6.1. Güesa del Común. Besita. Castiello

25 – V -2.010. Ixen de Zirigoza de güen maitín por a N-232 con destín Güesa del Común. Dimpués de Lo Burgo d´Ebro se´n esbarran t´a dreita por l´ A-222; pasan por Meyana, Belchit, Lezera y aturan un inte a lo canto Muniesa t´afotiar a mañifica ambiesta d´o lucar. Iste ye presidito por a molimental torre mudéxar d´o sieglo XVI de ra ilesia de Nª Sª de l´ Asunzión, Molimén Nazional dende 1.931 y Patrimonio d´a Umanidá por a Unesco dende 2.001, en estar par entegrán d´o Mudéxar d´Aragón.

Torre mudéjar de Muniesa. Torre mudexar de Muniesa

A torre mudéxar de Muniesa tien 55 mts. d´altaria, zinco cuerpos de ladriello de diferiens grandarias y con decorazions mudéxars politismas en cadagún d´els; ye a unica güeitogonal d´a probinzia Tergüel, estando as suyas trazas pro paixitas a las de ra torre d´a Colexiata de Santa María de Calatayú.

Continan camín y chusto cuan beyen o lucar de Cortes d´Aragón, antis de plegar-ie, se´n esbarran por l´ A-2514. Pasan escopetiaus por Plou y desiguida beyen una bogal ambiesta cheneral de Güesa; tánto lis cuaca que aturan un inte ta fer-ie cualques afotos d´o lucar con o suyo imposán castiello enta lo fundo.

Vista de Huesa del Común. Ambiesta de Güesa del Común

Reprenen la marcha entre que M. Martín li comenta a lo suyo Tocayo cuála ye a prenzipal enchaquia ta besitar Güesa del Común: risulta que 30 añadas ta zaga M. Martín teneba un compañer de triballo, clamato Luciano Yus, que yera d´iste lucar; magueras a esferenzia d´edá (Luciano yera sisanteno, entre que lo nuestro Zerri solamén benteno) i feban pro güena pacha: M. Martín remera de Luciano Yus -amás que yera muito triballador y güena presona- lo suyo neto carauter aragonés, en o charrar y en as trazas, y tamién que li rezentaba cualques cosicas de Güesa, más que más que i teneban un molimental castiello “de los tiempos de los moros” que se comunicaba con o lucar por sotarraños; mesmo, Luciano aseguraba aber dentrau por beluns d´istos tunels cuan yera nino, pero no muito ent´aintro pos “s´habían enrunau”.

Atro detalle d´o qu´en fa alcordanza M. Martín ye que, como por aquelas engüeltas (1.980) ya chapurriaba l´aragonés rezién aprendito, a begatas lis ne feba bel charrazo a ros compañers, y Luciano l´iziba: “me gusta mucho la FAULA y muchas palabras de las que dices las usábamos en el pueblo”; a M. Martín li chocaba perén ixo de “FAULA”, más adebán en podió comprebar qu´ixa yera l´anomenazión cutiana d´a fabla aragonesa por tiarras tergüelanas (lo menos en a zona zentral d´a probinzia y entre as chens de más edá).

Arriban en Güesa y rechiran alparcamién en guambra, pos o sol escomenzipia a i pretar ya. Nomás dar as primeras garradas s´escunzan a dos mullers en a carrera Mayor, con qui comentan a güena farcha d´o castiello; a fabladera se´n i enzerringla ascape, lis izen que o siñor d´o castiello yera un tirano y “tenía drecho de pernada y todo”; a la fin, una d´istas siñoras lis proposa que l´alcompañen ta casa suya, t´amostrar-lis-ie una rebiesta local. Ista siñora se clama Felisa Herrero; lis fa pasar t´aintro de casa do i beyen lo fogaril y li demandan premiso t´afotiar-lo, asinas como unas estenazicas que lis amuestra que lis diz que fazió lo suyo pai qui -prezisamén- yera ferrero.

Dos tenazicas hechas por el padre de Felisa Herrero, que era como el apellido. As tenazicas en custión

Lis amuestra la rebiesta OSSA (nome antigo de Güesa), se trata d´un lumero monografico adedicato a “El Almadeo” -que ye la zona d´o termino de Güesa situgata dezaga d´o castiello-; os Zerris esfuellan una mialleta la rebiesta y paran cuenta en o suyo intresantismo conteniu, asinas que li preguntan a siñá Felisa si ye a la benda. Lis risponde que la fan os de l´asoziazión cultural local “Castillo de Peñaflor” y que pregunten en o bar; ta sospresa gorda de ros Zerris lis diz tamién que se´n portien la rebiesta, que ya li´n tornarán dimpués cuan en aigan consiguito unatro exemplar u s´aigan apuntato lo que lis intrese…. debán d´ista amostrazión de confitanza y amabilidá, os Zerris li quedan bian agradixitos y amás li proposan afotiar-la, pero ela lis diz que no. Como los Zerris i porfían cutios, la suya rispuasta agora ye: “p´hacer algo a repelo, más vale no hacélo”, adibindo: “es que a los hijos no les gusta que me retraten”.

Tamién M.Martín li pregunta por Luciano Yus, esplicotiando-li de qué lo conoxeba, y siñá Felisa li diz que fenezió ya en fa d´añadas (lochico, pos d´estar bibo agora sereba nobanteno). Ta rematadura lis nombra bels toponimos urbanos de Güesa: la Replazeta de l´Arrabal, los Arcos de la Virgen del Pilar, del Recogedor, de la tiá Manga (“ande está el bar”) y de la Posada, y la “Puerta de los Señoritos”.

Marchan por as carreras de Güesa siguindo as endicazions de siñá Felisa; a cursa enta lo bar lis enfila por o zentro d´a localidá, lo cual qu´aprofeitan ta yir biyendo as prenzipals carreras con antigos casals, en beluns encá i son os blasons u escutos de linache;

Escudo de piedra en la fachada de una casa. Escuto de piatra en a frontera de una casa

tamién lis chocan os baldorros u trucadors de bellas puartas. Pasan por o “Portal del Este”

Portal del Este. Portiello de l'Este

y desiguida arriban en o “Portal dela Virgen María”, meyebal, con tres arcos apuntaus

Portal de la Virgen María. Portiello d'a Birchen María

y un cuarteno un poqued más adebán, por o que se dentra en a plaza Mayor.

Bonito rincón de Huesa. Polida cantonada de Güesa

Astí lo más remarcable ye a biella Casa La Billa, que la son esbiellando y atrapaziando amonico dende fa bellas añadas. Os dos Zerris ban parando cuenta en que Güesa del Común ye una billa con muita entidá estorica y arquiteutonica, y ban afotiando ros detalles d´os casals que i troban más retantadors: trucadors, bella finiestra enrellata, la puarta d´o biello Achuntamién, bel baxorelieu majizo en una fuen….

La puerta del viejo Ayuntamiento. A portalada d'o Conzello

Tal y como lis eba endicato siñá Felisa, dende ra plaza se´n esbarran ta ra dreita por un biscalamo que da ta ra zaguera d´a Casa la Billa, en do ye a tabierna; pero en cuenta de i dentrar, lo se repiensan bella miajica, dezidindo en zagueras dixar-lo ta dimpués de chintar. Entremistanto, ta fer tiampo y ganica, se´n puyarán ta lo Castiello.

Iglesia y Castillo de Huesa del Común. Ilesia y Castiello de Güesa

En primeras pasan por a ilesia parroquial de San Miguel, d´estilo barroco y de prenzipios d´o sieglo XVII; tanto la suya frontera como la espigada torre son de ladriello, con enfluyenzias mudexars más que más en a torre, que prisenta tres trampos de diferién morfoloxía cadagún. Ban ixindo d´o casalar urbano y pasando por una zona de parideras, corralizas y bodegas, entre que rechiran lo millor camín ta puyar la costera que mena ta lo castiello;

Puerta de entrada a una bodega. Entrador ta una bodega

lo troban a la fin, ye una sendereta chicorrona que lis mena por un cantimplano más y más encosterau, plenizo de tasca y floreticas primaberals. De cuan en cuan se´n chiran t´alufrar o casalar de Güesa y, a lo que son en un tris d´arribar en o castiello, escomenzipian a afotiar-lo tot:

12 M. Martín, abajo Huesa del Común. M. Martín, abaxo Güesa

os murs d´a fortaleza, l´esbiellato neberón a lo canto d´o fosal -bel siñalín ixapartau d´a poblazión-,

El neverón restaurado. O neberón esbiellato

l´ambiesta cheneral d´a billa, as rochas d´a Sierra Oriche, o paisax d´a redolada….. Encá i serán dondiando güena ratera entre os murs d´o rezingle y a man d´os torreyons, cucutiando-ie enta lo xerbigadero d´a foz de l´Aguasbibas y as muitas partidas y cambos de l´Almadeo.

Anuncios