6.3. Güesa d’o Común. Rebiesta “Ossa”. Julián Mercadal

Dimpués d´aber trachinau de firme por os paraches d´o Castiello, baxan ta Güesa y tornan ta l´auto.

Vista de la zona del río. Ambiesta d'a zona de l'arriu

Como ya escomienza a dar-li lo sol deziden de marchar enta par de l´arriu, a ista ora ye difizil trobar guambra ta l´auto pero a la fin consiguen dixar-lo a la fresca.

Vista de la vega y del parque. Ambiesta d'a bega y o parque

Se´n pillan as bituallas y marchan ta lo nuabo parquetico -a lo canto de l´Aguasbibas y d´o puen d´a carretera- perfeutamén equipato con cadieras, bancadas, fogarils de barbacoda….

Puente sobre el río Aguasvivas. Puente sobre l'Aguasbibas

minchan con güena ganica a la mosquera de bels arbres y afotían os arredols.

El río Aguasvivas. L'arriu Aguasbibas

Por bels retulos esplicatibos s´enteran de ra esistenzia proxema de zonas de biya ferrata

El Parque junto al río Aguasvivas. Chunto al Aguasbibas

en a bersán sur d´a Peñaflor, tamién i son endicatas las cursas enta las fozes de l´Aguasbibas -arriu entalto y pasando por a zona de l´Almadeo-.

Zonas de vía ferrata junto al parque de Huesa del Común. Bías ferratas chunto a lo parque

Marchan de sobremesa ta lo bar (ye n´o mesmo edefizio d´a Casa la Billa), do preguntan por a rebiesta y la mercan. Tamién lis ne amuestran d´atros lumers y lis esplicotian que antis más la Casa la Billa yera lo palaz d´o “Siñor de la Bota”; lo bar ye estato feito en a zona de l´antiga garchola, lis ie amuestran una rinconada do s´han conserbato bels elementos d´a mesma, como lo bocallo en o teito por o que feban baxar os presos dende la estacha superior, retirandolis-ne dimpués a escalera de fustas, y bel armiellón con estrinques t´agafarriar-ie a os más periglosos u i punitos asprés.

Uno de los muchos arcos que hay en Huesa. Una d'as muitas arcadas que bi ha en Güesa

Reyalmén chocante tot. Comentan istas cosicas con l´encargato d´o bar qui lis diz que, anque con poqueta poblazión, Güesa se´n ba animando con o torismo rural y os escorsionistas; tamién lis recomienda que besiten a pachina güeb d´a billa, con muitas enformazions d´intrés cultural (alfarería, repuis arquioloxicos, falordietas replegatas por Arcadio de Larrea, lesico local….) Esfuellarrían una miallica la rebiesta qu´han mercato: se trata d´a redizión d´una liyenda d´ambién meyebal sopre l´Almadeo, publicata por Salbador Gisbert -escritor d´ista redolada espezializato en temas estoricos-  en o “Diario de Teruel”, en 1.901; encontinén se i fa un analís estorico d´a liyenda y as rilazions d´ista con a toponimia y a tradizión oral güesina; en zagueras se fa una descrizión de ros afotos d´o disco preto sopre “El Almadeo y su entorno” encluyiu en a publicazión. Un gran triballo lo de l´asoziazión “Castillo de Peñaflor” en iste y atros lumers d´a rebiesta “OSSA”.

Una gran casa de Huesa. Un casalaz de Güesa

Se dispiden d´o mesache d´a tabierna y a lo qu´en salen, beyen a un biello posato chunto a un arbol en una bancalada d´o petril d´a carretera, mirando-se-ie lo paisax d´a bega y a foz de l´arriu. S´aplegan enta él e i fan una charradica; iste siñor se clama Julián Mercadal Muniesa, de 76 añadas, ye de Güesa y b´estió pastor de chóben, lo cual que -magueras aber bibiu muito tiampo difuera- se´n alcuerda pro de ros nomes d´a toponimia local. Istos son os qu´en remeraba n´ixe inte:

EL ALTO EL CERRO, LAS PIEDRAS DE LAGUERUELA, LA UMBRÍA ROYALES, LA UMBRÍA DEL COSCOLLAR, EL ALMADEO, EL MARCUELO, LA PLANA JAIME, BIRBIS, LAS FAZERAS, BALDORIA, EL MAS DE ROMANOL, L´AGUILA, LAS LOMILLAS, LA PIEDRA BLANCA, LOS POZOS, CAÑAMONTERO, LA SOLANA LA CAÑADA, COSCOLLAR, BALDELAZÚ, BALDORNOS, ONZILLO, LOS ALIAGARES, LA SANCHA, AYERNA, LAS PLANAS, EL LLANO, EL PLANO FRANCHONES, LA REBALBA, CANTUEL, EL MOLINO PLOU, MARINETA, EL REGALLO LA SOLANA, LOS BATANES, EL MOLINAR, MODEL, LA VEGA, SAN MIGUEL, LOS VALLES, LA CABRERA, LA SALARILLA, LA HOYA CORBA, VAL DE MONTALBÁN, LA LONGUERA, LAS FUENTES.

Julián Mercadal Muniesa de Huesa-Güesa del Común.

Tamién remera bels motes güesinos:

Los Carmelos, los Forrajeros, el Francho, los Ríos, los Cartagenas, los Juan-Ramones, los Lerines, los Reinos, los Cantareros, los Sauras, los Redondos, los Diegos, los Faustos, los Flores.… Li fan un afoto a siñó Julián y se´n dispiden d´él agradixitos; s´amontan en l´auto y antis de marchar pasan por casa de siñá Felisa ta tornar-li l´exemplar d´a rebiesta que tan aimablemén lis eba dixato, asinas que i segundían unatra begata os agradeximiens y dispidida.

Anuncios