5.1. Camino del Plano (Cariñando lo Tiampo Fuyito)

Dende ra frontera d´o Monesterio de Santa Fé -do eban alparcato- os Zerris enfilan l´auto por o camín que han chusto enfruén, lo Camino del Plano, que comunica Cuarte de la Güerba con o debandito monesterio. Iste camín acupa un puasto falenzial en as alcordanzas y bibenzias chobenils de M. Martín, como se biyerá siguidamén.

Enmedio el chalet familiar del Camino del Plano. Años 80.  En meyo lo chalé familliar d’o Camino d’o Plano. Añadas 80

A l´empieze d´a decada de ros 70 de ro pasato sieglo lo pogreso economico apremitió lo desembolique d´as napas meyas en a soziedá española, qu´achuntarán a ros suyos orichens rurals, a bitaleza, a empenta esbielladera y as demandas de satisfaizión d´as nuabas nesezidaz que ra dinamica sozial i alportaba. Asinas, se´n ban estendillando entre a poblazión tota mena de modernidaz y alantos teunolochicos qu´enfurnen o pogreso endustrial, d´o seutor serbizios, ezetra: tilibisors, eleutrodomesticos, bibiandas más confortables, y un traste rebolizionario: l´auto famillar, u “turismo”. Con iste, as chens aduben a nuabas posibilidaz simprexinables ta ras chenerazions anteriors: libertá de mobimiens. Os cabos de semanata ras famillas, a bordo de lurs “utilitarios”, marchan escopetiaus a fer escorsas por os arredols d´as grans zidaz, u ta ros lucars de promananzia; se cheneralizan as bacanzias estibals en a placha u en o lucar.

Explanada del Camino del Plano donde tiraba la Barra Miguel Ángel Martín. Años 80. Planeta d’o Camino d’o chitaba a Barra Migalánchel Martín. Añadas 80

Istas escapatas e bonanza economica menan, por lochica, ta ro siguién trango: apañar a casa d´o lucar u fer-se con una “segunda residenzia” difuara d´o”zurrumburrún” d´a gran zidá. Asinas que bétemé ra familla Martín-Pardos enta 1.970, con lur “saiszientos” biachotiando ros cabos de semanata por os arredols de Zirigoza, como güens y mudernos “dominguers”. Dica que bel par d´añadas dimpués lis se prisenta ra mingala de mercar un “terrenico” con caseta y alberchers en o Camino del Plano de Cuarte de la Güerba.

Ixe terreno esdebiendrá amoniqued en as añadas siguiens un chaled con peszina, chardín y gorted; cumplindo doncas totas as requestas d´a mentalidá chiqueburzesa imperán.

Miguel Ángel Martín ¡barba-ridá!. Año 1976. Migalánchel Martín ¡barbaridá! Añada 1976

Anque M. Martín colaboraba -de millor u piyor implaz- en as buxadas famillars esdebenitas en o “terreno”, lo que más li cuacaba yera marchar petenando con os “escaus” u, cuan yera “en el terreno”, por os camins y paraches d´a bega de la Güerba, por Santa Fé, u por os mons de Cuarte y Cadrete. Andipardi, china-chana, ra familla yiba fendo nuabas conoxenzias entre os bizins d´atros chalez y tamián bels ortolanos d´o mesmo Cuarte. De toz istos, lo presonache más chocante que i conoxioron estió lo siñor Blas, más conoxito como “el tió Mazipe”, un cuartano qu´eba lo güerto zerquica dela Güerba, una miaja retirau d´o Camino del Plano, pero que M. Martín ascape “contautó” con él en as suyas andatas. Antimás, siñó Blas i daba notorio ascape por tota la redolada con a suya fortal y carauteristica boz de baturrico charraire y falordiero.

Los abuelos Fulgencio y María y los padres de M. Martín en Cuarte, hacia 1973. Os yayos Fulgencio y María y os pais de Migalánchel Martín en Cuarte, enta 1973.

Los abuelos Fulgencio y María y los padres de M. Martín en Cuarte, hacia 1973. Os yayos Fulgencio y María y os pais de Migalánchel Martín en Cuarte, enta 1973.

El chalet completo. O chalé entegro.

A partir de 1.975 -cuan estió feita ra estacha baxa de ro nuabo chaled de ros Martín- ya podeban fer mallata os cabos de semanata en o “terreno”; allora paroron cuenta en que no´n amenistaban pon de rebel ta lo dominche pos, de güen maitín, lo bozarrón d´o “tió Mazipe” lis ie feba onra ta espabilar d´un prontinazo….

Domingo, Oscar y M. Martín desayunando en el porche del chalé de Cuarte, hacia 1975. Domingo, Oscar y Migalánchel Martín desayunando en o porche d´o chalé de Cuarte, enta 1975

Domingo, Oscar y M. Martín desayunando en el porche del chalé de Cuarte, hacia 1975. Domingo, Oscar y Migalánchel Martín desayunando en o porche d´o chalé de Cuarte, enta 1975

Claro que li´n desincusaban desiguida istas chiquetas “tacas”, pos yera un bielled con muito güen chenial, rozero, rajante y serbizial, perén disposau a aduyar u aconsellar sopre cualsiquier custión y gran “pillador de capazos”; pero lo que más li chocaba a M. Martín yera las suyas trazas de fablar, postau que por ixas engualtas se´n yera abezando a ros temas aragoneses -inclusibe ros lingüisticos- y paraba más y más cuenta en as fabladeras de ra chen d´edá; lo cual que se´n quedaba embazilau ascuitando a siñó Blas: “jada”, “falz”, “glarímas”, “el rete”, “mientres”, “El Aseo de Zaragoza” (güello!!: en decumens meyebals ya b´amanix asinas), “veraniar en Salau” u “l´han dedicau una plaza al poyeta d´este pueblo” (se referiba a Luciano Gracia Bailo (1.917-1.986), d´o grupo poyetico “Niké” -como Miguel Labordeta, Rosendo Tello….- que M. Martín ya conoxeba por leturas en a rebiesta Rolde) yeran belunas de ras “pelras cautibatas” que lo tió Mazipe emplegaba a ormino en os suyos charrazos y retolicas.

Dimpués d´o parentesis d´a “mili”, que fazió “boluntario” a los 18 años, lo nueso zerrigüeltaire ya yera esdebenito un aragonesofilo de cudiau. Agora ya chapurriaba l´aragonés rezién aprendito (plegaba de contautar con os mesaches d´a Colla Chobenil d´a Fabla), s´eba conduzito a las rebiestas Rolde y Fuellas, cantaba xotas a ormino y -de risultas d´o que li rezentaba lo tió Mazipe- s´eba afizionato a tirar la barra…. remató por marchar asprés ta Calatorau a mercar-ne una e ya lo tenebas por os escampaus d´o Camino del Plano fendo sesions de tiradas, a begatas alcompañau por Mazipe qui -50 añadas más biello- no se i dixaba “mullar la orella” ni en estilo ni en longaria de tiro….. Correban l´año 1.980 y siguiens… que se´n espelurziaban!!.

Anuncios