7. Fuenfrida. Sierra Pelarda. Santugario de la Birchen de la Silla – Baños de Segura

Continan por l´A-2514 endrezatos enta Fuenfrida, pos quieren biyer ixa contornada d´o naxedero de La Güerba y la Sierra Pelarda, pasan escopetiaus por Rodiella y meya uzena de kms. más adebán plegan en Fuenfrida pero no aturan en o lucar, pos marchan enta lo puerto ta biyer l´ambiesta d´a bal d´o Pancrudo.

Al fondo el pueblo de Fonfría. Ta ro fundo Fuenfría

A lo que son plegando en o cayedero de l´atra bersán, se´n i esbarran por una pista de tiarra -bian atrapaziada- ta plegar enta lo ripitidor.

Vista de la Sierra Pelarda. Ambiesta d'a Pelarda

Dend´astí l´ambiesta ye pistonuda enta la bal dela Güerba y as sierras d´Oriche y Cucalón; manimenos la bal d´o Pancrudo i queda amagata por a pinada. Os Zerris esen quiesto baxar un rated por l´atra bersán d´a Sierra, ta i biyer as ambiestas y l´antiguismo Santugario de Pelarda, pero la tardi abanza y encá lis queda pro de cursa güe; asinas que se´n tornan por do son benitos, dixan ta la dreita lo famoso “Marojal de Pelarda” (selba de “marojos”, anomenazión local de os “melojos” -Quercus pyrenaica- bariedá de caxico de fuella zircunduzidera) y en Fuenfrida se´n esbarran bel par de Kms. dica l´armita d´a Birchen de La Silla.

Lo santugario d´a Birchen de La Silla y la suya Cofradía son estatos lo prenzipal zentro relichioso e identitario d´ista redolada de l´Alta Güerba.

El Santuario de la Virgen de la Silla. O Santugario d'a Birchen de Lasilla.

Lo suyo orichen leyendario ye establito en a donazión feita por Chaime I lo Conqueridor d´a Santa Imachen d´a Birchen que l´alcompañaba en as suyas conquiestas. Asinas lo reculle o Padre Faci: “D. Jaime, al retirarse a su corte de Zaragoza desde Valencia deja la Santa Imagen que siempre llevara con él, como Trono y Silla que se le debía por tantas victorias y favores….” A reyalidá sereba muito más aspra: paix estar que l´armita se plantificó sopre os repuis d´un torreyón de guaita d´a linia esfensiba establita en a zona por Remón Belenguer IV, a metá d´o sieglo XII; iste torreyón y un poblato achunto -que s´espobló a metá d´o sieglo XIV- yeran en a partida de “La Losiella”, de ra que prenioron o nome. En os decumentos antigos se fa referenzia a la pardina u defesa de “Santa María -u Nª Señora- de Losilla” u “Lusilla”; no ye dica primers d´o sieglo XVIII que aparix l´anomenazión de “Nª Sª de Lasilla” (por erratas graficas u corrompizión en a prenunzia).

La parte de atrás del Santuario de la Virgen de la Silla. A zaguera d´o Santugario d'a Birchen de Lasilla

D´ixos tiampos será tamién a creyazión d´a debanmentata liyenda, aprofeitando la gran antigüidá d´una d´as imachens tetulars de ra Birchen -ya dispaixita-. Tamién ye posible que a referenzia a Chaime I endique lo momén d´a creyazión d´o poblato y a ilesia de Losiella, en o sieglo XIII. Asinas se describe en os “Gozos a María Santísima de La Silla” (1.891): “Fuenfría fue muy dichosa / con regalo tan precioso / que el Rey D. Jaime animoso / nos hizo…./ De Cataluña á Mallorca / desde Valencia á Aragón / en la grupa de su arzón / os pasea entre sus tropas / el Principe que os adora / y os aclama Capitana / Madre Virgen Soberana….”.

La Sierra Pelarda desde el Santuario de la Virgen de la Silla. A Pelarda dende o Santugario d'a Birchen de Lasilla

Un decumén de l´Archibo Monezipal de Daroca (seizión “Pastos y Mojonaciones de la Comunidad de Aldeas”), publicato en “Cuadernos desde La Silla” lº 1, pp.15-18, redautato en o lucar de Monforte y calendato en otubre de 1.560, sopre pasturas y amollonazions en os lucars de Bea y Fuenfrida, trata pro amplamén de la “pardina de Nª Sª de Losilla” (la “Comunidad de Aldeas” controlaba muito as pardinas de os lucars, pos en quitaba sucosos benefizios con os “cánones” añals que l´apeitaban os conzellos tetulars de ras mesmas). En iste decumén declaran debán de os comisarios d´a Comunidá d´Aldeyas de Daroca, sopre as pasturas y amollonazions d´as suyas pardinas, Joan Matheo y Cristobal Valero -churatos d´o lucar de Bea- con os testes Domingo Pardos -de Collados- y Marco Valenciano -de Olalla- de la una part, y de l´atra Antón Herrando y Antón Martín -churatos de Fuenfrida- con os testes Marco Valenciano -ya debandito- y Miguel Lop -de Allueba-. Ye un decumén intresán por os toponimos y bels bocables y esprisions i contenitos.

Ista ye ra toponimia que bi aparix, referita a l´amollonazión d´as defesas: DEFESA DE “EL REBOLLAR” (BEA): Colladico de la Haya, Valle de la Hoya, Puntalico La Peña, Cavezo el Tobrero, Partida Las de Miguel,Fuente Los de Miguel, Collado Val de la Fuente, Collado Val de Pallaranco, Prado de la Sierra, Puntal del Arbal de Palancar, La Fuen Ginebrossa, Val de La Penilla, Partida Valmediano, Puntalico de los Sesternelos, La Guerba, Camino de Fuenfria.

DEFESA DE “LA PARDINA DE NUESTRA SEÑORA DE LOSILLA” (BEA Y FUENFRIDA): Hondon de la Cantera de Val de Tello, los Pajares de Losilla, Peña Val de Tello, La Matilla, El Juncar, La Presa de la Carca.

DEFESA DE “LA RETUERTA” (FUENFRIDA): la Loma Gorda, las Navazas, El Menudillo, la Presa de Sancho Ibañez, las Vertientes de Garcia, Val Fondo, Camino de Nueros, la Hoya el Collado, Mojon de la Dehesa Pelarda, La Cruz de los Evangelios(cabezo), Cabezillo de la Presa Bernabe, Cabezo la Torre, Ermita de San Cristobal, la Presa de Joan Ibañez del Escorial, los Mojones de la Dehesa.

Bels bocables y esprisions chocantes de dito decumén: “la valle”, “virtiente”, “dizir”, “la puente”, “defuntas”, “por junto a”, “por recta linea”, “en somo de”, “oido lo esposado”, “a saberes”, “et fecho lo sobredicho”, “dixeron y proposaron”, “la cual dehesa es vedada de leñas a eternas,debaxo las penas y calonias que se siguen….”, “cabezo enta el termino de Godos”…. ezetra.

O primer dominche de mayo se zelebra cada año una romería muito popular en toda la redolada, se´n i aplegan os bizins de Bea, Lagueruela, Allueba, Anadón, Rodiella, El Colladico, Piedrafita, Salzediello y Fuenfrida.

Os Zerrigüeltaires dondían bel poqued arredol d´o grandizo edefizio d´o santugario -d´o sieglo XVIII- que, por lo que se i beye, ye rezién esbiellato.

Monumento a la Virgen de la Silla. Molimén a ra Birchen de Lasilla

Fan bel afoto a l´edefizio, a un molimén-pairón a la “Virgen de La Silla” proxemo, y a los paisaches d´os arredols, más que más a lo parache d´o naxedero de La Güerba, situgato a bels zentenals de metros.

Nacimiento del río Huerva. Naxedero de la Güerba

No lis ne baga de más, asinas que continan biache siguindo agora la cursa de l´arriu Aguasbibas

Edificio cerrado de los Baños de Segura. Os baños de Segura tancaus

–que naxe muito zerquica de La Güerba, pero en l´atra bersán d´auguas- pasando por Allueba, Salzediello y Segura de Baños, do s´esbarran enta lo puerto de Segura ta besitar la Fozde La Zinglade l´Aguasbibas

El río Aguasvivas en la Foz de la Cingla. L'Aguasbibas en a Zingla

y os Baños de Segura (zarratos ta lo publico, pos los son retraziando dende ya en fa d´añatas), fendo-ie cualques afotos.

 La Cingla del Aguasvivas. A Zingla

Dende Los Baños se´n tornan enta Segura, por do pasan sin d´aturar por mancanza de tiampo. A estoria de Segura y a suya baronía estió muito ligata durán sieglos ta la de Güesa d´o Común y la suya Onor (se beiga lo capetulo de Güesa); en a primer guerra calrista ra poblazión enduró rezios asities que li causoron grans esferras. Agora tasamén i quedan 30 abitadors, ye d´asperar que o lucar s´animará pro con a reubertura de Los Baños -que parix proxema- ístos datan d´o sieglo XVIII y han endurato tota mena d´escaizimiens y situgazions de propiedá, espleitazión, ezetra. A los Zerris lo que más lis ha chocato de Segura ye a liyenda local publicata por Pascual Martínez Calvo en o suyo libro “Historia de Montalbán y la comarca”(1.985):

Otra visión de La Cingla del Aguasvivas. Dende atro anglo, a Zingla

A TRISTA ESTORIA D´UN PASTOR – AIMORS QU´AMORTAN

“Escaizió en Segura en a partida de Prau Sancha, güé Prusancha; en fa cualques 4OO añadas d´ixe feito. A tradizión ye plegata dica d´agora. Os biellos l´ascuitoron a los suyos güelos y asinas-asinas. Blasco Ibáñez lo menta en “Cañas y Barro”. De seguras que os segadors qu´en beniban de Balenzia ta istos lucars se´n portioron t´astá la falordieta. Dica las añadas 30 en son benitos.

 

Ye asinas: lo Prau de Sancha ye un planizo que se´n espinga d´a pinada enta Segura. Un chulet i cusiraba lo suyo rabaño. Por bel diya se i trobó una cullebreta y li´n furniba de leit en o suyo cozio. S´entreteneba de firme chugando con ela. Nomás i plegar, la clamaba: -“¡Sancha, Sanchica!”. Y la sirpién s´esbarizaba con suabeza enta lo suyo amiu. Crexioron os dos. A lo pastor li calió marchar t´a “mili”. Tardó a ritorná-ne bellas añadas. Plegaba goyoso, feito un beterán, en biyer la tiarra d´a suya nineza.

 

 -“¡Sancha, Sancha!” chiló lo pastor por cualques begatas. No guaire dimpués sintió un sorollón en os chuncos y biyó remená-sen as matulleras. Cualcosa rezia se i bochaba. De sopetón, s´alticamó debán d´una desinforme sirpién qu´abanzaba escusera enta él. Li se fizió fereda, pero en zagueras se´n confitó. ¡Seyerá ela!.

 

-“¡Sancha!”, dizió bel poqued esfuriau, reculando un siñalín. -“¡Quiénto has medrau!…. ¡Quiénta grandota yes!”. Ela li reconoxió, amanando-se-ie escopetiada. Él yera en un tris de fuyí-ne. ¡Pero yera ela!. Os dos se catoron fito-fito y a l´inte se´n agoyoron.

 

Ela -de seguras qu´endelerata- se´n rezingló ta os güembros d´él, estreitando-li con tantos d´alinios que lo pastor prebaba de fer esforzillons ta esligamá-se-ne: -“¡Floxa, Sancha, floxa!. No me t´acarrazes. Yes masiau grandiza ta istos chuegos!!”. La sirpién l´afalagaba, como n´atros tiampos.

 

Entre que os aniellos se´n i acurrupiban un escaldafrido angunioso arrecorrió lo suyo cuerpo, cayendo a la fin afogato, embolicau por os aniellos d´ela.

 

Uns pastors i plegoron en sentir os chilos, trobando-lo ya calabre, con os güesos estrochinaus y a carne moratoniada por a fortal abrazada de Sancha.

 

Ista se´n fuyó, debán d´os escazilos de os pastors, enta l´atalpida pinada.”

La Foz de la Cingla del Aguasvivas. A Foz d'a Zingla

Os Zerrigüeltaires continan biache enta Bibel d´o Río por a carreterica que sigue a cursa de l´arriu Segura, un d’os  prenzipals furnidors de l´arriu Martín.

Anuncios