana de la Ascensión”,  mientres la cuala ixiban por as carreras d´o lucar fendo-ie robatibas y en pregando de litanías ta toz os santos ta que i plebese, y en diziban:

Lunes letanía,

Martes letanón,

Miércoles a la ermita,

Jueves la Ascensión”.

 

08

Vista desde Anguiano (2). Ambiesta d´Anguiano

En zagueras b´eba una tradizión anomenata “quemar el rabo de la zorra”,  consistén en fer de nueis unas u fogueras en cualques carreras d´o lugar. Astí cremaban as cañas y os camalez xutos d´as pellas que os labradors eban dixau como simién y que ixe diya yeran estatos rancatos.

Os mozez bailotiaban arredol d´as cheras, i dizindo:

Viva San Roque y el perro”.

En Anguiano charran con o bizín Ángel Romero, siñor asabelo rajante qui lis rezenta bellas cosicas rilazionatas con o lugar, como bels toponimos y motes d´Anguiano:

Toponimos: “Riyuelo, Rioyo (Gómarez), Ventrosa, La Tejera, Congostos, El Bercolar, Peña Portillo, Cueva Mori, Cueva Nuño, Peñareló, Risco, Río Cubo, Roñas, El Monte de Serradero, Pago (“sembraban centeno y patata”), Redonda, Valvanera”.

Motes: “Moscos, Meñes, Bichos, Moruños, Cuadraus, Paulillos”.

 

09

Vista desde Anguiano (3). Ambiesta d´Anguiano

Antis de marchá-ne, mos remite ta lo suyo fillo Mariano ta continar la charradica, pero no mos ne baga de fé-lo.

A primer menzión decumental d´Anguiano ye en o Fuero de Naxera, atorgato por Sancho III lo Mayor de Nabarra lo 1020, con o nome de “Anguidano”.

Lo 1092 aparix ya con o nome aztual en una escretura en a que Alfonso VI de Castiella atorga lo común de paxenters á lo Monesterio de Valvanera.

Lo Siñorío d´Anguiano pasó por diferiens mans en as suyas 300 añadas d´esistenzia. Prenzipió lo 1366, como un dominio más d´a casa Manrique de Lara, que añadas más tardi achuntará tamién lo tetulo de Duque de Naxera.

La luyizión d´Anguiano esdebiendrá lo 1662 por crompa de ros propios bizins.

Dica la creyazión d´a probinzia Logroño lo 1833, Anguiano estió billa reyalenga d´o partiu de Santo Domingo de la Calzada, en a probinzia Burgos.

Se´n promenan por ista antiga billa, nabesando por carreras entantonicadas y costerudas, chunto á casals de fronteras escuteras.

 

10

Casa con escudos en Anguiano. Casal con escutos en Anguiano.

A ilesia parroquial de San Andrés -Molimén Bien d´Intrés Cultural dende 1982- ye feita á pur de sillariello y manposatería y constimesa por tres naus de planda cuadrata, cubillatas con güeltas de cruzería estrelata.

11

Iglesia parroquial de San Andrés de Anguiano. Ilesia parroquial de San Andrés de Anguiano.

Estió costruyita por Juan Pérez de Solarte en 1546. En risalta lo retaulo mayor, feitura barroca  de Diego d´Ichaso de 1672.

Zenan en Lardero con a familla de M. Martín: Marisol, cuñada, Oscar Felipe, sobrín y Raquel, mai de Marisol. (Oscar -o chirmán de M. Martín- ye de biache de triballo). De marabiella, tó i son acomboyes.

 

12

Oscar, hermano de M. Martín, con su mujer Marysol. Oscar, chirmán de M. Martín, con a suya muller Marysol.

13

Raquel, Pilar, madre de M. Martín y Oscar, con Oscar Felipe.

14

Oscar Felipe, sobrino de M. Martín. Oscar Zelipe, sobrín de M. Martín.

15 Os dos chirmans Martín con o fillo y sobrín Oscar Zelipe

Los dos hermanos Martín con el hijo y sobrino Oscar Felipe. Os dos chirmans Martín con o fillo y sobrín Oscar Felipe.

Anuncios