16.1. Calamocha. Apuntes Estoricos. Tradizions

Tornan a pasar por Entrebasaguas y, siguindo por a N-234, esnabesan por a zona de Gascones y ascape plegan en Calamocha, capetal d´a comarca d´o Xiloca con altubaxo 4.600 abitadors, adedicatos a fainas y endustrias agropecuarias y serbizios comarcals. En 1.971 muitos lucarons d´a redolada s´adibioron ta lo suyo monezipio: Luco de Xiloca, Leitague, El Pueyo, Balberde, Olalla, Cutanda, Billariello de los Ormos, Cuencagüena, Nabarret del Río y Collaus.

01 Rejas en una casa palacio de Calamocha. Rellería en un casal-palaz de Calamocha

Rejas en una casa palacio de Calamocha. Rellería en un casal-palaz de Calamocha

D´as puendas prestorica y romana en son quedatos estrazios en o bico “El Gazapón” (poblau y necropolis zeltibers y una “Villa” romana) y -más que más- o PUEN ROMANO por o que pasaba la calzada de Zirigoza ta Cordoba, puesto en o que parix que yera situgata l´antiga ALBONICA, “mansión” de furniduras ta ras lechions romanas; ye d´un solo güello, de 6 mts. de luz, 4´5 d´altaria, 3 d´amplaria y 8 de longaria y estió estudiau por Martín Almagro Basch en os años 50 d’o sieglo XX.

02 Restos de un viejo pilar encontrado en el antigo ayuntaRepui d´un biello pilar trobau en l´antiga Casa´l Lugar

Restos de un viejo pilar encontrado en el antigo ayuntaRepui d´un biello pilar trobau en l´antiga Casa´l Lugar

A importanzia estratechica d´iste parache, como cruzillata de camins siñalers entre o sur y lebán y o zentro y norte d´a Peninsula, ya no se´n cayó, continando en tiampos d´os moros. Mesmamén a primer zita decumental ye d´o 935, cuan o coronista mozleme Ibn Hayyan rezentó la marcha melitar d´o califa Abdarrahman III cuentra la sublebata Saraqusta, dende Cordoba -capetal d´o califato- por Guadalquibir, Guadiana, Xúcar y Xiloca, pasando con o suyo exerzito por un lucar clamato QALAMUSA.

03 Escudo de los Garcés de Marcilla en la calle Mayor. Escuto de os Garcés de Marcilla en a carrera Mayor

Escudo de los Garcés de Marcilla en la calle Mayor. Escuto de os Garcés de Marcilla en a carrera Mayor

Lo Zid Campiador establió lo suyo campamén por bels meses en el Pueyo del Zí, autual bico calamochino, dende do controlaba y chusmeteba a trebuto amplos territorios de l´Ebro ta lo Mayestrazgo (1089-1090). Dimpués d´a baralla de Cutanda y a creyazión d´a Comunidá d´Aldeyas de Daroca, l´escaizimién más siñalero estió l´enfrontinamién d´o nople Peiro de Ahones con Chaime I lo Conqueridor -en Calamocha y lucars bizins- que abocó en guerra zebil aragonesa, curta pero intensa (1226-1227). As guerras con Castiella en os sieglos XIV y XV tenioron graus recutidas en Calamocha, en estar zona güegatiza.

04 Portal de una casa señorial. Portalada d´un casal siñorial

Portal de una casa señorial. Portalada d´un casal siñorial

Muito más prosperos serán os siguiens sieglos XVI y XVII ta la localidá, lo que se ferá notar muito en o creximién d´a poblazión y a edificazión de guallardos casals, palazes y molimens, como a ilesia de Santa María la Mayor, o combento de San Miguel Arcángel u as armitas de San Roque y d´o Santo Cristo del Rabal, y as mansions de os Rivera, Tejada, Vicente de Espejo y Valero de Bernabé. A guerra de Suzesión, a de Independenzia y as Carlistas tornarán a frenar remarcablemén o pogreso y desembolique d´a localidá; seguntes Madoz, Calamocha teneba 1.400 abitadors a metá d´o sieglo XIX y a suya importanzia continará crexendo en o XX, cuan esdebiendrá partiu chudizial y capezera comarcal.

05 Detalles en la pared de una vieja casa calamochina. Detalles en a parete d´una biella casa calamochina

Detalles en la pared de una vieja casa calamochina. Detalles en a parete d´una biella casa calamochina

A os calamochinos lis izen “Niños” y “Brutos del Jiloca” y os lugars d´a redolada lis han achudicato bels ditos:

Calamocha, venden jamones y llenan la pocha“;

Pintores de Calamocha, que pintaban con vino y chupaban la brocha“;

Calamocha, en pasando agosto se yelan hasta las pinochas“.

06 Aldaba mitológico. Trucador mitolochico

Aldaba mitológico. Trucador mitolochico

Entre as tradizions calamochinas la más remarcable ye lo BAILE SAN ROQUE, moltetudinera manifestazión festiba zilebrata en agosto, en a prosezión d´o patrón San Roque ta la suya armita, con partizipazión de zentenals de bailadors d’a localidá.

07 Baile de San Roque en Calamocha.

Baile de San Roque en Calamocha.

Iste “Baile” surtito -como en atros lugars d´a redolada- d´a rebullida relichiosa enguizcata por a pasia de colera de 1885, esdebiene en dreitura de l´antigo Danze aragonés que se ripresentaba en Calamocha p´aucasions espezials u destenguidas lo menos dende o sieglo XVIII, y d´o que s´ha conserbau lo testo d´una “bersión” de zaguers d’o sieglo XIX u prenzipios d´o XX, replegada por José de la Fuente a R. Corbatón y publicada en 1947 en a “Revista de Tradiciones Populares” del C.S.I.C. Como ye corrién en toz os danzes, os aragonesismos gosan aparixer en os “Dichos” que o “rabadán” adedica a os danzans y qu´empezipian asinas:

08 Puerta antigua recuperada en la calle Morería. Puarta antiga recuperata en a carrera Morería (Bico Biello)

Puerta antigua recuperada en la calle Morería. Puarta antiga recuperata en a carrera Morería (Bico Biello)

” ¡ Oh San Roque verginal/que presidís el dance este!/ líbranos de todo mal/ y en especial de la peste./ Y puesto que aquí ante todos/ tengo “los dichos” que icir,/ y que de diversos modos/ por mi boca han de salir/ sus pido que con presteza/ vos, que de amor sois alhaja/ deis a mi lengua presteza/ pa no entivocame miaja.” (Endrezando-se ta o caudiello d´os crestians): ” Este chico está esmirriau/ dende que asistió a un bautizo/ y a juerza e pan se comió/ más de un almú de panizo…..”.

09 Casa palacio de los linajes Vicente de Espejo y Tejada. Casal-palaz d´os linaches Vicente d´Espejo yTejada

Casa palacio de los linajes Vicente de Espejo y Tejada. Casal-palaz d´os linaches Vicente d´Espejo yTejada

Entre que diziba os “dichos”, o “rabadán” d´o danze asochetaba un palo con zintas con as que bailaban os danzans, orichen de l´autual “palitroque” u “gayata” qu´emplegan os “dicheros” d´o Baile San Roque ta rezitar os “dichos” que l’adedican a lo Santo y chens calamochinas. Dimpués de cada “dicho” rempezipia la mosica y lo baile que tornarán a aturar a lo que unautro “dichero” debante lo palitroque ta i rezitar un nuabo “dicho”.

10 Aldaba curiosa.Trucador pichiforme

Aldaba curiosa.Trucador pichiforme

Anque no bi ha decumentazión esclatera, ye de dar que tamién la mosica y os pasos d´o Baile San Roque promanan d´as mudanzas de l´antigo Danze.

11 Torre de la iglesia de Santa María la Mayor. Torre d´a ilesia de Santa Mª la Mayor

Torre de la iglesia de Santa María la Mayor. Torre d´a ilesia de Santa Mª la Mayor

L´autual puyanza d´o Baile San Roque y atras tradizions y manifestazions culturals calamochinas naxe d´a rica bida asoziatiba local, a partir d´as peñas festeras d´os años 70, y más que más dende a creyazión en otubre d´o 87 de lo CENTRO DE ESTUDIOS DEL JILOCA, entidá empentadera y esbulligadera d´a cultura xilocana en toda la suya amplaria. Respetibe a lo Danze aragonés y lo Baile San Roque en o Xiloca, son de risaltar as Chornadas d´Etnoloxía adedicatas a lo tema en nobiembre de 1989 y a publicazión d´a rebista espezializata “Cuadernos del Baile San Roque” a partir d´ixe mesmo año.

Anuncios