6.2. Güesa d’o Común. Espuntes Estoricos

Güesa d´o Común ye una billa de tasamén un zentenal d´abitadors agora, radita poblazión en contimparanza con a que tenió antis más, cuan yera la capeza de la ONOR DE GÜESA, entidá feudal tipicamén aragonesa en a que s´aplegaban – antimás d´a billa- lo suyo Común: os lucars y aldeyas de Anadón, Blesa, Cortes d´Aragón, Yosa, Maicas, Muniesa, Plou y Sanchet. Más adebán se´n i achuntoron Segura y Salzediello. L´anomenazión popular ye “Señorío de la Bota”.

Vista de Huesa del Común. Ambiesta de Güesa

Posible toponimo preinduropeyo, anque tamién poderba tratar-se d´o latín FOSSA, referito a la escabonazión que fa l´arriu Aguasbibas en a siarra bizina.

Aldaba de una puerta. Manillera de una puerta

Mentata a ormino en o “Cantar del mio Cid” como “Ossa”: “Entonces se mudó el Cid / al puerto de Alucat / dent corre mío Cid / a Ossa e a Mont Albán / en aquesa corrida / diez días ovieron a morar”. Dinantis d´a reconquiesta crestiana debió d´apertenexer -como Montalbán- a la taifa de Saraqusta. Hisn Warsa ye o nome mozleme.

Aldaba curiosa. Clamador chocante

Lo castiello debió d´establir-se sopre l´anterior d´os moros, en os sieglos XII-XIII. De risultas d´a Baralla de Cutanda (1.120), en as añadas siguiens se´n fazioron grans abanzes conqueridors por todas as bals d´a marguin dreita d´Ebro.

Vista de Huesa del Común camino del Castillo. Ambiesta de Güesa camín d'o Castiello

Por aquelas engüeltas Galín Sanz -tenén de Belchit- remuntó con la suya milizia la bal de l´Aguasbibas (Al-bayar), plegando a conquerir la redolada de Güesa, que tornoron a perder -como muitos atros territorios- dimpués d´a redota de Fraga (1.134), cuan i espiritó Alifonso lo Barallador. No se torna a recuperar dica las arrecometidas furiconiadas por Remón Belenguer IV, Prenzipe d´Aragón, enta 1.150.

El Castillo de Peñaflor y las rocas de la Sierra Oriche. O Castiello de Peñaflor y as rochas

Merinato de Tergüel en 1.295, de Zirigoza en 1.321, Sobrecullida de Montalbán (1.488-1.495), Sesma de la Honor de Huesa -inclusa en a Comunidá d´Aldeyas de Daroca dende 1.626, “Vereda” de Montalbán (1.646), “Corregimiento” de Daroca (1.711-1.833). Tien Achuntamién dende 1.834, pertenexió a lo partiu chudizial de Montalbán, dende 1.965 a lo partiu chudizial de Calamocha.

Vista desde el castillo. Ambista dende o castiello

Cambeyos de propiedá:

Yera de reyalengo entre 1.154 y 1.174, con tenens. A metá d´o sieglo XIII Chaime I endona lo castiello y billa de “Osa”, con as suyas aldeyas y pertenexenzias, a Pelegrín d´Atrosiello (a trucas d´una deuta pendién).

M. Martín, abajo Huesa del Común. M. Martín, abaxo Güesa

Güesa d´o Común y as suyas aldeyas s´achuntoron ala Unión d´os Noples lo 19 d´otubre de 1.283. En 1.295 tornaba a estar de reyalengo. A l´empieze d´o sieglo XIV pertenexeba a Artal de Huerta.

En el castillo de Huesa. En o castiello de Güesa

Por ixas mesmas engüeltas lo Común de Güesa eba alcanzato gran importanzia pulitica, asinas lo contrimuestra la ripresentazión en Corz d´Aragón que i teneba: un churato por os infanzons, dos por os labradors y tres bizins por as aldeyas.

Lo 1.328 Alifonso IV bendió la Onor de Güesa a l´Arzebispe de Zirigoza, Peiro de Luna, por 160.000 sueldos, con os que finanzió lo suyo casorio con a infanta Alionor de Castiella.

M. Martín en un precioso paisaje roquedal. M. Martín en un poliu paisax de peñers

Dita posesión ye emologata por Peiro IV lo Zirimonioso y eredata por Lope de Luna en 1.346 qui, lo 1.358, la dixará en erenzio a la suya filla María de Luna (maridata dimpués con Martín l´Umán, de risultas en esdebinió raina y una d´as mullers más poderosas d´a estoria d´Aragón). Lo 1.409 encá yera de María de Luna.

En febrer d´o 1.430 Alifonso V ordinó que s´acupasen lo castiello y billa de Güesa, que pertenexeban por aquelas engüeltas a Fedrico de Luna; tot isto de risultas de l´enfrontinamién d´o Casal d´os Luna con os Trastamara, nuaba dinastía reinán en Aragón dende lo Compromís de Caspe.

La torre de la iglesia de Huesa del Común. A torre d'a ilesia de Güesa

En chaziambre de lo 1.438 Alifonso V rende la Onor de Güesa y baronía de Segura a Chuan d´Olzina -lo suyo secretaire- a trucas de 34.000 florins d´oro.

En chunio de 1.456 Alifonso V ordinó fer os manefizios consonans t´acorporar la Onor de Güesa entala Corona. En chulio de 1459 Chuan II ordina que se faiga luyizión de Güesa, pero en 1463 encá yera de Chuan d´Olzina -u Alzina- seguntes os decumens.

M. Martín delante del castillo de Huesa. M. Martín debán d'o castiello de Güesa

En nobiambre de 1.486 Güesa ye mentata como acorporata enta la Corona, con tot y con ixo, en agosto de 1.503 os omes d´a Onor de Güesa renden 70.000 sueldos a Ferrando II, por la suya acorporanzia ta la Corona. Pero lo rai teneba muitas deutas con os suyos ampraires -chodigos combersos- y la Onor de Güesa quedará en mans d´uno d´istos, y antiparti tresorero reyal, mosen Luis Sánchez de Santángel. Encá lo 1.519 Carlos I emologa -de seguras que a trucas de cualcosa- la posesión de la Onor de Güesa y baronía de Segura a Luis Sánchez, con tal que lurs abitadors se´n podesen luyir (a pur de diners, pro que sí). Y con pleitos, prebatinas de luyizión y atros escaizimiens pasarán tot lo sieglo XVI, dica que con o forachite d´os moriagos -y consiguién espoblazión- dixen d´estar un mueso apetezible economicamén; aconsiguindo a la fin estar acorporatos ta la “Comunidad de aldeas de Daroca” lo 1.626, consiguindo d´allora enta  debán estar de reyalengo ta cutio. Lo castiello de Güesa (Castiello de Peñaflor) tenió alcaides reyals dica 1.702.

M. Martín en el castillo. M. Martín en o castiello

D´a puenda contemporania lo más remarcable ye: os crudels enfrontinamiens abitos en istos lucars durán o “Trienio Constitucional” y lo dominio d´a fortaleza de Güesa por as tropas d´o cheneral Cabrera, en 1.838, mientres a 1ª guerra calrista.

¡Qué grandes son los muros del castillo! Qué grans son os murs d'o castiello!

Esboluzión d´a poblazión: 151 “maravedís” (1.409), 181 “fuegos” (1.488), 243 fuegos (62 crestians y 181 mozlemes) (1.495), 159 fuegos (1.510), 159 fuegos (1.543), 243 fuegos(1.609); moriagos forachitaus: 123 casas, a 5 endebidos: 615 presonas (1.610). 116 fuegos (1.646), 125 “vecinos” (1.713), 60 bizins (1.717), 60 bizins (1.722), 60 bizins (1.787), 196 bizins (1.797) -espeitacular crexita, a no estar que seiga error por “abitadors”-; 150 casas, 159 bizins y 636 animas (Madoz), 949 abitadors (1.847??), 333 abitadors (1.970).

Anuncios