20. RIAÑO – VALLE DE VALDEÓN – CAÍN

Cruziando una puén sopre as auguas de l´entibo plegan ta lo lucar nuabo de Riaño.

L´aztual lucar de Riaño se i fraducó bels mts. por denzima de l´orchegato biello Riaño (de ro latín RIVUM ANGULUM, ‘anglo d´arriu u do se´n complegan dos arrius’).

L´entibo de Riaño -anomenato tamién “Remolina”- apertenex á ra cuanga de ro Duero y ye furnito por l´arriu Esla.

A costruzión de l’entibo escomenzipió lo 1965 y remató lo 1987. Lo proyezto indizcó numbrosas sobatidas y rebolizios populars, con enfrontinamiens con as fuarzas de l´orden, en desaloxando á ros bizins á lo furo y malamén, por negá-sen á albandonar as casas suyas qu´iban á bater (isto zaguero clabadico á lo de Chanobas). A estoria cutiana.

01

Nuevo Riaño, después de hacer el embalse. – Dimpués de fer l´entibo.

Á la finitiba la bal de Riáño, compleganza de ros arrius Esla, Yuso y Orza, estió engaronata por as auguas en 1987. Con l´antigo Riaño estión abalatos por as auguas entegramén os lucars de Anciles, Éscaro, Huelde, Pedrosa del Rey, La Puerta y Salio, y en parti Burón y Vegacerneja. Nomás i fizión qu´una localidá: o “Nuevo Riaño”.

02

Viejo Riaño, antes que lo sepultase el embalse. – Antis d´orchegato por l´entibo.

Ixen de Riaño por a carretera N-625, camín de ro puerto de Pontón, durán 17 kms. Astí pillan un esbarre ta la cucha por a carretera LE-214, que lis mena en 4 kms. y meyo ta lo puarto de Panderruedas (1.458 mts.), do ye lo miralgüén de Piedrashitas (1.550 mts.) sopre la bal de Valdeón y Picos d´Uropa con a redolada d´o Llambrión y Torre del Friero, pero no´ndi beyen cosa por la pretiza guaira que b´ha n´ixe inte. Como iziba l´escritor Víctor de la Serna: “un pequeño paraíso que crece en la gran hoya al abrigo de los dioses de roca que tienen aún neveros donde refresca el rebeco”.

A bal de Valdeón (en a Edá Meya, “Valle de Eione” u “Eone”, que promanareba de “valli(s) legione(s); u de l´induropeyo “Eo” u “Onno”, referito á “puasto d´auguas”) ye una bal d´alda mondaña escabonata por l´arriu Cares de sur enta norde; ye enclabato en un ziergol calzino entre ros mondañals ozidental y zentral de ros Picos d´Uropa, termino monezipal de Posada de Valdeón. Á lo reser d´os aires umedencos de l´oziano, merzé á lo barrache natural de ros mondañals d´o Cornión y ros Urrieles, espleita d´un clima tasamén plebidioso con patrals monterizos, lezinas, carrascas y caxicos. En as alduras gosan i campar á ormino ras chelatas, rosadas y boiras, conoxitas en o payís como “encainadas” u “borrinas”.

02a Mapa de la zona

Mapa de la zona. Mapa d’a redolata.

03

Paisaje del Valle de Valdeón 1. – Paisax de ra Bal.

Seguntes decumén d´Alfonso VI de 1081 yera la bal d´o Tione, nome de prebable orichen zelta.

Valdeón ye lo monezipio que más territorio alporta á lo Parque Nacional (16.564 Ha), y b´encluye no nomás la bal d´o Cares, tamián guana par de ras zemas de ros mondañals Zendral y Ozidendal de ros Picos d´Uropa.

O primer cabosemana d´otubre i zilebran la Feria de Artesanía y Ganadería. Amuestran y benden produtos tipicos d´artesanía d´a comarca, asinas como goyatumen y caballumen.

04

Paisaje del Valle de Valdeón 2. – Paisax de ra Bal.

Entre Cordiñanes y Caín ye l´armita de la Virgen de la Corona, ta la que ban en romería os lucars de ra bal de Valdeón cada 8 de setiambre. Ye un chiqued edefizio d´una sola nau con o capitero cubillato por una cruzería de dople cruz. Seguntes a liyenda l´anomenan asinas por estar astí do estió coronato Rai Don Pelayo, en os empezallos d´a Reconquiesta. Zingo añatas andó Pelayo por os mons de Valdeón i amenando y atrapaziando á ras chens dica fer la primer furicada cuentra os moros en Covadonga; autros son de ro parixer de que li nombrón rai en o mon d´a Corona, antis d´a baralla de Covadonga, y que ra berdadera ixera y primer bitoria estió en a bal de Caín.

Iz qu´en 1580 ros abitadors de ra bal enduraban una sequera de marca gran y lo bistiar se´n ausidiba asetegau. Se´n aclamón ta la Virgen de Corona y en consiguión as plebitas.

En ista redolada de Monte Corona b´ha una contrimuestra de selba mistura de caxicos, telleras y fraxins.

A carretera empiora más y más en a baxata enta ra bal; nabesan por Caldevilla, Soto de Valdeón y Posada de Valdeón con os bicos de Los Llanos y Prada, chunto con Santa Marina de Valdeón, o lucar más aldizo de ros Picos, á 1.158 mts., que dixan en un esbarre ta ra dreita; un poqué más adebán ye Cordiñanes, en una costera enta ra cucha.

05

Paisaje del Valle de Valdeón 3. – Paisax de ra Bal.

Toz els con arquiteitura popular á pur d´orrios retangulars con cubillato de palla á dos auguas, balconatas de ras casas, rafes, puartas y finiastras. Dentran por l´estreito, siguindo l´arriu Cares, encalaxatos de tod; dica que de sopetón se´n ubre una ampla estendillata do ye plandificato lo zaguer lucar de ra bal, Caín; dende ro puardo de Panderruedas, 20 kms. Astí adormirán ixa nuait.

29-6-2012. Caín (con o sinificato de: chitar, surtir, guaira, fuan; en o sieglo XII, Cayn) ye plandificato en un majismo paisax, en o fundo d´una bal zercular emplida de fabar y carrascal en o mon La Pierna, á 505 mts. sopre ro libel de ra mar -ye chocán que seiga ro lucar más baxo de ra bal-; pertenex á lo Conzello de Posada de Valdeón. Caín ye arredoliato de grans tucas rocazeras, como Robliza (2.245 mts.), Los Cabritos (2.030 mts.) y Jultayu (1.935 mts.).

Ye empieze u rematadura, pende, d´a Rota d´o Cares.

Cuasi isolato d´ibierno, i fa güen orache lo resto de l´año y ye bian furnito d´aloxes y tabiarnas.

Una tradizión i mantenita en chulio ye l´espelurzie d´as telleras, clamatas aquí “tejas”. Os de Caín i puyan ta tallar lurs brancas y en familla en trigan as flors ta xucá-las y bendé-las en as grans zidaz.

En Caín ye ra ilesieta de Santo Tomás y, á lo canto, lo fosal.

06

Iglesia de Santo Tomás de Caín. – Ilesia de Santo Tomás de Caín.

07

Campanario de la iglesia de Santo Tomás. – Campanal d’a ilesia de Santo Tomás.

En a Edá Meya, Caín yera conzello siñorial. En a Edá Moderna, se´n acorporó ta la tiarra de ro conzello de Valdeón, esdebenindo monezipio unico en o sieglo XIX.

Debiu á ra fama de pastors, cazataires y compañers de cordata por as mondañas de ros Picos d´Uropa, lis ne plandificón iste chocán dito: “los de Caín no mueren, se despeñan”. Tamién iz que diz una liyenda que “un muerto mató a tres”, en remerando que tres bizins fuon á riscatar á un que se´n yera xerbigato e i fenezión toz en o salbamén.

08

Vista desde Caín. – Ambiesta dende Caín.

Y autro dito bian conoxito por tod y que paix estar que l´orichen suyo ye en Caín, por lo ripedo y costeruto d´o terrén: “pasar las de Caín”.

Por ziarto, á ros Picos d´Uropa lis ie dizen “Picos Urriellos”.

O pastor y escalador Gregorio Pérez de María “el Atreviu”, naxito en Caín en 1853 y conoxito difuera de Caín como “el Cainejo”, ha cualques placas de reconoximián en o lucar suyo.

09

Placas-homenaje a “el Cainejo”. – Retulos d´omenax a “el Cainejo”.

Estió compañer de cordata de Pedro Pidal, Marqués de Villaviciosa, chuntos coronón por primer begata la zema de “el Picu” (Naranjo de Bulnes) en l´año 1904.

Anuncios