17. COMILLAS – PARQUE NATURAL DE OYAMBRE

28-6-2012. Comillas (toponimo deribato d´o bocable zelta ‘KOMA-OE’, con o sinificato de lumo, y d´ixe en esdebiene: ‘Komba-Cumbellas-Cumillas’, con o sendito “coma, terrens entre bals y lumos”, que bian podreban seyer La Cardosa, Sobrellano y La Coteruca) ye una localidá costera d´a comunidá autonoma de Cantabria, en a comarca d´a “Costa Occidental” y situgata en o Parque Natural d´Oyambre, ha bels 2.374 abitadors, ye á 23 mts. d´altaria y á 48 kms. de ra capetal de ra Comunidá, Santander.

01

Mapa de la costa de Cantabria. D´a costa cantabra.

Á ros de Comillas lis izen “Pederreus” u “Perrerus” y, antimás,  “la Villa de los Arzobispos”, porque en o monezipio naxión muitos relichiosos que alcanzón altos cargos en a Ilesia, más que más en as colonias de Latinamerica.

02

Vista de Comillas. – Ambiesta de Comillas.

O terreno de Comillas, con simeras y espelungas, afaborió l´aposamién de presonal en fa milentas d´añatas.

Comillas pertenexeba en l´antiga Cantabria á la tribu d´os Aurins u Abarichinios.

A primer referenzia decumental d´a billa ye calendata en lo 1088.

03

El Puerto antiguo de Comillas. – O Puerto Biello de Comillas.

As billas d´as costas cantabra y basca atrapazión lo 1296 la “Hermandad de las Marismas”, una chunta ta esfender lurs intreses comuns, á lo serbizio d´os rais castellans, mesmo con autonomía ta siñar trataus entrenazionals.

04

Rincón de la Campa en Comillas. – Arracón de la Campa de Comillas.

Comillas bibiba en autras engualtas de l´agricultura y ra pexcata -l´apercazie de ballenas yera una d´as fayenas de más esquimen dend´antis más y dica 1720-. Dende ra fin d´o sieglo XX, d´o torismo.

05

Plaza de la Constitución de Comillas.

Cal mentar á un presonax comillano, Antonio López, qui emigró t´America y, dimpués de fé-ie diners, se plantificó en Barzelona. Tirando de beta, l´interpresaire aduya á Alfonso XII en as campañas d´a 1ª Guerra de Cuba; á trucas, lo rai l´atorga lo tetulo de Marqués de Comillas lo 1878.

06

Vista antigua de Comillas. – Ambiesta antiga de Comillas.

Bibindo en Barzelona se i rilaziona con os arquiteitos y artistas d´allora en a zidá, ixo li biene de pistón ta esportar lo modernismo barzelonés enta Comillas, á la qu´afaborix con sucosas imbersions en fantesticos edefizios d´ixe estilo.

08

M. Martín delante de un bar antiguo de Comillas. Debán d´una antiga tabiarna.

Antiparti, combida á beraniar en Comillas á Alfonso XII en 1881 y 1882 y dimpués á lo fillo, Alfonso XIII, os años siguiens; lo cual que Comillas se meterá de moda entre as chens de bara alta como destín d´estiu ta prener “baños de ola”.

O segundo Marqués de Comillas, Claudio, i rematará más adebán ra “Universidad Pontificia”.

09

Comillas con su iglesia. Con a suya ilesia.

O diya prenzipia firme grisenco y paix estar que pleberá, asinas que nomás desayunar marchan ascape á fer una cursa por Comillas.

10

Vista de Comillas. Ambiesta de Comillas.

Escomenzipian en a pza. Joaquín del Piélago, do ye ra “Fuente de los Tres Caños”,

11

Fuente de los tres caños. – Fuen de los tres caños.

feita en piatra por l´arquiteito catalán Lluis Doménech, lo 1899, que s´asemella á un candeler en simbolizar que Comillas estió lo primer lucar d´España con letrezidá.

12

M. Martín delante de la iglesia de San Cristóbal de Comillas. – Debán de ra ilesia de San Cristóbal de Comillas.

Continan enta ra ilesia y torraza de San Cristobal, de metá de ro sieglo XVIII,  ye de planda cuadrata y capiter retangular con 3 naus.

13

Iglesia de San Cristóbal de Comillas. – Ilesia de San Cristóbal de Comillas.

Enfruén de l´entrador d´a ilesia, en a mesma plaza entantonicata “de la Constitución”, ye l´antiga Casa la Billa, de ra mesma epoca que ra parroquia. Ye un poliu casal aporchegau con arcadas sillars de meyo punto.

14

M. Pérez delante del antiguo ayuntamiento e iglesia de Comillas. Debán d´´ a biella Casa La Billa e ilesia de Comillas.

Chunto la plaza b´ha cualques casals montañeses, con frontera abalconata, escutos, paretazos tallafuecos y rafes.

15

Gran casa montañesa. – Casalaz montañés.

Continan la cursa alufrando bel poqué luañes lo Palaz de Sobrellano, antiga siede de ro marquesato de Comillas, ye un edefizio niogotico modernista de 1881, costruyito por Joan Martorell, mayestro de Gaudí, con capiella-pantión amueblato por Gaudí y un majizo parque.

16

Palacio de Sobrellano y la capilla-panteón. – Palaz y capiella-pantión.

17

Palacio de Sobrellano de Comillas. – Palaz de Sobrellano de Comillas.

Plegan ta lo miralgüén de Santa Lucía, dende do bi ha soprixiens ambiestas enta ra Placha de Comillas.

18

Vista hacia la playa de Comillas 1. – Enta ra placha de Comillas 1.

19

Vista hacia la playa de Comillas 2. – Enta ra placha de Comillas 2.

Tamién astí, pero en a escuantra, alufran la repolida tor cuadrata d´a “Casa del Moro” con a efichie d´o Sagrato Corazón de Chesús sopre la frontera.

20

Casa del Moro.

Ye sonato un de ros entradors d´a Casa´l Moro, la Puarta modernista “ de los Pájaros” u “del Moro” diseñata por Gaudí en 1900; á lo que se´ndi amanan no lis parix que tianga cosa d´espezial, puéstar porque ra bechetazión d´o chardín no lis dixa biyé-la de tod; con tó y con ixo i barruntan lo foratieco ta que pasen os paxaros, por alto d´a puarta ta ras presonas.

21

La puerta de los Pájaros. – A puarta d´os Paxaros.

Nabesan á canto d´autro edefizio tipico montañés, l´antigo ostal Casa Colás, en o qu´estió fa guanacosa d´añatas M. Pérez.

22

Antiguo hostal casa Colás. – Antigo ostal casa Colás.

Como ya preta á pleber no pueden tastá-lo con ficazio ni continar biyendo autros edefizios molimentals y mudernistas de Comillas, como lo palazed anomenato “El Capricho”, de Gaudí, rebutiu de zeramicas con motibos arabescos y fierro forgato,

22a

Una zona del Capricho de Gaudí. – Una par d’o Capricho de Gaudí.

23

Palacete El Capricho (Gaudí 1883-1885). Palazed El Capricho (Gaudí).

ni la Universidad Pontificia –zentro chesuita d´educazión superior ta seminaristas- d´estilo goticomudéxar.

Antis d´ ir enta Oyambre, M. Pérez merca quesada fresca; güenísma.

O Parque Natural d´Oyambre, (toponimo debenito de “OLIA AMNIS”: con o sendito de “fluyir, manar”), declarato Parque Natural lo 1988, ye espardito entre os monezipios de Comillas, San Vicente de la Barquera, Valdáliga, Val de San Vicente y Udías,  5.758 eztarias en tod.

24

Oyambre con la playa. Oyambre con a placha.

Abraca ras marismas de la Ría de la Rabia (“fontem rapitam”: ‘corrién rapeda’) y la de San Vicente, constimezendo-ie un gran exemplo d´ecosistema litoral con numbrosas aus acuaticas qu´ibiernan en a zona u i discansan entre migrazions, en risaltando l´aneda reyal, gabacheta, chiflón, correlemos, gallo marín y gabiota; asinasmesmo se i troban plachas y dunas, patrals, selbas pretas autoztonas y espinguers.

Ista chestión territorial apremite ra mantenienzia d´un importán espaz natural.

25

Ría de la Rabia.

Ta l´orién d´un cabo y d´a ría de La Rabia s´alcuentra ra placha d´Oyambre, de 1,8 kms. d´arena fina y dorata rilazionata con as mareyas; asinas, en a pliamar de ra placha tasamén endi remane un chiqueta contrimuestra, lo cualo que ras dunas i risaltan de firme.

26

Playa de Oyambre 1. – Placha de Oyambre 1.

En o costato oriental de ra placha b´ha un intresán riedo dunar, chenerato por as arenas carriatas por o biando y os alportes de ras mareyas.

27

Playa de Oyambre 2. – Placha de Oyambre 2.

En o termino de Valdáliga ye la ría de La Rabia y ra placha d´Oyambre.

28

Camping Playa de Oyambre, ría y playa. Cambin, arriga y placha de Oyambre.

M. Pérez se i queda chafato de tot en pasar por senglos puastos y no poder biyé-ne guaire pos s´ha chirato boira preta plebidiosa; l´ese quiesto amostrar á lo suyo amiu istos paradisencos puastos en do fue estato d´estiguaire por bellas añatas en o cámbin “Playa de Oyambre”.

29

Playa de Oyambre 3. Placha de Oyambre 3.

Fa tiampos, en os arredols i espleitón as selbas d´o “Monte Corona”, en quitando tiara que portiaban en gabarras por la ría de La Rabia.

30

Playa de Oyambre 4. Placha de Oyambre 4.

A escritora Concha Espina, en una d´as nobelas suyas, iziba sopre la ría de la Rabia: “Este lugar donde no se oye ningún ruido del mundo, y por eso, sin duda, escuchamos tan claras y distintas las voces inaudibles de la naturaleza: susurros, estallidos, preguntas y llamadas sordas que no es fácil oir en los senderos urbanos: gritos del viento, sones de nubes, idioma de los seres menores de la creación que nos penetran y conmueven.

31

Playa de Oyambre 5. Placha de Oyambre 5.

32

Playa de Oyambre 6. Placha de Oyambre 6.

En a placha d´Oyambre, igual como en Comillas, a burzesía yiba á prener “baños de ola”, recomendatos por os zrujanos que siguiban as corriens medicas ichienistas.

33

Playa de Oyambre 7. Placha de Oyambre 7.

En Oyambre tamién enguerón o primer cambo de golf d´España, do gosaban chugar Alfonso XII y más tardi Alfonso XIII, por ixo lo declarón “Real Club”.

En a placha d´Oyambre tamién escaizió una pasata unica en España.

34

Playa de Oyambre 8. Placha de Oyambre 8.

Lo 14 de chunio de 1929, á ros 20 ta ras 9 d´a tardada, i aterrizó por bel casual y sin chisla de gasolina – dimpués de 29 oras y 5.300 kms. de cursa – lo primer bolito uropeyo trasatlantico,  que feba lo trayezto Old Orchard (Maine, Estatos Chunitos)-París.

35

“El pájaro amarillo”.

Yeran tres os tripulans eslexitos, pero i plegón 4. Lo cuarteno, primer polizón d´a estoria airia, no yera destinato ta ra gloria, pero i fegura: yera Arthur Schreiber, un periodista de 25 añatas que quereba fer un libro d´ista abentura. Se´n yera amagato en a zaguera d´o fuselax de ro bión, sin que naide i parase cuenta.

36

Los tres tripulantes, Armand Lotti, Jean Assollant, René Lefévre y el polizón. – Os tres trepulans, Armand Lotti, Jean Assollant, René Lefévre y l´amagatau.

Á lo que l´escubrión, os tripulans dandalión entre chitar á lo polizón -ta guarenziar lurs bitas sin ixa carga- u correr lo risque de fer a trabesera con er. Dezidión de continar chuntos, magueras que calió cambeyar toz os plans de bolito, y podión rematar malamén si no por l´arena amariella d´a placha d´Oyambre, que i fazió onra como pista d´aterrizax natural.

37

El Pájaro amarillo durante su escala forzosa en la playa de Oyambre. – El pájaro amarillos mientres a estata aforzata en a placha de Oyambre.

Iz qu´en Comillas atrapazión una gran fiasta con orquesta y bailotes, y l´espeitaclo en a placha á ro diya siguién endi estió de marca gran.

38

El pájaro amarillo, en Oyambre en 1929. Al fondo, un avión enviado para portar gasolina y que el vuelo pudiese seguir a Francia. Ta lo fundo un bión nimbiato ta i furnir gasolina y que ro bolito podese continar enta Franzia.

Dend´allora anomenan tamién á ra placha d´Oyambre: “la playa del Pájaro Amarillo”, por a trucadiza color de dito bión.

39

Llegada del avión a Oyambre. – Plegata de ro bión en Oyambre.

Casualmén rematan de fer a pelicla “La Aventura del Pájaro Amarillo”, alazetata en os feitos reyals.

40

“La aventura del pájaro amarillo”.

Un km. dimpués de pasar la playa d´Oyambre, camín ta ra Liébana y, anque contina plebendo, aturan un inte t´alufrar una ambiesta dend´aldo de ra placha y fé-ie cualque afoto.

Anuncios