17. La Basa’L Plano Gallocanta. Estoria. Ecoloxía. Cultura

Dende Calamocha marchan 12 kms. por l´A-1507 dica Tornos, do continan por la T-25/CV-634, alufrando enta lo güeste la polita ambiesta d´a Lacuna de Gallocanta que lis alcompaña mientres bella dezena de Kms.

A Lacuna Gallocanta ye o prenzipal auguazal d´a cuanga endorrica esteparia d´o mesmo nome, sistema idrografico complexo orichinato en as puendas Terziaria y Cuaternaria, amugato por as siarras de Santa Cruz, Pardos, Menera y Caldereros y as bals d´o Piedra y o Xiloca, en a chuntura d´as probinzias de Zirigoza, Tergüel y Guadalaxara. A ista cuanga pertenexen -amás d´a Lacuna Gallocanta- lumerosas lacunas, lacunicas, basas, badinas y naballos, asinas como ramblas, barrangos y un grandizo rete d´auguas sotarrañas.

01 Mapa d'a Lacuna Gallocanta

Mapa d’a Lacuna Gallocanta

Zentrando-nos en a Lacuna Gallocanta, y siguindo ros triballos de Francisco Javier Gracia Prieto y Chabier De Jaime Lorén -se beiga ra Bibliografía- cal i siñalar tres seizions bien definitas: “Lagunazo Pequeño” (enta lo norgüeste), “Lagunazo Grande” (zentral) y os meridionals “Lagunazos de Tornos” (zonas padulencas). A longaria total d´a lacuna ye de 7-8 kms., l´amplaria de bels 2 kms. y la fondaria d´entre meyo metro y os dos metros; ye situgata a 1.000 mts. d´altaria, altubaxo, y en tiampo d´agundán plebida abasta cualques 1.400 eztarias (mayor lacuna natural d´a Peninsula).

Os prenzipals arrigazos qu´abocan en ista lacuna son “Los Aguanares”, “La Isilla”, “El Royo Santed”, “La Reguera´l Prau Las Cuerlas”, “La Rambla Los Pozuelos” y os mananzials de “Los Ojos”. Antiparti bi ha dos islas de cualque grandaria en o Lacunazo Gran, anomenatas “Lomerón del Colorau” e “Isla del tió Pesterre”. A Lacuna Gallocanta ye d´auguas salatas, igual como a bizina “La Lagunica” (chusto en o sureste y entremeyo de ros lucars de Bello y Tornos).

02 Lacuna de Gallocanta en os arredols de Tornos

Lacuna de Gallocanta en os arredols de Tornos

Manimenos, la tamién bizina lacuna de La Zaida, enta lo norgüeste, ye d´augua dolza, sin mica de salinizazión; y as tamién proxemas “Balsas” de Santed, la gran en ye salata y la chiqueta, dolza. Istas esferenzias en tan chiqued espazio son güena preba d´a complexa y bariata chioloxía e idrografía d´a zona.

 

BELS ESPUNTES ESTORICOS

 — 1.457:  Alifonso V d´Aragón atorga a Martín Pérez de Santa Cruz -lo suyo Botiller Mayor- lo terreno d´a Comunidá de Daroca dito “LA BASSA DEL PLANO DE GALLOCANTA, do en tiampos de plebidas s´arrechuntan as auguas  y de berano en disparixen, i aparixendo la sal”. Asinasmesmo, lo rai atorga a lo debandito Martín Pérez lo monopolio de recullita d´a sal de la dita Basa. (A. Sinués y A. Ubieto: “El Patrimonio Real en Aragón durante la Edad Media”).

03 Castillo de Tornos. Castiello de Tornos

Castillo de Tornos. Castiello de Tornos

S. Labaña: “Itinerario por el Reino de Aragón” (1.610): “…. es de agua salada y no cría peces, sino lo que llega por los arroyos de agua dulce que en ella entran, se vuelve por el mismo arroyo después de probar el agua, y así no es de ningún provecho. Se llama Gallo Canta y es de agua salada, no cría ningún pez pero sí hay mucha caza”.

T. del Campillo: “Documentos históricos de Daroca y su comunidad”: en 1.693 se bieda la saca de sal d´a Lacuna entre que durase o logamién d´o “sobre precio” d´a sal d´o Raino d´Aragón, a fabor de J.M. Iñiguez, l´esquimen d´o cualo yera ta mantener o Terzio Aragonés en Catalueña.

M. Traggia: “Descripción del Partido de Daroca” (1.790): “A la parte del oeste, entre Berrueco, Tornos, Bello, Las Cuerlas y Gallocanta se halla la famosa laguna de este nombre….. muy nociva….. por las malignas tormentas que se forman sobre ella….. sus aguas entonces crían sal que custodian siempre guardas del rey, para que ni los ganados ni las personas se aprovechen de ella en perjuicio de las rentas reales….”.

S. Miñano en 1.826 (“Diccionario Geog.-Estad. de España y Portugal”) y P. Madoz en 1.850 dan ferrete con a malinidá d´as auguas d´a Lacuna “cuyas evaporaciones causan tercianas muy malignas”. Sopre a grandaria d´a Lacuna Gallocanta, Madoz en diz que: “tendrá aproximadamente 1 hora de ancha y sobre 5 de circunferencia”.

— En “Tradiciones histórico-religiosas de todos los pueblos del arzobispado de Zaragoza” (1.880), dimpués de mentar l´armita de Ntra. Sra del Buen Acuerdo “cuya imagen no es aparecida ni sabemos sea hallazgo milagroso, pues su culto es tan antiguo que se ignora completamente su origen” se i diz sopre a Lacuna: “muchas veces se han bendecido los estudios de esta laguna: ¿cuándo llegará la realización de estos trabajos, que han de dar pan en esta zona y aumentar bastantes aranzadas de tierra para el cultivo, saneando todo el país”.

04M. Martín en las cercanías del pueblo y laguna de Gallocanta. Migalánchel Martín amán d'o lucar y lacuna de Gallocanta

M. Martín en las cercanías del pueblo y laguna de Gallocanta. Migalánchel Martín amán d’o lucar y lacuna de Gallocanta

 — L. Parral y Cristóbal en “Fueros de Aragón” (1.907) diz: “Edificios notables, ermita de Ntra. Sra. del Buen Acuerdo y un gran hotel a las orillas de la laguna….. la caza en la Laguna de Gallocanta da abundantísimas ánades en variedad extraordinaria”.

Ye de remarcar lo contino espleit d´a Lacuna a l´arreyo de ros sieglos, más que más ta bistrazión de sals y cazatas. Antiparti la grandaria d´a lacuna no ha cambeyato guaire en as 2.000 zagueras añadas, pos en a suya marguin noreste -en o termino de Berrueco- i aparixioron repuis d´una bibianda romana d´o sieglo I d.C.

 

AIZIÓN  UMANA

La más antiga aizión umana sopre a Lacuna mantenita dica güe ye a regulazión d´alporte d´augua dende ra bizina lacuna de La Zaida (situgata en o Campo Used, a 4 Kms.) dende lo sieglo XVI. Por achuste estatueziu entre os conzellos de Gallocanta y Used, la compuerta de La Retuerta esbarra l´augua d´a siarra de Santa Cruz enta ra lacuna de Gallocanta lo diya 15 d´agosto, siempre y cuan a lacuna de La Zaida seiga plena. Ista operazión se repite un año sin d´autro, asinas que La Zaida tien augua una añada de cada 2, en l´autra añada ixa lacuna s´ixeca y esdebiene rebutién terreno de cautibo.

05 mapalagunagallocanta

Mapa de la Laguna de Gallocanta. Mapa d’a Lacuna de Gallocanta

Tamién ye de remarcar que l´augua de La Zaida -cuan bi´n ha- se tresmina amoniqued enta Gallocanta, aparixendo en o mananzial de La Cañada, chunto a l´armita “del Buen Acuerdo”. U seiga que, d´una traza u d´autra, l´augua de La Zaida siampre remata en Gallocanta.

A zaguers d´o sieglo XIX, lo 1.897, a lacuna de Gallocanta estió crompata a l´Estau por o “Banco Agrícola, Comercial e Industrial S.A.”, soziedá constimesa asprés ta la ixecazión y espleit d´a lacuna que, dimpués de “saneada”, eba d’esdebenir una finca anomenata “Dominios del Pilar”. Os tautes d´o proyeuto eban calitrau a costruzión d´un canal d’ixaugüe qu´escolarba ra Lacuna enta la bal d´o Xiloca; os terrens risultans sereban d´espleit agricola y ganader. A produzión pertocán sereba portiata dica lo fierrocarril por o debandito canal.

Afortunatamén, lo proyeuto enxamás estió entrepreso y a mentata Soziedá remató acotolada lo 1.931. L´unico esquímen qu´en continoron otenendo d´a Basa´l Plano Gallocanta durán lo sieglo XX estioron as sals ta lo ganau.

Más grans y duraderas estieron as risultas d´autras aizions feitas en as proxemedaz d´a Lacuna, como l´escole e ixecadura  de La Lagunica a metá d´o sieglo XX, y l´escole y trasformazión d´o Prau de Las Cuerlas ta cautibos de regano (remolacha en primeras y chirasol dimpués).

06 La Laguna de Gallocanta, al fondo Las Cuerlas. A Lacuna de Gallocanta, ta ro fundo As Cuerlas

La Laguna de Gallocanta, al fondo Las Cuerlas. A Lacuna de Gallocanta, ta ro fundo As Cuerlas

ASPEUTOS  ECOLOXICOS

Siguindo a Chabier De Jaime, os ecosistemas d´a Cuanga de Gallocanta se´n resumen en tres: forestas serranas de rebollars-marojals y carrascals, arias esteparias (parameras y cambos de zerials) y os auguazals.

Zentratos en a Basa´l Plano Gallocanta, os tascals dominan as compleganzas d´os diferiens arrigazos  en a lacuna; antis más paxentaus por os ganaus d´o Común, agora enduran returas y escoles ta i espleitar cautibos de regano (más que más en Las Cuerlas).

07 Al fondo la Laguna de Gallocanta. Ta ro fundo a Lacuna de Gallocanta

Al fondo la Laguna de Gallocanta. Ta ro fundo a Lacuna de Gallocanta

En as marguins padulencas d´embadinamién periodico i crexen os patrals más amplos, con plandas esparditas seguntes os libels de sals y calso, composando -ie zespedes y chunqueras. En as plachas salobres -orchegatas d´ibierno- gosan i crexer diferiens menas de sazbimbres y plantainas, pendendo de lurs toleranzias a sals y cloruros.

Os cañiziellos gosan prosperar espezialmén en as marguins replegaderas d´auguas dolzas d´arrigazos y mananzials. Tamién en os aintros de l´augua d´a Lacuna i proliferan as algas adautatas a la salinidá, prenzipal minchar d´as aus capuzeteras.

Rispeutibe á fauna, Chabier De Jaime en cuaterna 258 espezies de bertebraus en a cuanga Gallocanta, de ras que 214 en son d´aus (91 d´elas niedificans).

08 Parece el Nilo pero es la Laguna de Gallocanta. Parixe o Nilo, pero ye a Lacuna de Gallocanta

Parece el Nilo pero es la Laguna de Gallocanta. Parixe o Nilo, pero ye a Lacuna de Gallocanta

Prebarán de resumir encontinén la menuzelera y completisma descrizión que Chabier De Jaime en fa d´a fauna abicola de Gallocanta.

DE PRIMABERA:

– Lemecolas de pasada enta os auguazals nordicos y as tundras escandinabas: churrupetas, barallers, agullas, chiflons, barders y chiflez.

 – Niedificans en os cañiziellos: bochas, capuzetes grans, cuellinegros y chicoz, alicas de laberca, carrasclises comuns, grans y chicoz, sarteneras, cascarrons, chifletas patinegras, gabiotins claros, falzetas d´augua bequinegras, gabiotas, carrasclises de codampla, engañapastors tripamariella, quinzetas, aneda azulona, aneda grisa, capezudo royo, aneda roya, cucharón, guite collilargo, carracliellas.

– En as planeras de zerial: autardas, alicas trigueras, cotornizes, calandras, alodas, gollorías, corrugañas.

– En as parameras: zurribalbas, zistriellas correderas, algarabans, muchuelos, burburicas, ziquilins, turras.

– Por as chopleras: cuerbetas, picarazas, cluchidors, fusters, cardelinas, zistras, ziquilins d´estiu.

09 M. Pérez en las cercanías del pueblo y laguna de Gallocanta. Migalánchel Pérez amán d'o lucar y lacuna de Gallocanta

M. Pérez en las cercanías del pueblo y laguna de Gallocanta. Migalánchel Pérez amán d’o lucar y lacuna de Gallocanta

DE BERANO: guites, bochas y graniboros: cluchidors, zistras, gurriatos, pinchans, pardiellos comuns -u paxarels- y alodidos. A zaguers de l´estiu empezipian as migrazions y pasadas posnuzials de lemecolas dende lo norte d´Uropa enta l´Africa.

A PRIMERS D´AGÜERRO plegan en Gallocanta os primers guites ibiernans. A zaguers d´otubre, con os primers fridos, aparixen as bandiziallas de grudas con a suya tipica “formazión en V”. Gallocanta ye esdebenita rezienmén o parache más importán d´Uropa como gara de pasadas migratorias y d´ibiernada d´as grudas, por a suya situgazión estratechica en a rota migratoria peninsular, l´abitat faborable d´a lacuna -con dormiders, alimento agundán en os cambos bizins y radida bechetazión arboria- antimás d´a protezión legal como “Zona de Cazera Controlata” dende 1.973 y “Refugio Nacional de Caza” dende 1.985. As pasadas d´os zaguers agüerros en dan zensos superiors a las zincuanta mil grudas, cuasi lo total d´a rota uropeya ozidental. Discansan en as     marguins d´a Lacuna y aprofeitan os restollos d´o grano cayito en a cullita, sin de refusar d´autros minchars como fornigas u allos salbachins. As plebidas d´agüerro y a labranza d´os campos lis afuerza a continar camín desiguida enta las defesas de lezineras d´Estremadura y Andaluzía, furnideras d´as notrideras lezinas. En os cambos de Gallocanta no i remanen d´ibierno qu´una dezena parti d´as grudas pasaderas.

10 Evocadora foto de la laguna de Gallocanta. ¡Qué afoto de Gallocanta!

Evocadora foto de la laguna de Gallocanta. ¡Qué afoto de Gallocanta!

CON AS ZAGUERAS CODALLADAS DE L´AGÜERRO ban plegando ta Gallocanta os grans esbols d´aus ibiernans, entre as más agundans os guites capuzeters, anedas royas (dica 35.000), bochas (dica 40.000) y capezudos royos (dica 80.000). Tamién se´n i achuntan por milentas os guites de superfizie, qu´acupan as auguas más someras: chilladers, cucharons, anedas finas, anedas grisas, carracliellas y guites collilargos. En menor numbro: negrez, capezudos pardos, capezudos grans, anedas blanquinegras, gabachetas d´estiu, gansos y aucas montesinas y, mesmo, bella colla de flamengos. Agún más radius son os lemecolas ibiernans en a Lacuna: quinzetas, chiflons, biecadetas, becazinas, agullas y churrupetas (a toz istos lis izen “chiflones” por ixa redolada) y as gabiotas.

11 M. Martín en la primavera de Gallocanta. Migalánchel Martín en a primabera de Gallocanta

M. Martín en la primavera de Gallocanta. Migalánchel Martín en a primabera de Gallocanta

D´IBIERNO gosan acubillá-sen en os cañetals, paxenters y planiellos güenacosa i paxaricos: zistras de laberca, zistriellas grans, paxarels riberans, cardelinas y bels alodidos que son minchaus por a ziquilineta y l´alica azul, qui tamién se notre -chunto con l´alica topera– de os rosigadors de cambos y patrals.

Risulta enfalaguerán ta ornitologos y naturalistas la rechira y alufre de todas istas aus, y autras agún más tasadas y rarizas en a redolada: garrapescaires, pescairez, zicuañas negras, gallos marins, abitoros, auquetas, zisnes, gabiotas archentadas, chutas pardas…. amás d´autros guites y lemecolas diferiens d´os ya mentaus.

12 Parece un río pero es la Laguna de Gallocanta. Parixe un río, pero ye a Lacuna de Gallocanta

Parece un río pero es la Laguna de Gallocanta. Parixe un río, pero ye a Lacuna de Gallocanta

EN A REMATADURA DE L´IBIERNO plega ta Gallocanta la segunda botinada de grudas, que i remanen tasamén bels diyas, espleitando d´a simién d´os zerials rezién ixemenata; istas rapaduras en os cambos gosan chenerar as quexas y reclamos d´os labradors.

12a Grullas de Gallocanta.

Grullas de Gallocanta.

Poco dimpués la Basa´l Plano Gallocanta se´n queda manca d´a bulla de grudas, guites y autras aus acuaticas, dica la plegata d´as primeras  bandiziallas de migrans estibals.

 

BELLAS  MANIFESTAZIONS  CULTURALS

En “Tiento a la música popular en el Campo de Bello” (se beiga ra Bibliografía) Pascual Crespo Vicente fa un repaso completismo a ras tradizions mosicals y festibas en a redolada de Gallocanta: gaiters (donzainers), auroras, dianas, prosezions, danzes -en Odón, Bello,

13 Dance de Bello (Teruel) en 1913 a los comentaDanze de Bello tergüel en 1913 muito parixito a los aquí comentaus

Dance de Bello (Teruel) en 1913, muy parecido a los aquí comentados. Danze de Bello (Tergüel) en 1913, muito parixito a los astí comentaus

Gallocanta (recuperato)

Pascual Miguel Ballestín, Mairal del Dance de Gallocanta en plena representación en Zaragoza en "l' Aragonés n´a Carrera" década de 1990 . Foto de Vídeo de M. Martín. Pascual Mairal Ballestín, Mairal d'o Danze de Gallocanta en plena ripresentazión en Zirigoza. "l' Aragonés n´a Carrera" decada de 1990. Afoto de Bideyo de M. Martín

Pascual Miguel Ballestín, Mairal del Dance de Gallocanta en plena representación en Zaragoza en “l’ Aragonés n´a Carrera” década de 1990 . Foto de Vídeo de M. Martín. Pascual Mairal Ballestín, Mairal d’o Danze de Gallocanta en plena ripresentazión en Zirigoza. “l’ Aragonés n´a Carrera” decada de 1990. Afoto de Bidio de M. Martín

y La Yunta (Guadalaxara)-

14 Danze de La Yunta,1914(Guadalaxara, pero güegatizo y furnidor d´auguas ta Gallocanta)(1914)

Dance de La Yunta (Guadalajara), fronterizo y proveedor de aguas a Gallocanta (1914). Danze de la Yunta (Guadalaxara)  güegatizo y furnidor d´auguas ta Gallocanta)(1914)

romerías, corridas y autros espuertos tradizionals, “refrescos”, canzions de bodega, “zorras” y “billanos”, bailes de plaza, “la Rolda”, asinas como chuegos y cantarulas de ninos; a iste rispeutibe ye muito intresán un chuego y canta que l’alcompaña, tradizional de Las Cuerlas, transcrito por Pascual Crespo en o triballo debanmentau y que diz asinas:

“A LAS CLAUS DE DEU / SAN PER Y SAN CHIGUÁN / ANDABAN AL PASO (u “LAS DAMAS”) / DEL TRIQUI, TRIQUI, TRAN”.

Se i gosaba chugar y cantar a primers de chinero; a mosiqueta y o luengache parixen d´orichen meyebal y s´asemellan a cantarulas y tonadas d´autros puestos d´Aragón, Catalueña y Oczitania.

15 Peirón de San Antón. Tornos

Pairón de San Antón. Tornos

Bi´n ha d´autras muitas manifestazions d´a cultura popular en a zona: liyendas, ditos, literatura oral, costruzions agricolas, pairons (espezialmén agundans e intresans en Tornos) y o lesico popular tradizional, d´o qu´en ye güen exemplo lo de Gallocanta, replegato por Pascual Miguel Ballestín (se beiga ra Bibliografía).

16 El pueblo de Gallocanta. O lugar de Gallocanta

El pueblo de Gallocanta. O lugar de Gallocanta

Os bocables gallocantinos que más lis chocan a ros Tocayos son istos: AGUARRUCHO, CHUGARRIAR, RUCHAR, TRIBALLAR y ZIRIGÜELTA.

17 Vista de la Laguna desde Berrueco. Ambiesta d'a Lacuna dende Berrueco.

Vista de la Laguna desde Berrueco. Ambiesta d’a Lacuna dende Berrueco.

Os Zirigüeltaires continan por la CV-634, aturan un inte a´l canto Berrueco

18 Iglesia de Berrueco y el Castillo al fondo. Ilesia de Berrueco y o Castiello en o fundo

Iglesia de Berrueco y el Castillo al fondo. Ilesia de Berrueco y o Castiello en o fundo

t´afotiar a Lacuna y o lucar -con a torre d´a ilesia y o torreyón d´o Castiello-

19 Vista desde Berrueco. Ambiesta dende Berrueco

Vista desde Berrueco. Ambiesta dende Berrueco

y continan enta Gallocanta, do tornan a fer lo mesmo. Lis ese cuacau besitar amonico cadagún d´os lucarons qu’arredolan a Basa lo Plano Gallocanta, pero no lis ne baga: a tardi abanza y agún lis en ie queda güen tallo i cursa.

Dende  Gallocanta continan por la CV-633, l´A-211 y l´A-2506, arredolan a lacuna de La Zaida, pasan zerqueta d´a de Guialguerrero (o nome promana d´o disparexito poblato meyebal de Billar Guerrero) y por Cubel enfilan abantaus enta Abanto.

Anuncios