13. PESQUERA D’EBRO – ENTIBO DE L’EBRO

Pesquera d´Ebro (respetibe á lo sinificato d´iste bocable latín, en pué esdebenir de l´antigo pesquero: “paxenter, patro, defesa, cambo proxemo ta una fuen”, unautra azezión en sereba “azute por do esguaza un arriu ta emplego de molins, regano u pexcata” y ra zaguera,  de piscarius/aria, referén “á la pexcata u á lo pexcataire”) ye una localidá situgata en a comunidá autonoma de Castiella y Leyón, enta ro norte de ra probinzia Burgos, aintro de ra comarca de Páramos, á 27 kms. ta lo norte de ra capetal d´o conzello de Valle de Sedano, y chunto l´arriu Ebro, ha 14 abitadors, ye á 642 mts. d´altaria y á 70 kms. de Burgos capetal.

01

Puente sobre el Ebro en Pesquera.- Puen sopre l´Ebro en Pesquera.

Antis d´arribar en Pesquera consiguen dende ra carretera unas guanas ambiastas chenerals d´o “Cañón del Ebro”.  Ye ta lo sur d´a bal de Zamanzas, en l´Espaz Natural conoxito como “Hoces del Alto Ebro y Rudrón”.

02

Hoz del Alto Ebro y Rudrón.- Foz de l´Aldo Ebro y Rudrón.

En Pesquera de Ebro prenzipian os 15 kms. d´a más sonata cursa de senderismo de tota ra probinzia Burgos, a de ro Cañón del Ebro. L´arriu arrecorre lo suyo termino por fundas clusas que, dende Pesquera ta Quintanilla, i composan fozes enguiliaderas.

03

Río Ebro junto a Pesquera de Ebro.- L´Ebro á canto de Pesquera d´Ebro.

L´Ebro dentra en Pesquera chus una mañifica puen meyebal de dos güellos, refirmata en l´armita de San Antonio, merzé á ra familla Gallo, qui han astí lurs armas con a famosa mazada: “El por qué, yo me lo sé”.

04

Puente y ermita de San Antonio de Pesquera.- Puen y armita de San Antonio de Pesquera.

05

Otra vista del puente sobre el Ebro.- Unautra ambiesta de ra puen sopre l´Ebro.

06

Interior de la ermita de San Antonio.- Aintros de l´armita de San Antonio.

Os lucars d´á canto l´Ebro en teneban de calendatas siñalatas de Robatibas u besitas  y zilebrazions debán “la Virgen de Ebro”. En Pesquera yiban lo 29 de chunio, fiasta de San Pedro y San Pablo.  Agún no yeran empezipiatas ras fainas d´a cullita y  lis ie bagaba d´onrar á la Birchen.

En a fiasta de San Antonio i mataban una obella y una pirina; y de cochins, t´abé-ne de minchar toda l´añada, en sacreficaban dos, l´auno d´estiu y l´autro d´ibierno.

Pesquera estió un lucar de trachiners qui, amontaus en lurs machos arrecorreban “lo mundo”, en mercando  e i  bendendo zera.

Á la finitiba, muita chen de ro lucar joporon enta Burgos, Torrelavega, Santander, Baracaldo y Basconia.

Güé biben d´o torismo, pos ye una localidá pro besitata merzé á lo Cañón del Ebro.

Lo primer decumén que menta Pesquera d´Ebro ye calendato lo 941, anque se sape que ya yera abitau lo sieglo d´antis, en a repoblanzia d´ista redolada por Alfonso III.  Naxió como pesquera y se´n desembolicó chunto l´estratechico puen sopre l´Ebro, i mantenendo encá güé la suya farcha meyebal.

En o zenso de Floridablanca de 1787, Pesquera apertenexeba á lo siñorío de ro Marqués d´Aguilar.

Desiguida paran cuanta que ro lucar prisenta una mena de casalar meyo espardito, arredol de ro camín prenzipal -esdebenito agora carretera-, en risaltando la carrera de ros Giles.

En os sieglos XVII y XVIII os abitadors suyos yeran más que más fidalgos, lo que ye bistable en o güen faxo de casals linachutos, lo cual que ro lucar ye pleno d´escutos en as suyas fronteras.

07

Portada de una casa con escudos.- Portalada d´un casal con escutos.

En un d´els i leyen ista inscrizión: “Iesús María. Esta es casa de placer i la gente de alegría, Abe María. Año 1712”.

Estieron siedes temporals u perenals de linaches locals u de labradors y ganaders con posibles, pertenexiens á ras famillas de ros Escalada, Gil, Mazuelo u Gallo.

En o cocollo urbán ye ra ilesia parroquial de San Sebastián, ha una sola nau con gualta de cruzería y una capiella de zaguers d´o s. XVI.

Debán de ra portalada de ra ilesia (1.687) ye quillato un pairón meyebal.

08

Iglesia de San Sebastián de Pesquera de Ebro.- Ilesia de San Sebastián de Pesquera de ebro

Como dispidida, se fan bels afotos con unas mozetas  que i quereban aparixer.

09

M. Martín con unas jóvenes de Pesquera.- M. Martín con bellas mesachas en Pesquera.

10

M. Pérez con unas jóvenes de Pesquera. – M. Pérez con bellas mesachas en Pesquera.

Marchan de Pesquera encontinén y, nabesando ra bal de Sedano, continarán por a carretera Burgos-Santander t´arribar en l´Entibo d´Ebro.

  

Lo Embalse del Ebro, tamién anomenato Pantano del Ebro u Pantano de Reinosa, ye un entibo costruyito en l´Ebro ta lo sur de Cantabria, entre la comarca de Campoo-Los Valles y la burgalesa de Las Merindades. O sitanta por zien ye en Cantabria y ro trenta por zien restán, en Burgos. Ye lo terzer entibo de mayor capazidá de ra cuanga d´Ebro, por dezaga de ros entibos de Mequinenza y Canelles.

11

Vista del Pantano del Ebro o de Reinosa (1) .- Ambiesta de l´Entibo de l´Ebro u de Reinosa.

A ideya orichinal de l´entibo estió de l´inchenier madrilenco, de mai aragonesa, D. Manuel Lorenzo Pardo, qui dende lo 1912 calitraba un proyeuto t´aprofeitar millor as auguas de regano en os meses d´estiu, almadazenando-las en un entibaz que replegase as de l´Ebro, lo Virga y lo Proncio.

12

Vista del Pantano del Ebro o de Reinosa (2) .- Ambiesta de l´Entibo de l´Ebro u de Reinosa.

A reyalidá estió qu´en 1947, 540 eztometros cubicos d´augua en 120 kms. de longaria afogón de raso tres lucars: Medianedo, La Magdalena y Quintanilla, y afeztón tamién a Quintanilla de Bustamante, Las Rozas, Villanueva, Llano, Renedo, Orzales, Arija, La Población y Quintanamanil, con más de tres mil bizins dañificatos. Disparexió baxo as auguas toda una mena de bita, l´agundosa bal campurriana con importán numbro de bacumen y caballamen, y mils de triballos debenius de ra endustria.

13 Pantano del Ebro.

Vista del Pantano del Ebro o de Reinosa (3) .- Ambiesta de l´Entibo de l´Ebro u de Reinosa.

As intinzions de Lorenzo Pardo ta iste proyeuto yeran que ras compensazions ta ros afeztaus por l´entibo endi estasen lo más chustas posible, con rebanchas ta ra comarca como costruzión de bibiandas  ta ras chens afeztatas, endustrias en a redolata, trasportes meyán nabiros chuñiders de ras dos marguins de l´entibo, u establimién d´una branca d´o fierrocarril menero de La Robla que plegareba dica Reinosa.

14

Vista del Pantano del Ebro o de Reinosa (4) .- Ambiesta de l´Entibo de l´Ebro u de Reinosa.

Con tó y con ixo, la feitura no estió desembolicata como D. Manuel Lorenzo Pardo la eba calitrada y bian pocas de ras promesas endi plegón á esdebenir; os apoquiñes de ras allenazions se i fízon á ormino con a baluranzia de ras engüeltas de ro proyeuto, apolargando-se-ne dica zaguers de ros años 50, u seiga, más de 20 añatas dimpuesas de i seyer estatas establitas. Con 10.000 pezetas., poca cosa i podeban fer, asinas que se´n quedón sin de tiarras  y sin de diners.

Son plegatas dica ros nuastros diyas ras “Coplas del Pantano”, as ploraderas de ros lucars:

Dicen que nos van a dar, / muy buena indemnización, / más valdría que tuvieran / de nosotros compasión”.

Adiós casa de Campoo, / con sentimiento de olvido, allí te dejo mi recuerdo, de mis abuelos queridos.

Adiós mi pueblo querido, / y toda la vecindad, / que me despido llorando, / no sé dónde iré a parar”.

Ixas compensazions no´ndi estión pro ta poder remeyar la grandiza contumanzia economica y moral que l´entibo ha causato en a redolada. U seiga, lo de perén, en Aragón en tenemos d´apaixitas contrimuestras.

15

Vista del Pantano del Ebro o de Reinosa (5) .- Ambiesta de l´Entibo de l´Ebro u de Reinosa.

L´entibo estió enguerato lo 1952,  magueras seyer estau construyiu entre 1921 y 1945. En as zagueras añadas i emplegoron en a construzión presos puliticos republicans.

Respetibe á l´espleit aztual, lo más importán ye estato lo dople trascole en l´estiu d´un maisimo de 22 eztometros ta ra cuangas d´os Besaya y Pas. Tamián ye de ro más prenzipal a regulazión de l´arriu que se i fa ta los reganos d´A Rioxa, Nabarra, Aragón y Catalueña.

16

Vista del Pantano del Ebro o de Reinosa (6) .- Ambiesta de l´Entibo de l´Ebro u de Reinosa.

En Cantabria b´ha un dito antigo referén á l´Ebro, de cuan Cantabria pertenexeba á Castiella: “Ebro traidor, que naces en Castilla y riegas Aragón”.

Antimás as marguins suyas son una importán padul t´arredol de 3.500 aus que i plegan de ro norte e i son estacheras d´ibierno en l´entibo de l´Ebro, redolada protechita do bi ye biedata ra cazera.

Ye un remarcable cubilar d´ibiernata ta cualques aus, como l´auca, l´aneda chifladera, l´aneda grisa y  lo capuzed gran. D´estibata: zicuañas, esparbels abellers y  autros esparbels. Ne b´ha un miralgüen  plandificato en a torre de Las Rozas y unautro en Arroyo do  poder i alufrar  istas  aus.

17

Vista del Pantano del Ebro o de Reinosa (7) .- Ambiesta de l´Entibo de l´Ebro u de Reinosa.

Lis se fa  tardi, y como Reinosa (Prerromán  REIN y zeltico RENOS, ‘arriu, cursa d´augua’ – ranosa en 1186, renosa en 1250-) ye bian á man, en deziden d´adormir en ista zidá.

Anuncios