5. AZAGRA

25-VI-2.012. Azagra (toponimo d´orichen arabe “Al Sajra”, sinifica: “la Peña” u promanán de “At-Tagr” prenunziato “Az-Zagr”, con sinificau de: “Marca u Muga”, incluso parixe estar que “Aragón” teneba en as puendas andalusís o nome de “Zagr Alandalús”, igualmén traduzito como muga) ye una billa d´a Comunidad Foral de Navarra, en a merindá d´Estella, en a ribera de l´Alto Ebro, de 3.800 abitadors, a 292 mts. d´altaria y á 77 kms. de Pamplona.

00

Mapa de Navarra. Mapa de Nabarra.

01

Vista del centro de Azagra. Ambiesta d´o cocollo d´Azagra.

Azagra ye plantificata en a marguin cucha d´Ebro y en o pedero d´un tozal chesenco y buralenco conoxito como “la Peña”,  do en abió d´espelungas fuertificatas y un castiello mozleme  esistén dica lo 1874, cuan s´espalderon  os murs  y  escalinata d´a torre.

Azagra ye achirmanata, antimás de Bedmar (Jaén) y Audenge  (Franzia),  con Albarrazín.

02

Azagra hermanada con Albarracín y otros lugares. Azagra chirmanta con Albarrazión y autras localidaz.

As fiastas grans en onor d´a Birchen de l´Ormo se i zilebran de lo 7 ta lo 14 de setiambre. Se i bibe ra fiasta con delera enta la Birchen, con mosica, bebitas, minchars y, más que más, os engayoles d´as bacas.

Lo 15 de mayo, fiasta de San Isidro Labrador, ye o diya de ros labradors, con misa y prosezión d´o santo.

O zaguer sabato de mayo, fiasta de San Isteban , prenzipia con una andata dica l´armita de San Isteban (6 kms.),  dimpués la prosezión y la bendizión de ros cambos. Se i remata con a tradizional troxada de tortiallas con churizo y güegos durs.

Lo 17 de nobiambre, fiasta de San Guergorio,  se i zilebra con misa y prosezión d´o santo y un mercatiello artisanal con taste de produtos d´a tiarra: bin, “pochas”, pimiens, ezetra.

Á los d´Azagra lis izen “Tarras”.

En a muga ya con La Rioxa, bi ye conoxiu iste dito:

“Aragoneses, navarros y riojanos, primos hermanos”.

D´a debanmentada pachina güeb “Toponimia Oficial de Navarra”, en trigan bels toponimos chocans d´Azagra:

“Argadiel, Los Artillos, La Badina, La Calengua (Caluenga en 1895), Cañigosa, El Carrascal, La Filera, Los Forcos, La Glera, La Gleraza, Mañero, Muideras, El Pontigón, El Raso del Barco, La Sarda, El Sobacaz, La Toraza, Barranco de Turumbalas, La Zagosa”.

Á 7 kms. troberon bels repuis romans en o termino d´Argadiel.

A luanga puanda funzional d´o castiello endizcó l´espunte d´una familla de caballers enradigata en a billa,  d´a que prenen lo nome: “los Azagra”. Lope Garcés, en 1091, estió siñor d´Uncastiello e Ruesta, y d´Ayerbe de 1098 ta 1105; y lo suyo fillo, Don Rodrigo, siñor d´Alcanadre lo 1140, estió lo fundador d´o linache “Azagra”.

Lo nieto de Lope Garcés, Pero Ruiz d´Azagra, estió lo nople d´a localidá á qui  os almorabides endoneron lo raino d´Albarrazín en 1170, en pagas d´o refirme nabarro fruen t´Alfonso VIII de Castiella y Alifonso I d´Aragón. Repobló la redolada con colonos nabarros y lo 1172 estatuezió Albarrazín como siede bispal.

Os Azagra renden remarcables perangarias á los rais de Nabarra, Castiella y Aragón. Pietro Ruiz d´Azagra partizipa en a reconquiesta d´o raino de  Balenzia, refusando dimpués que li se dase Fuer apropio, pos lo cunsidaba d´Aragón. Á la suya muert li suzede Ferrando Ruiz d´Azagra, siñor antimás de Daroca, Calatayú y Estella. Lo siñorío d´a casa d´os Azagra en Aragón remata lo 1260.

Lo 1265 lo conchunto esfensibo d´Azagra yera encomendau á Ximeno Pérez d´Azagra.

Lo 1280 ye alcaide Remiro Chil de Lerín.

Lo 1387 Carlos III lo Nople rende l´alcaidiato á Diego Pérez de Mirafuentes, fidalgo de Mués.

En as primeras añadas d´o sieglo XVI lo siñorío apertenex á doña Isabel  de  Foix, bidua de mosén Pierres de Peralta. Por tal d´a conquiesta de Nabarra por Ferrando lo Catolico, una rilazión  d´as fuertalezas d´o Raino de Nabarra  yencluyiba entr´elas “la villa de Açagra con su torre fuerte”, pertenexién á lo marqués de Falzes.

Mientres toda la Edá Muderna estió billa chusmesa á riedo siñorial, exerziu en os empiezes d´o XIX por o marqués de Falzes, qui desinaba l´alcalde á proposas d´o lugar.

Zerrigüeltían ascape por Azagra, plegando ta la ilesia de San Salbador, d´o sieglo XVI, edefizio gotico renaxentista de nau unica, capitero pentagonal y capiellas entre os muraus.

03

Iglesia de San Salvador. Ilesia de San Salvador

Trescruzian por un azoquiello que i zilebran güé, nabesan por l´edefizio d´a nuaba Casa la Billa

04

Ayuntamiento de Azagra. Casa La Billa d´Azagra.

y rematan amanando-sen ta la carrera “Señorío de Albarracín”.

05

Rótulo de una calle de Azagra. Retulo d´una carrera d´Azagra.

Dende Azagra continan enta La Rioxa, aturando en primeras en a localidá de Lardero.

Anuncios