25. CANGUES DE ONÍS. PICOS D’UROPA III (ASTURIES). SOTRES

Cangues d´Onís, (de ro zelta KAMB-I-CA: “comba, corba”, CANNICAM: “caña”, tiarras combatas u en fondata, u en longars; autro parixer li fa promanar de ro latín CANNAN: “bal, clusa, bega” y ONÍS: “tiarra agundosa”) ye un conceyu d´a Comunidá Autonoma de ro Principau d´Asturies. Ha 6.678 abitadors y ye á 87 mts. d´aldaria. Cangues ye plandificata en a compleganza de ros arrius Sella y Güeña, á 72 kms. de ra capetal, Uvieu.

00

Mapa de la zona. — D´a redolada.

Cangues ha manteniu de perén una economía tradizional á pur de bistiars, agricultura y espleit de ra fusta de ras selbas suyas. Os dominches i zilebran os populars mercaus en os porches, chunto lo “Palacio Pintu”, con una ampla ufiarta de fruitas y ortalizia, y autros produtos como sidra, panizo y formaches montañeses.

Lo 13 de chunio zilebran a fiasta gran, San Antonio de Padua ye lo patrono de Cangues, con prosezión y fuecos d´artefizio chunto lo puen.

O 12 de marzo ye lo Concurso de Lanar y Cabrío.

A fiasta d´o Pastor o 25 de chulio, en o laco Enol.

O 8 de setiambre de tardis b´ha pasabilla por as carreras de Cangues d´Onís, y mosica y berbena ta rematadura d´a chornata.

O 12 d´otubre, diya de ro Pilar, i zilebran o “Certamen del Queso de los Picos” y ra “Feria de la Miel”.

A ros de Cangues lis izen “Barriles” y  “Botijos”.

En Cangues ye conoxito iste dito:

Cuando ‘l picu Pierzu pon capa, coge la tuya y escapa”.

04

Escultura en una calle de Cangas de Onís. — Escoltura en una carrera de Cangues d´Onís.

05

Foto nocturna de una calle. — Afoto nueiturno d´una carrera.

06

Vista nocturna del puente romano de Cangas de Onís. — Ambiesta nueiturna de ro puandico román de Cangues d´Onís.

Cangues d´Onís, abitata por zeltas y romans, estió ra Cánicas d´os romans, acullió la primer cort de ra monarquía asturiana, zaga ra baralla de Cuadonga, y esdebinió capetal d´o Raino d´Asturies con Pelayo, dica que tresladón a capetal ta Uviéu lo 792. En Cangues rainón Pelayo, Fávila, Alfonso I, Fruela y Aurelio.

Don Pelayo, lo primer rai asturián (718), rainó durán 18 añatas. Li suzedió Fávila qui, seguntes as coronicas, estió muerto por un onso dos añatas dimpués, en una de ras prebas de corax desichitas á ra nopleza. Con Alfonso I, siñor de Cangues d´Onís, prenzipia una tongada d´espardidura enta ra Sasera. En as engualtas de más fuga, con Alfonso III, lo raino asturián acupa tó lo norgüeste peninsular, dende O Porto dica Araba. O zaguer rai d´Asturies (866-910) estió Alfonso III “el Magno” y á lo fillo suyo García I (910) li pertocará seyer lo primer rai de Leyón.

M. Martín baxo lo puan de Cangues. Estiu-2003.

M. Martín bajo el puente de Cangas de Onís. Verano- 2003. Migalánchel Martín baxo lo puan de Cangues. Estiu-2003.

Retulo chunto lo puan de Cangues. Estiu-2003.

Rótulo junto al puente de Cangas de Onís. Verano-2003. Retulo chunto lo puan de Cangues. Estiu-2003.

En o sieglo XVI ya aparix Cangas de Onís como conceyu, y fegura en a “Junta General del Principado de Asturias”.

01

M. Martín sobresaliendo del pequeño puente de Cangas de Onís. — Migalánchel Martín soprixindo de ro puandico de Cangues d´Onís.

O “puente Romano”, “Puentón” u “Puente Vieyu” de Cangas d´Onís ye una berdadera alfaya arquiteitonica qu´acaramulla ra politeza de l´arriu Sella con a grandura d´o Pico Pierzo y autras mondañas enta ro fundo, pero no ye pas román, sino gotico; en os orichens (s. XIII) yera composau por siet arcadas, en puesto de ras zingo qu´en ha agora. En l´arcada zentral de ra puen ye pinchata ra “Cruz de la Victoria” u d´Asturies; ye molimén nazional dende 1931.

02

M. Pérez sobresaliendo del pequeño puente de Cangas de Onís. — Migalánchel Pérez soprixindo de ro puandico de Cangues d´Onís.

Gambadiando por Cangues arriban ta ra ilesia de Nuestra Señora de la Asunción, u “de Arriba”, con una estatua de Don Pelayo debán.  O templo ha planda de cruz latina, tres naus, cruzer y una tor. En risalta lo suyo campanal escaleronato en tres sulers.

03

Iglesia de Ntra. Sra. de la Asunción de Cangas de Onís. — Ilesia de Ntra. Sra. de la Asución de Cangues d´Onís.

Cangues d´Onís ye l´arranque ideyal ta una incorsa por a redolada norgüeste de ros Picos d´Uropa, en o pedero de ro mondañal de ro Cornión.

Más de 2.000 eztarias de ro Conceyu de Cangues d´Onís son acorporatas en o “Parque Nacional de los Picos de Europa”, la tuca más altera ye Torre Santa de Castiella con 2.596 mts. d´altaria.

07 Dominio_asturleonés

Mapa del territorio lingüístico asturleonés (1). — Dominio lingüistico asturleyonés

O territorio d´o Parque protexiu ha gran bariedá bechetal: dende ros 400 mts. d´altaria de ras selbas mistas de Cuadonga dica ros chicoz enclaus de suler alpín en a Torre Santa, por denzima de ros 2.400 mts. Agundan os patrals paxenters y os matullals: brugallas, cardonerals y chinestrals. As selbas son, más que más, de faus, fraxins, abetochas y castañeras.

Ne b´ha de sarrios, onsos, truitas y salmons. Por un regular, os crepatos y ripedos puntals calzins son lo más sobrixién de ro Parque Nazional.

A economía de ra poblazión de ros Picos d´Uropa ye ganadera, con feitura de quesos d´obella como lo de Picón (Cabrales).

A zema más siñalera de ros Picos d´Uropa, “Naranco de Bulnes” (2.519 mts.), ye mentata por primer begata en 1855 por Guillermo Schultz, pero a berdá ye que ros lucarins de perén l´han dito “Picurriellu”, “Picu Urriellu”, “El Urriellu”, “El Picu”, mesmo, “Cuetu Urriellu”. En Onís y Cangues d´Onís l´izen “Picos d’Urriellu” u “Los Urriellos”.

08

Mapa del territorio lingüístico asturleonés (2). — Dominio lingüistico asturleyonés

Julio Concepción en o suyo “Diccionario de la montaña asturiana”, en diz que ra boz “Urriello” sereba rilazionata con a esprisión “Los Urrieles”, y senglos terminos promanareban d´una radiz prerromana referén á“altaria” u “zema”. U seiga, Urrieles ye sinonimo de Picos, entre que Urriellu en sereba de Picu, lo pico más importán.

M. Martín en a selba de Bulnes con l´Urriellu ta lo fundo. Estiu-2003

M. Martín en el bosque de Bulnes con el Naranco de Bulnes. Verano-2003. Migalánchel Martín en a selba de Bulnes con l´Urriellu ta lo fundo. Estiu-2003

Iste dito popular lo emologa:

¿Por qué me llamáis Naranjo

si fruta no puedo dar?

que me llamen Picu Urriellu

que es mi nombre natural”.

Seguntes R. Sordo Sotres, en l´articlo “Nombres de lugar en los Picos d’Europa”, b´ha una pasata entre Liébana y Bulnes, clamata Los Urrieles y conoxita asinas por toz. Ha de seyer un repui de l´antiga anomenazión de “Urrieles”, o suyo zaguer arracón.

En Bulnes, Onís, Cangues d’Onís y Caín en rezitan:

¡Altos son Picos d’Urrieles,

altos son, qué maravilla!

Más alta é la Peña Santa

que se ve toda Castilla.”

09

Mapa físico de la zona. — Mapa fesica d´a redolada.

Por tal de ro mal orache que i ye fendo, no ban á poder puyar ta Bulnes en l´esturraz de sierga que salba un eslibel de 402 mts; como no ne b´ha de carretera (as autras comunicazions son un camín muito costeruto y alicoters) deziden d´ir ta Sotres, siguindo en paralel a cursa de l´arriu Duje. Asinas que no ban á poder biyer o Picu Urrielles, u Naranco de Bulnes.

Por o camín aturan á chintar, anque no dixa de pleber.

O Naranjo de Bulnes u Picu Urrielles ye una impresionán mondaña zelindrica de peña calzina berdical, con más de 500 mts. de cayita.

08a

El Naranco de Bulnes. — O Picu Urriellu.

Estió escalata por primer begata lo 1904 por D. Pedro Vidal, marqués de Villaviciosa, y por Gregorio Pérez “el Cainejo”, bizín de Caín; lo fazión por a man pazina. Estió cunsidata ista puyata l´enchegue d´a escalata esportiba en España. Lo 14 d´agosto de 1962, os aragoneses Alberto Rabadá y Ernesto Navarro alcanzón a zema d´o Naranjo de Bulnes por o costato Güeste, traziando una rota que ye estata de referenzia dica güé ta rafolladas d´escalataires; una cursa mitica, ra más conoxita y con más estoria de ras grans biyas d´escalata en peña.

10

Rabadá y Navarro delante del Naranco de Bulnes. — Rabadá y Navarro debán d´o Picu Urriellu.

11

Los malogrados Rabadá y Navarro. — Os malfortunatos Rabadá y Navarro.

Por trachico terzie de ro destín, ixos mondañers aragoneses morirán ixe mesmo diya, una añata dimpués, en a man pazina de l´Eiger (Alpes suizos).

  

Sotres (deribato d´o nome presonal latín SUTRIUS: “rilazionato con a zidá etrusca Sutrium”, autro parixer diz que promana de SOLO-TER: “prau de l´arriu”) ye un lucar pendién d´o conzello asturián de Cabrales. Ha 130 abitadors y ye ro lucar más altero de ros Picos d´Uropa, a 1.050 mtrs. d´altaria, lo cual que gosar quedar isolato á ormino por os nebazos ibiernals. Sotres ye á 48 kms. de Cangues d´Onís y á 119 de ra capetal. Uviéu.

Á ros de Sotres lis izen “Sotrigaños”, “Margaños” y “Sapos”, y diz que Sotres esdebien de “son tres”: os que fundón o lucar, que yeran tres famillas.

12

Vista de Sotres. — Ambiesta de Sotres.

Por ista redolata ye muito sonato iste dito:

Camarmeña, Bulnes, Sotres, Tielve y Tresviso, son los cinco pueblos del paraíso”.

Dende Sotres, en un diya esclatero, son alufrables as tucas d´o Escamellu, o Maín, o Deboro, a collata de Pandébano y os patrals de Llende y Cueto. Tamién dend´aquí ye l´aproxemanzia más plazentera ta puyar lo Pico Urriellu. A rota suple bellas nueu oretas, en as que s´esnabesa por os chobernils de Cabao, o cueto Quaceya, a mallata Canero, a collata Pandébano, lo refuxio de Vega d´Urriellu, a mallata la Tenerosa, se´n acantonía ra selba la Varera, se i puya ta ra collata Viallejo, l´espetregal de las Traviesas y os patrals de Vega d´Urriellu.

En seyer l´Urriellu entre ra Sasera y ra mar se i prisientan trestuques de l´orache, que puén estar tautes de graus angulemas. En Sotres en gastan istos ditos:

Cuando truena para Urriellu,

unce los gües y vete al eru,

y si truena pa Casaño

desunce los gües y vete al escaño”.

Cuando la gallina pía, señal de güen día”.

Remanen en una tabierna entre que difuara plebe. M. Martín merca en a botiga d´á lo canto lo disco preto de Kaelia Cotera, de Tresviso, “De los Picos de Europa traigo cantares”, pos bi yera sonando n´ixe inte y l´ha feito goyo.

13

Disco CD de Kaelia Cotera a Migalánchel Martín. — Adedicatura de Kaelia Cotera.

Un primo de ra cantadera que ye astí, li diz que casualmén ye, á pocos metros, zilebrando una comunión en l´Otel restorán “Sotres”.

14

Biografía artística de Kaelia Cotera. — Cursa artistica de Kaelia Cotera.

M. Martín, muito resoluto, marcha con o disco preto ta que li´n siñe, y l´artista li´n siña, lastima de no aber puisto afotiá-ie l´inte!

15

Títulos de las canciones del disco de Kaelia Cotera. — Tetulos d´as cantas de ro disco de Kaelia Cotera.

Como no atura la plebita, deziden de torná-sen ta Cangues d´Onís.

Anuncios