19. PICOS D’UROPA I (CANTABRIA). POTES – PUERTO DE SAN GLORIO

Potes (d´o latín POTIS: ‘dueño, poderoso’, a tiarra de ro siñor, u esdebenito de PONTES: ‘puens’) ye ra capetal chiografica, molimental y estorica de La Liebana, do se´n complegan os arrius Deva y Quiviesa y ras cuatro bals lebaniegas: Valdebaró, Valdeprado, Cereceda y Cillorigo; ye plantificada entre bellas cordaleras: as siarras de Peña Sagra y Peña Labra y lo mondañal de ro “Parque Nacional de los Picos de Europa”.

01

Mapa de la comarca.

Potes ha 1.450 abitadors, ye á 290 mts. d´altaria y á 106 kms. d´a capetal de ra Comunaldá de Cantabria, Santander.

02

Mapa de la Liébana.

A proxemedá de ros Picos d´Uropa engranda ras suyas balguas toristencas y patrimonials y, trucadizamén, ixa situgazión tan suyiza á retiro d´as bisas umedencas d´a mar orichina un microclima más xuto y calián.

03

Potes desde San Juan de la Casería. Dende San Juan de la Casería.

A tradizión d´o mercato tradizional, que retantaba á ras chens de todas istas bals, ye alberata en Potes por un decumén de Sancho IV de 1291. Agora i plantifican cada luns un bullerizo mercato con produtos tipicos d´a redolada, como quesos picones y quesucos, binata tradizional, mial, bin dolz, fruita, embutius, nucas, té de los Picos y ros garbanches chiquez y gustosos con os que atrapazian o sonato cocido lebaniego.

Tamián continan fendo-sen sais ferias de bistiar á l´añata, en risaltando ras de San Pedro (29 de chunio), La Cruz (16 de setiambre) y Los Santos (2 de nobiambre).

Autras fiastas intresans en Potes son as de ro 15 d´agosto en a onor d´a Virgen de Valmayor; lo 14 de setiambre, as fiastas de La Cruz con una tradizional romería ta lo bizín monesterio de Santo Toribio, y lo segundo cabosemana de nobiambre en o que i zilebran la Fiesta del Orujo.

04

Una bonita zona de Potes. Polita partida floriata.

A Estoria de Potes se´n recula dica ro sieglo VIII, con a repoblazión farchata por Alfonso I con chens d´a Sasera y á metá d´o sieglo IX -cuan yera conoxita como Pautes-, pertenexendo allora á ro Casal d´o Marqués de Santillana, que más tardi esdebiendrá de l´Infantado.

Enantata ra Edá Meya, Potes esdebinió siñorío d´o conte Don Tello. Ál´arreyo d´o sieglo XIV y primer metá d´o XV enduró las plaitinas entre dos famillas de ra nopleza d´a redolata, os Mendoza y os Manrique, dica que lo 1445 lo siñorío se´n aposó en mans de don Iñigo López de Mendoza, nombrato por o rai de Castiella, Marqués de Santillana.

05

Foto antigua de Potes. Afoto antigo.

A Torre de l´Infantado -de ro sieglo XIV, simbolo d´o poder fegudal- ye l´edefizio más siñalero de ra billa. De planda cuadrata y rematata por 4 tors angulars enmuresnatas, ha una escalinatera fruental y ye plandificata en o bico biello d´a billa. Aztualmén ye ra Casa la Billa.

06

La torre del Infantado de Potes. – A tor del Infantado de Potes.

Ne b´ha d´autras torrazas proxemas ta ra de l´Infantau, en soprixindo la d´Orejón de la Lama, tamién d´o sieglo XV.

Lo bico biello ye chuñito por dos puens, lo de la Cárcel y lo meyebal de San Cayetano, fraducatos sopre l´arriu que nabesa por a billa, lo Quiviesa, poco antis d´a suya compleganza con l´arriu Deva.

07

El río Quiviesa a su paso por Potes. – L´arriu Quiviesa en nabesar por Potes.

A localidá ha intresans casals linachutos barrocos y arquiteitura popular d´o sieglo XVI en o bico de La Solana.

A ilesia biella de Pautes ye ra de San Vicente, gotica d´o sieglo XIV, con adibius de dimpués, a nuaba ye de ro sieglo XIX.

Entre que i fan la promenata, lis ba chocando ra morfuga chobenil y amenata, alufrable por os porchegatos d´as carreras Doctor Encinas y La Cántabra, do i benden binatas, formaches y autros produtos tipicos.

08

M. Martín, ¡de qué se reirá!. De qué coda ixe risico!!.

L´escrebidor Benito Pérez Galdós escrebiba sopre Potes:

Los derrumbadotes y horribles percipicios de nuestro cerebro se disipan y la dulce imagen de lo llano, de lo apacible, de lo apropiado a la existencia del hombre, llena nuestra mente. Todo se anuncia ya, ¡oh deseada Potes! Villa ilustre y señora de estos adustos lugares. (Benito Pérez Galdós)”.

Por a bal de Valdebaró y antis de plegar ta Fuente Dé, en un esbarre ent´a dreita, en o pedero de ro mondañal oriental de Picos d´Uropa, ye ro lucar de Mogrovejo, á 10 kms. de Potes.

09

Vista de Mogrovejo 1. – Ambiesta de Mogrovejo.

Ha una torraza enmuresnata cuadrata meyebal que yera de Pedro Ruiz de Mogrovejo en o sieglo XIII, chus lo mon de la Morra de Lechugales (2.438 mts.) y, dezaga, as demás tucas de ro mondañal d´Andara.

10

Vista de Mogrovejo 2. -Ambiesta de Mogrovejo 2.

Autras edeficazions d´intrés i son a ilesia de Ntra. Sra. de la Asunción, de ro sieglo XVII, asinas como bels casals linachutos. Ha 44 abitadors, ye á 460 mts. d´altaria y á 117 kms. de Santander.

Como curiosidá, á ros de Mogrovejo lis izen “Paticalzos”.

Á 15 kms. d´asti, baxo ros mondañals oriendal y zendral de ros Picos d´Uropa, se´n alcuentra Fuente Dé, (25 kms. de Potes), o sonato ziercol glaziar, que ro nome suyo ye rilazionato con as fuans i esistens, do nax l´arriu Deva (induropeyo DEU ‘augua, diosa’, arriu d´augua sagrata), á 1.100 mts. d´altaria. De fillers end´ha: l´arriu Cantijan, l´arriu Nevandi, l´arrigatiello Peñalba, l´arriu Leva, l´arrigatiello Trespalacios -en Pautes s´endi achunta con o Quiviesa- y más adebán li se complegan as auguas d´o Buyón.

11.

Fuente Dé. – Fuen de Dé.

Por denzima de ros suyos zillos, tallatos por o chelo, i acucutan mondazeras, en soprixindo: peña Remoña, picos de Padiorna, Celada, Valdemoro y la Peña Vieja, de 2.613 metros d´altaria.

En iste puesto b´ha un Parador Nacional y un conoxito teleferico qu´arrecorre un eslibel de cuasi 800 mts. en cosa de tres menutos, dica lo clamato “Mirador del Cable”, a 1.847 mts., dende do s´end´alufra lo millor panoram de Fuente Dé y as bals lebaniegas, con as zemas de ros Picos y ros puertos de patrals en Áliva, en o pedero de Peña Vieja.

12.

Desde Fuente Dé. – Dende Fuen de Dé.

O conchunto orografico conoxito como Picos d´Uropa ye un trianglo de mondañals calzins, pertenexiens á lo nuclio zendral de ra Cordalera Cantabrica, 502 kms. cuadratos esparditos entre Asturies, Cantabnria y Leyón. Os tres mondañals en os que son trestallatos os Picos d´Uropa son l´Ozidendal u d´o Cornión, o Zendral u de ros Urrieles y l´Oriendal u d´Andara. Os arrius naxitos en istas alduras son de tan curta y ripeda cursa que lurs arrigatuaras han escabonato fundismos congustros y renclusas. Ta lo güeste, lo Sella arrecorre la “garganta de los Beyos”; en o zentro, lo Cares, arrecorre la de ro suyo nome; y ta l´este, lo Duje y lo Deva tallan l´estreito de La Hermida.

Agora los Picos d´Uropa constimezen un amplizo Parque Nacional, o segundo en grandaria de l´Estau, con 64.660 eztarias, esparditas por 10 monezipios de tres comunaldaz autonomas. A mayor altaria ye lo Pico Torrrecerredo y la más baxa de 75 mts., en l´arriu Deva.

13

Mapa de los Picos de Europa. D´Uropa.

Lo nome de Picos d´Uropa paix estar que promana de ros nabirans y balleners que, á lo que tornaban ta lo continén uropeyo, yeran as primers mondañas que i biyeban, anque els lis iziban Picos d´Uropa y Escandinabia.

Ta ros coronistas romans yeran Mons Vindius (de ro zeltico “VINDOS”: ‘blango’), lo zaguer cubillar de ras tribus cantabras en as guerras de ro sieglo I a.C. Os coronistas mozlemes los anomenan Peña Pelayo, de risultas de ra baralla de Covadonga.

Lo 1530 l´estoriador Lucio Marineo Sículo los anomenó Rupes Europae. Ambrosio Morales, coronista de Zelipe II, las menta en 1572 como “Montañas de Europa” y Flay Prudencio de Sandoval, en 1601, las clama “Peñas o Sierras de Europa”, y “Pirineos Cántabro-Astúricos” en o sieglo XIX, d´allora ta debán remanió ya ta cutio lo nome de Picos d´uropa, anque ros abitadors indichenas, lis izen simplamén “Los Picos” u “La Peña”.

En lur bechetazión son de risaltar as mañificas contrimuestras de selba adlantica -fabars y caxicars-, cuesistindo-ie con lezinerals y zurerals mediterranios, en a culera de ra bal de Liebana, y en as redoladas de ros Picos una flora d´alda mondaña.

Rispetibe á ra fauna, lo Pargue Nazional ye un de ros zaguers refuxios en Uropa de cualques espezies menazatas d´acotole, como l´onso pardo, l´aurón y l´alica reyal, chunto con autros animals como lo sarrio, chabalín, lupo, güeitre, cuerzo, pardo….

Lingüisticamén, en os Picos d´Uropa se troban as mugas de ro bable zentral y oriental.

Os Picos d´Uropa en Cantabria son situgatos en a suya par surozidental, á metá camín entre la mar y ra Cordalera Cantabrica. De ros 502 kms. cuadratos qu´acupan os Picos d´Uropa, 131 en pertenexen á Cantabria.

El Coriscao troxa en o sur Cantabria de Leyón, do la muga entre ras dos comunaldaz pasa por l´Alto de la Triguera, puya ta Peña Remaña, Pico de la Padiorna, Pico San Carlos, Madejuno, Tiro Llago, Torre Blanca y Pico Tesorero.

Autra linia amuga en o norte Cantabria y Asturies dende lo Tesorero, los Urrieles, Horcados Rojos, Picos de Santa Ana, Peña Vieja, dica ros Puertos de Áliva y l´arriu Duje.

En o Mondañal Oriental, u Ándara, l´espartidero cantabrastur ba de l´arriu Duje ta lo Pico Cortés, la Morra de Lechugales (2.444 mts., maisima altaria), la Pica del Jierro, Pico de Valdominguero, Pico Boro, os patrals de Jito de Escarandi dica la siarra  que zarra por o norte Tresviso, ta endi baxar ta l´arriu Deva, qu´amuga por l´este lo Mondañal Oriental.

Ye tiampo de marchar ent´autra redolata de ro Pargue Nazional, camín de ra bal de Valdeón.

Ixen de La Liebana por a carretera N-621, qu´esnabesa la bal de Cereceda en paralel ta l´arriu Quiviesa, dica plegar ta lo puerto de San Glorio (1.609 mts.), muga de Cantabria con Leyón. Antis más l´iziban “San Clovis” u “San Clovio”.

Dende Pautes y durán 28 kms. ban por una carretera asabelo enguiliata, con guanacosa zerrigualtas y gran panta -1.318 mts. d´eslibel-, nabesando ros lucars de Valmeo, La Vega y Bores.

Plegan en o puarto de San Glorio, do M. Martín se i chita una clucadeta.

13a

Puerto de San Glorio.

San Glorio ye un de ros puardos de mondaña más alters d´a Cordalera Cantabrica, en una redolata de gran ricura de flora y fauna.

Ye un acucutadero enta ras tucas d´o Coriscao, la Peña de la Devesa, la siarra d´Orpiñas en Peña Prieta, Mojón de Tres Provincias, Fuentes Carrionas, y parti de ros Picos d´Uropa, pero güé no se i beyen guaire bian, pos una preta guaira en ye siñora.

14

Hacia los Picos de Europa desde el puerto de San Glorio 1. Enta ros Picos d´Uropa.

15

Hacia los Picos de Europa desde el puerto de San Glorio 2. Enta ros Picos d´Uropa.

16

Hacia los Picos de Europa desde el puerto de San Glorio 3. Enta ros Picos d´Uropa.

17

Desde el Puerto de San Glorio 1. Dende ro Puerto de San Glorio.

18

Desde el Puerto de San Glorio 2. Dende ro Puerto de San Glorio.

Guanas ambiastas por abaxo, de ra bal con bacúmen i paxentando en un patral de firme, rezulián y polidisma berdor.

19

Vacas en el valle pastando. – Bacas paxentando en a bal.

Ya en o costato leyonés, alufran que ro baxán ye de menos panta y de 20 kms. de luango; pasan por Llánaves de la Reina y en o siguién lucar, Portilla de la Reina, i aturan un ratico ta prener un socalze en una tabiarna. Ista redolata se conox que ye más xuta y con menos berdura.

Continan camín por autros lucars apellidatos “de la Reina”, como Barniedo, Los Espejos y Villafrea, dic´arribar en a sasera d´a  Boca de Huérgano, un poqued antis de l´entibo de Riaño.

Anuncios