4.1. Monesterio de Santa Fe (Edá Meya)

Continan por a carretera Balenzia enfilaus ta Zirigoza, sobrepasando l´esbarre de Cadrete ta dentrar por o de Santa Fe. Alparcan debán mesmo d´a puarta d´a muralla y alufran a suya frontera, en a que bi ha un escuto con as inizials “S.F.” y as barras d´Aragón; chusto denzima d´iste, un ome-boque mitolochico -con chiquez cuarnos y grans orellas- portia en o suyo peito ra calendata de feitura: 1.797, pero lo suyo orichen en recula muito más entazaga.

Portada de entrada de la muralla de Santa Fé. Portalada de l'entrador d'a muralla

A estoria d´iste monesterio ye estreitamén enzerringlata con a de ros dos lucars bizins, Cuarte y Cadrete. Istos eban conserbato ra suya poblazión mozleme dimpués d´a reconquiesta, como en atras muitas localidaz, pero as tiarras eban pasato ta tenenzia -y dimpués propiedá- de ros chefes de l´exerzito y as Ordens Melitars. En o caso d´istos dos lucars en serán os prenzipals siñors feudals o linache de ros Zapata y a Castellanía d´Amposta de ra Orden de San Chuan de Cherusalén, dica que a metá d´o sieglo XIV  Miguel Pérez Zapata dona a ra Orden d´o Zistel todas as suyas posesions en os dos lucars y funda lo Monesterio de Santa María de Santa Fe, poblando-lo con os monches tresladatos dende l´abadía de Fonclara, en a zona d´a Zinca. D´allora entadebán iste monesterio esdebiendrá lo prenzipal propietario de Cuart y Cadret, y as alchamas de moros de ros dos lucars quedarán chusmesas a lo suyo dominio feudal.

En os zinco sieglos d´esistenzia d´o monesterio lo prenzipal poblema qu´abrá a endurar será l´enfrontinamién con a zidá de Zirigoza, ra suya fortal Casa de Ganaders y os poderosos tiarrateniens zirigozanos con propiedaz bizinas a lo monesterio. Ye agundán a decumentazión conserbata a iste rispeutibe, con continos pleitos, sentenzias, concordias y pautos que ascape tornaban a estar malentrepetatos u crebatos de feito, lo que cheneraba nuabas plaitinas, desabinienzias, negoziazions, sentenzias y concordias; como se puede liyer en o “Diplomatario de la Casa de Ganaderos de Zaragoza”(se beiga ra Bibliografía).

Asinas, por exemplo, a concordia de zaguers de 1440 entre lo “capitol et consello” de la zidá y “el reverent abat e monges del monasterio de Santa Fe e sus vasallos del lugar de Quart” por a que s´emologaba lo tradizional dreito d´o conzello de Cuarte a meter “oficiales e messegueros” que puedan “penyorar los daños e calonias” produzitos por ganatos foranos en as eredaz de dito monesterio y chens de Cuarte “sitiadas dentro las partidas siguientes” (d´o termino de Zirigoza):

“…es a saber por las heredades que son de la Atalaya de Quart enta suso enta la Torre Mocha la loma adelant como dizen las vertientes de las valles enta la Huerva, et passado el río compezando al puent de las Taluentas et traviesa al vall de Sant Felipe como puya el camino de La Torrezilla a Zaragoza por las alcantarillas et salle a la puyata de los Artos et de allí traviesa a la peña Fumienta et por el mas del Romeruelo, et de allí avant torna al dito camino de La Torrezilla por la Covatiella a suso como vierten las aguas…. puedan penyorar los ditos mesegueros los ganados et bienes de los dantes tales danyos  o tales calonias incorrientes do quiere que sian dentro en los terminos de Zaragoza exceptuado de la Caseta Roya que esten al termino de La Almotiella et va dreyto a la Forca tapiada enca la part de los muros de la ciudat do no puedan penyorar…”. Con as albertenzias de que no podrán enamplar lo territorio de churisdizión cuartana, asinas como “…. que los sobreditos uso dreyto et possesión duren tanto quanto el dito lugar de Quart sea del dito monasterio et no mas avant ni en otra manera… por la present concordia en caso que el dito lugar de Quart se alienará et exirá del dominio del dito monasterio no sea en res perjudicado el dreyto…. antes la dita ciudat finque en aquella posesión e dreyto  que era ante que la presente concordia se fizies….”.

Son chocantes tamién os nomes d´os “moros de la aljama del lugar de Quart” achuntatos bels diyas dimpués en o castiello de Cuarte t´ascuitar a letura d´a debandita concordia:

“Alí Perdigón alamín, Amet de Lopa, Alí el Royo jurados, Alí Villafranca, Zalema el Fiero, Zalema el Barco, Lop de la Puerta, Mahoma de María, Farrax de la Zalema, Alí Mormedio, Alí de Espada, Lop de Oliet, Frarrach de María, Alí de Grafiel, Alí Dalhag, Mahoma Abihuera, Ibrahim de España, Jucef Lancari, Zalema Cambracha, Alí de Zalema el joven, Mahoma Muruscoth, Lop de la Viuda, Mahoma Habian, et Lop de la Madrina, moros vecinos del dito lugar de Quart vasallos del dito monasterio….”.

Diferién custión ye tratata en l´alcuerdo u compromís de nobiambre de 1480, pos l´abate de Santa Fe eba recorrito a lo conzello de Zirigoza:

“…con gran congoxa que los guardias de los montes de casa de ganaderos vaxaban en penyorar a sus vasallos de Quart y de Cadret, lo cual era total destruymiento del monasterio de Santa Fe sinse la renta de los dichos lugares no podrán sostener el monasterio la caridad y almosnas que de continuo fazían a vecinos de aquella ciudad y qualesquiere otros que por aquel camino iban ahí….” fendo notar que tradizionalmén os bizins de Cuart y Cadret han puisto paxentar y abrebar os ganatos en os mons d´a zidá: “… y esto sin pena ni calonia alguna sin contradición alguna, sabiéndolo los susoditos de casa de ganaderos, senyaladamente que el dicho convento y lugares están poblados en los terminos de Zaragoza y que siempre los jurados y capitol y consello los han sostenido en aquesto. Ansí mesmo dize que como por los privilegios de la ciudad todo vecino de aquella  puedan pascer en todos los lugares realencos y de iglesia y los realencos y de iglesia  en los montes de Zaragoza y como los ditos vezinos de la ciudad pazcan todos los combentos y lugares de la orden de Cistels es a saber Beruela, Rueda, Trasobares y Piedra e Casbas de la orden de Cisteles, y los ditos vassallos sean de Sancta Fe monasterio de la dita orden que por este respecto no obstante lo sobredito pueden pastar en los montes y terminos de la dita ciudad. Y por tanto el dito abad suplica no permitan estas vejaciones le sean fechas”.

Os argumentos de l´abate risultan seyer de peso, pos os churatos d´o conzello zirigozano -dimpués de consultar con a Casa de Ganaders- dan por güenas e balederas as razons de l´abate: “… por todos estos respectos los ditos jurados capitol y consello declaran por vezinos de la dita ciudad a los vasallos que están poblados en Quart y Cadret vasallos del dito monasterio de Santa Fe tanto quanto serán del dito monasterio….” y lis atorgan letras y un estatuto de protezión debán de ros guardas dela Casa de Ganaders.

En chunio de 1492 cal fer unatro alcuerdo entre Santa Fe y lo conzello de Zirigoza, por tal de desimir a os sengulars de Cuart y Cadret d´apocar os dos sueldos por cafiz aplicaders a os foranos que cautiben terrens en o termino de Zirigoza; claro que n´ista dezisión debió d´enfluyir pro la misiba nimbiata lo chinero anterior dende Granada por o rai Ferrando lo Catolico, con estruzions faborables a os intreses d´o monesterio de Santa Fe:

Portada del incunable Coronica de Aragón de fray Gaubert de Vagá, impreso en Zaragoza en 1499. Portalada de l'incunable Coronica d'Aragón

“…. y sobre ello la majestad del señor rey haber scripto a los jurados capitol e consello una letra patente paresciéndole los dichos vasallos del dicho monasterio de Quart y Cadret no deber pagar dichos dos sueldos por cafiz por muchas razones en la dita provisión contenidas…. delibera el dicho capitol… sea de aquí adelante guardado y servado que el abad y monjes del dicho monasterio de Sancta Fe y sus vasallos de Quart y Cadret puedan pascer et pascan con sus ganados grossos y menudos de día y de nueyt et leñar y escaliar en los montes de los terminos de la dita ciudat y tener en aquellos todos los ademprios…. como si verdaderamente fuesen vecinos de aquella….”; a trucas d´istas finezas d´o conzello zirigozano, lo capetulo de monches de Santa Fe -entre os que se i troba “fray Gaubert de Vagá sosprior” (Gauberte Fabricio de Vagad, autor d´a famosa “Coronica de Aragón)- determinan:

La primera página de la Coronica. A primera pachina d'a Coronica

“… de pagar… en cada un año… para el común de la dicha ciudad docientos y cinquenta sueldos por todo el mes de janero”, amás de gallinas y betiellos ta ros churatos de Zirigoza, con atras midas faborables a la zidá rilatibas a comerzio de “vino y olio forano” y premiso t´aplicar y executar penas por os ofizials y guardas zirigozanos en tot o dominio d´o monesterio “… y esto sin perjuicio alguno de la jurisdicción civil y criminal que los dichos abad y convento tienen en los dichos lugares de Quart y Cadret….”.

Anuncios