2.1. Fuendetozos. Escorsa

Plegan en Fuendetozos y enfilan dreitureramén ta la “Balsa´l Lugar”, parache d´empieze de la escorsa que quieren fer por bels kms. de lo Sender de Chiqueta Cursa P.R. Z-23 (Zirigoza-Fuendetozos), ta besitar belún de ros sonatos fozinos de Fuendetozos.

La Balsa de Fuendetodos. A Basa de Fuendetozos

Dita Balsa -esdebenita agora un majizo restaño con anedas y zisnes negros-  ye chuntola Gospederíad´o Lugar y a lo canto d´un chiqued parque ta ninos en o que i son triballando dos mesaches d´o lugar; os Zerris dandalían sopre qué camín prener, asinas que lis ne preguntan a ixos mesaches qui, de ro millor implaz, lis esplicotian a custión endicando-lis que cal pasar zerquica d´un “alondero” (latonero) chigán, perfeutamén bistero dende do i son fablando.

Cisnes negros en la Balsa del Lugar. Zisnes negros en a Basa d'o Lugar

CURSA TA LO FOZINO D´O COLLADIELLO Y LA FOZ MAYOR

 

BASE: la Balsa´l Lugar (Fuendetozos)

DESTÍN: Foz Mayor

ESLIBEL: sin de notorio (lo camín puya y baxa bels metros durán la cursa)

DURATA: una ora y meya (ITA); (marchando amonico y aturando a ormino ta fer-ie afotos)

DIFICULTÁ: sinesistén (ficazio en cucutiar por os espinganez d´os miralgüens)

 

Dende Fuendetozos dica la Foz Mayor bi ha 4 kms; a lo que s´ha petenau meyo km. dende la Balsa´l Lugar se i plega ta la cruzillada d´o Pilón Baxo, do cal continar por o P.R. Z-23 (a pista de la cucha); 800 mts. más adebán se i dixan ta la cucha las Parideras d´o Colladiello –u Colladico- siguindo pista-pista 1 km. más, dic´arribar en l´espartidero d´a pista nuaba -que contina chunto la pinada- con o Camín Biello, cal prener íste y en a primera zerrigüelta esbarrar-se-ne por un camined que mena -en 100 mts. tasamén- ta la cocota d´un tozalico, perfeuto miralgüén enta lo Fozino d´o Colladiello. Dimpués se´n recula ta la pista nuaba, por la que cal continar 1 km. y meyo -altubaxo- y esbarrar-se-ne ta la dreita por un cambo encosterato pleno d´ababols dica lo miralgüén d´a Foz Mayor.

Os Zerris, dimpués de fer cualques afotos a las aus d´a basa, floreticas, ilesia d´o lucar y a bel ornamén trucadizo de ro parque, enzetan la escorsa.

Vista de Fuendetodos. Ambiesta de Fuendetozos

Entre que alufran lo majizo paisax primaberal, afotían os ababolerals d´os cambos bizins y a begatas se´n chiran ta continar afotiando ra ilesia; curiosamén, se´n i espisguardan y “xuplidan” afotiar lo molimental alondero (latonero) que lis eban endicato ros fuendetozosinos…. pasan por os retulos d´a PR Z-23, dende do goyan d´una completa ambiesta de Fuendetozos; lo maitín ye luminoso, bogal, y la calor ya escomienza a fer-se-ie presén.

Amapolas en primer plano. Ababols en primer plan

En poco más d´un kmt. arriban en as Parideras d´o Colladiello, cubilars ta lo ganau en pro güen estau, quizau rezienmén esbiellatas pero d´as que inoran si encá se continan emplegando ta la suya tradizional funzión.

Las Parideras del Colladillo. As Parideras d'o Colladiello

En pasar as Parideras, y entre cambos plenos d´ababols,

Campo de amapolas. Cambo d'ababols

ya empezipian a alufrar as primeras rochas serranas y l´empieze d´a pinada;

M. Martín de camino a las Foces. M. Martín de camín ta las Fozes

meyo kmt. más adebán, cuan ya en tienen de pins ta la suya cucha, lis cal esbarrar-se-ne por o Camín Biello -ta ra dreita d´a pista por la que yeran marchando- ta puyar bel zentenal de mts. por a costerica d´o tozalé que i da bista ta lo Fozino d´o Colladiello;

La Cuesta del Cerro, al fondo las Parideras. A Costera d'o Tozalé, ta ro fundo as Parideras

iste ye un retuertizo barrango encalaxato en as calzinas churasicas, de gran polideza y bariedá chioloxica y bechetal.

Vista de la Fozino del Colladillo. Ambiesta d'o Fozino d'o Colladiello

Pro qu´afotían tot isto de ro millor implaz, asinas como -ta zaga- lo camín que plegan d´arrecorrer y as Parideras y -ta debán- as amplas ambiestas d´o mon d´a Sierra Gorda.

M. Martín en la Fozino del Colladillo. M. Martín en o Fozino d'o Colladiello

Anque esiste ra posibilidá de continar por o Camín Biello y por o “Paso d´as Baxadas” -d´intrés chioloxico- ixir ta la pista bels zentenals de mts. más adebán, os Tocayos se decantan por recular ta la pista dende ro mesmo miralgüen d´o fozino. A cosa d´un kmt. más adebán, y con a pinada de contino en a cucha d´a pista que siguen, ya se pesguardan d´a prisenzia de ra Foz Mayor;

En la pista camino de la Foz Mayor. En a pista camín d'a Foz Mayor

aprofeitan a guambra d´un arbol solenco en a dreita d´a pista t´afotiar-sen-ie con a Foz Mayor pos, a ista longaria, i fa güen miral.

M. Martín, detrás empieza la Foz Mayor. M. Martín, dezaga prenzipia a Foz Mayor

Continan pista-pista meyo kmt. más y, en istas, paran cuenta que lis cal nabesar por un cambaz rebutiu d´ababols ta poder arribar en os zemaliellos d´a foz;

Otro campo de amapolas. Unatro cambo d'ababols

asinas lo fan, comprebando dende as zinglas que a Foz Mayor fa onor a lo suyo nome.

Vista de la entrada de la Foz Mayor. Ambiesta d'a dentrata d'a Foz Mayor

Dimpués de fer os correspondiens afotos en iste grandaz y espeitacular tallo natural (parando güena cuenta de no i chafar por as pinganetas de l´esperringlero)

Vista de la salida de la Foz Mayor. Ambiesta d'a ixita d'a Foz Mayor

y alufrar un rated l´encantuchador paisax,

M. Martín en la Foz Mayor. M. Martín en a Foz Mayor

se´n ritornan por do son benitos, afotiando lo repolindato ababoleral,

Todo lleno de ababoles, todo. Tot pleno d'ababols, tot

repasando por o Colladiello -u Colladico- y rematando atra begata en a Balsa´l Lugar; al suyo canto y en guana mosquera chintan y discansan una mialleta, antis de marchar a besitar Fuendetozos.

Anuncios