15. Entrebasaguas. Birchen d’o Rosario. Luco de Xiloca

En Navarrete del Río (antis más por a redolada d´o Xiloca a l´arriu Pancrudo l´iziban “río Navarrete”) cambean de carretera: agora siguen bels 8 kms. por a local A-2512, de contino á canto lo Pancrudo, dica que a carretera desenfila en a N-234 y lo Pancrudo en o Xiloca. A zona se diz Entrebasaguas (as de ros dos arrius) y se troba en o termino de Luco de Xiloca; ye estau un parache estratechico y abitau dende a Prestoria, por a compleganza d´arrius y cruzillata de camins. Asinas, ya esistiba un poblau iberico en o bizín Cabezo Raso y unautro meyebal en o mesmo Entrebasaguas, disparexito de raso, anque i remanen bels estrazios de murez en os arredols de l´autual armita de la Birchen d´o Rosario.

01 Puerta de la ermita de la Virgen del Rosario. Portalada de l'armita d'a Birchen d'o Rosario

Puerta de la ermita de la Virgen del Rosario. Portalada de l’armita d’a Birchen d’o Rosario

En o tocán á chioloxía istos terrenos son asabelo suyizos. En ista zona d´Entrebasaguas y a bizina de Gascones (ya en termino de Calamocha) a Bal d´o Xiloca cambeya radigalmén: dixa ta zaga l´ampla fuesa teztonica pliozenica -remplida de solaches terziarios y cuaternarios tresminables- qu´acupa dende a suya naxedura, ta encalaxá-se y estreitá-se en matierals paliozoyicos que no premiten a tresminanzia, aparixendo en ista linia de falla  de Gascones-Entrebasaguas un gran laco sotarraño; a napa fregatica i remane aprimita y l´augua sotarraña preba de surtir t´a superfizie, fendo-ie paduls por  tot.

02 Puerta de la casa del ermitaño. Puarta d'a casa de l'armitán

Puerta de la casa del ermitaño. Puarta d’a casa de l’armitán

Antiparti, bi ha fenomenos de cauz bandolero y de contornadura topografica que, achuntaus a la prisenzia de bellas ramblas y a compleganza d´o Pancrudo, refuarzan la umedá y enfangadura d´o terreno. Istos condizionans naturals no premitioron estoricamén lo desembolique de l´agricultura ni a fixazión de poblazión; asinas, as aldeyas meyebals de Gascones y Entrebasaguas contaban en 1.387 solamén con 6 y 2 bizins, quedando espoblatas as dos en o siguién sieglo XV, y achudicatas lurs tiarras a Calamocha y Luco, respetibamén.

03 Vista de la ermita de la Virgen del Rosario. Ambiesta entegra de l'armita

Vista de la ermita de la Virgen del Rosario. Ambiesta entegra de l’armita d’o Rosario

Pero en os sieglos siguiens o creximién demografico y as zercustanzias estoricas (espezialmén as peitas estraurdinarias cheneratas por as guerras) ferán qu´istos patrals y sotos padulencos seigan escaliaus y espleitaus ta campos, ta lo que será amenister, en primeras, escolar e ixecar istos terrens meyán la feitura de 3 zaicas: “de los Galachos” (Calamocha), “Molinar” y “de la Revilla” (Luco).

04 Vista de la ermita de la Virgen del Rosario con ababoles. Ambiesta florita de l'armita.

Vista de la ermita de la Virgen del Rosario con ababoles. Ambiesta florita de l’armita.

Os sieglos XVI e XVII os espleitamiens d´istos terrens serán ta paxenters d´os ganaus; pero en os sieglos XVIII y XIX a presión fiscal d´as guerras de Suzesión, d´Independenzia y 1ª Carlista menará a os conzellos de Luco y Calamocha ta la parzelazión, rompedura y benda a particulars de cuasi toz os praus d´as pardinas de Gascones y Entrebasaguas, esdebenienzia estorica estudiata por Emilio Benedicto Gimeno en un triballo publicau en o lumero 17 d´a rebista XILOCA (se beiga ra Bibliografía). Tántos y tan grans plegoron a estar os cambeyos en a zona que dica s´esbarró lo cauz d´o Xiloca enta lo d´a zaica de la Revilla, en o sieglo XIX, como mos ne rezenta lo siñor Benedicto en o triballo debandito y plegando ta ista rematanza:

05 Puente medieval sobre el Pancrudo. Puen meyebal sopre o Pancrudo

Puente medieval sobre el Pancrudo. Puen meyebal sopre o Pan Crudo

“En nuestros días, si paseamos curiosamente por los restos de los milenarios prados de Gascones y Entrebasaguas, podemos encontrar algunos bosques fluviales a la orilla del río y numerosos vagos en los que crecen libremente los pastos. La mayor parte está roturado, pero sus cultivos nos recuerdan su anterior naturaleza, predominando las plantaciones de chopos madereros y de maíz, dos plantas que soportan muy bien la humedad. De vez en cuando surgen algunos pozos en los que, a muy poca profundidad, se puede ver reflejado el rostro de quien se aproxima. Y las ciento de pequeñas acequias, constantemente entrelazadas y reforzadas en ciertas zonas con plásticos impermeables, se preguntan perplejas si fueron creadas para regar la tierra o, desmintiéndose a sí mismas, para desecarla”. (XILOCA-17, pax.93).

Cartel en Entrebasaguas. Retulo en Entrebasaguas

Cartel en Entrebasaguas. Retulo en Entrebasaguas

En a zona d´a compleganza de ros dos arrius lo más remarcable, autualmén, ye a esistenzia en total proxemedá de tres puens sopre lo Pancrudo (o d´a carretera nazional, o Puen Romano (en a biya Caesaraugusta-Castulo) -posiblemén modificau en a Edá Meya- y lo d´o fierrocarril) y o “sifón” d´a zaica “Molinar”, que i pasa por debaxo de l´arriu dende fa sais sieglos.

07 M. Martín en el puente medieval de Entrebasaguas. M. Martín en o puen .jpg

M. Martín en el puente medieval de Entrebasaguas. Migalánchel Martín en o puen meyebal de Entrebasaguas

Mesmo ne b´ha de teyorías qu´esfienden que lo Puen Romano antis más yera sopre lo Xiloca, pero que dimpués d´esbarrar-lo l´arriu Pancrudo “s´apoderó” d´o biello cauz y “empezipió” a pasar baxo lo puen (Articlo de David Navarro Vázquez en XILOCA-13, se beiga ra Bibliografía).

09 El puente medieval y del ferrocarril en el Pancrudo. d'o fierrocarril

El puente medieval y del ferrocarril en el Pancrudo. O puen meyeban y d’o fierrocarril en o Pan Crudo

Ista biella poblematica de cauzes y zaicas desembolicó en a zona lo chocante mestier de “endrezador d´arrius”, como se pué leyer en a decumentazión antiga, por exemplo ra estudiata por Mª Luz Rodrigo Estevan (se beiga ra Bibliografía) d´a qu´entrequitan -como contrimuestra- bels parrafos de ros “Capitoles fechos e firmados (en 1480) entre los herederos siquiere tierras tenientes en la Guerba del lugar de Villadolz desde la puente del dicho rio, la qual puent affruenta con pieça de Johan Meder de Romanos e con pieça de Johan de la Ran, de Maynar et con el camino que va al mont ant´ariba fasta la boca et punta del Rio Nuevo que está fecho en la pieça de Johan de la Ran desus de La Longuiella, de la una part, ET PASCUAL DE SEGURA MAESTRO DE ENDREÇAR RIOS VEZINO DE LUQUO, de la otra part, en et sobre el endreçamiento del dicho Rio de la Guerba desde la dicha puent fasta la dicha punta….. el dicho maestro Pascual de Segura sea tuvido et obligado de abrir et endreçar el dicho rio XVIIII palmos de boca et de somo fasta baxo X palmos et de fondura agua corrient…..” (XILOCA-20, p. 71).

09 El puente medieval y del ferrocarril en el Pancrudo. d'o fierrocarril

El puente medieval y del ferrocarril en el Pancrudo. O puen meyebal y d’o fierrocarril en o Pan Crudo

Por o puen fierrobiyaire pasó la linia d´o “Ferrocarril Central de Aragón”, de Balenzia ta Calatayú, y no lebaba guaires meses funzionando cuan i escaizió lo sonau azidén d´escarreradura d´un esturraz (22-VI-1904) que os chirmans DE JAIME LORÉN esplicotian en o libro suyo “Os berdes beranos”, seguntes lo que lis n´eba rezentau a lola d´els, qui yera de Luco (se beiga ra Bibliografía):

“….. D. Chuan, que beyeba la poqueta augua que baxaba por l´arrigachuelo (lo Pancrudo), maldito lo caso que feba d´istas charradurías, y asinas atrapazió un chiquet y estreito puen con alizazes no guaire fundos.

    

10 Los puentes sobre el Pancrudo. Os puens sobre o Pancrudo

Los puentes sobre el Pancrudo. Os puens sobre o Pan Crudo

Por o que se beye, iste buen siñor esconoxeba que a cuenca de o Pancrudo yera de muito tiempo esforestada y cuasi no bi´n eba d´arbols que aturasen a erosión que trayen as temibles tronadas de os beranos. Istas arrozegan l´augua y os zaborros por ramblas y ramblizos dica lo caxero, que se mete, asinas, con buena cosa d´augua abanzando con empente y rancando cuanto troba de camín.

 

11 Vías sin destino. Camín sin de fierro

Vías sin destino. Camín sin de fierro

Inaugurada la línia ferrea, en uno de os primers trens iba o debandito D. Chuan, barios relixiosos escolapios y un buen amiro de biachers. Aquella tardi eba cayiu en toda la redolada un firme chaparrazo d´augua y o río Pancrudo cuasi tapaba o güello de o puen de o ferrocarril. Dende Luco trucoron l´alarma ta la estazión biella de Calamocha y le se comunicó a lo mainate de o comboi o risque que teneba de cruzar o puen de Luco (Entrebasaguas). Yera ya de nueis cuan se fazioron as delibrazions dica que, una miaja orgüelloso, l´incheniero (D. Chuan) dió orden d´abanzar baxo a suya risponsabilidá.

 

Cartel explicativo. Retulo esplicatibo

Cartel explicativo. Retulo esplicatibo

Pando, o tren s´enchegó, nabesó a Serrana y, por o Salobral, plegó ta lo puen que s´esboldregó baxo lo peso de a locomotora y de os bagons, que s´abentó con os suyos ocupans enta las auguas de a riada. A esferra estió grandisma, pos yera de nuei zarrada, y entre a plebia, l´airera y a fosquera, os treballos de salbamento yeran pro difízils. Rezentaba la yaya cómo se sentiban as aclamadas de os ferius, pillaus entre os fierros y as maderas. Triste nuei pa toz os de o lugar que feban d´aduyar a os sobrebibiens, y prebando de rescatar os calabres que bi yeran baxo as auguas…..”

 Los puentes del Pancrudo desde la desembocadura. dende a compleganza

Los puentes del Pancrudo desde la desembocadura. Os puens d’o Pan Crudo dende a compleganza

Anque as dixendas y remors populars charroron de muitos muertos, sólo end´abió que zinco. A refeitura d´o puen estió ya una costruzión muito millor, encá esistén, pero de raso malmesa pos a linia dixó de funzionar lo 1.984.

Chopos muertos en la acequia Molinar. Choplos amortaus en a zaica Molinar

Chopos muertos en la acequia Molinar. Choplos amortaus en a zaica Molinar

Os Tocayos alparcan en una choplera á canto d´a carretera, s´amanan ta l´armita d´a Birchen d´o Rosario (d´os sieglos XVII-XVIII, pro molimental) y dimpués por un camined dica l´arriu Pancrudo; por a suya marguin ban plegando ta os puens romano y fierrobiyaire, la zaica molinar de Luco y ta la compleganza d´o Pancrudo con o Xiloca, liyendo de paso bels retulos entrepetatibos que se´ndi ban alcontrando. Dimpués d´afotiar abastablemén tot, se´n tornan ta l´auto y s´amanan ta lo bizín Luco, do chitarán una rapeda güellada y bel par d´afotos.

15 La desembocadura en el Jiloca. A compleganza en o Xiloca

La desembocadura en el Jiloca. A compleganza en o Xiloca

Luco de Xiloca (d´o latín LUCUS: “selba preta y zarrada”, tamién poderba esdebenir de LUG -dios d´a natura d´os zeltas- con o sinificau de “selba sagrata”; unautra azeuzión sereba LUCU “lucar”). Luco ye una lucalidá d´o monezipio de Calamocha (10 kms.) en a comarca d´o Xiloca, con 94 abitadors, a 847 mts. d´altaria y a 80 kms. de Tergüel capetal.

A os de Luco lis izen “Zancarrones” y “Malos vinos”.

Se conoxen dos ditos referius a o lucar:

“Los de Luco, una peseta y un corrusco”.

“Los de Luco, una vez y basta”.

Tamién son sonatas bellas liyendas como a d´o “Belatorio de Luco” y belunas de bruxas, rezentadas en o libro “Os berdes beranos” de os chirmans DE JAIME LORÉN.

O casalar de Luco crexió refirmau en o mon, en a solana. Enfruén d´a localidá s´estendilla una ampla planera berda, güen regano d´as auguas d´o Xiloca.

16 Iglesia de la Asunción de Luco de Jiloca. Ilesia de l'Asunzión

Iglesia de la Asunción de Luco de Jiloca. Ilesia de l’Asunzión de Luco de Xiloca

Aturan un momentico en Luco, parando cuenta ascape en a ilesia parroquial de l´Asunzión de Nª Siñora, barroca d´o sieglo XVII, con torre de tres trampos, nau zentral y cupulas chiminucas ta os costaus.

17 Casa Grande de Luco de Jiloca con escuto d´o linache d´os Alava

Casa Grande de Luco de Jiloca con escuto d´o linache d´os Alava

Antimás bi ha edefizios intresans como lo casal-palaz d´os marqueses de Montezuma, d´estilo renaxentista aragonés, a badía -gotica, con polida portalada- y o casal d´o linache de “los Alava”, con rafe de fusta triballada y escuto entretallau en peña.

Seguntes a “Cursa Melitar” d´Antonino, Luco yera en a rota d´a calzada romana de Cordoba ta Zirigoza.

Os moros remanioron en istas tiarras durán sieglos.

Alifonso lo Barallador las crestianizó a partir d´o 1.123, repoblando-las con nabarros, gascons y aragoneses pirinencos.

Lo 1248 s´esligama de Daroca por prebilexio de Chaime I, acorporando-se-ne ta la Sesma d´o Xiloca d´a Comunidá d´Aldeyas de Daroca, que pendeba d´o rai dreitureramén; ista situgazión s´apolargará dica la muert de Ferrando VII, lo 1833.

18 Aldaba de Luco.Trucador de Luco

Aldaba de Luco de Jiloca.Trucador de Luco de Xiloca

As fiestas grans son en onor á San Félis, lo 31 de mayo, anque se i zilebran en agosto, ta la Birchen d´o Rosario. Cal risaltar como tradizión siñalera as garrastolendas de “los Zarragones”. En a suya fuga, antis d´a guerra zebil, se carauterizaba por a entrebenzión de tres collas de presonaches locals en as que i partizipaban os bizins d´o lucar a tutiplén y, mesmo, ta la zilebrazión se i zarraba la escuela.

O Carnabal de Luco de Xiloca estió recuperato lo 2003 por l´asoziazión cultural “Zarragones”. D´un triballo de repleganza de dita asoziazión en Entrerrete en han trigau os datos rilazionaus encontinén:

19 Carnaval de Luco. Zarragón.(Foto de la pág. web xiloca.com)

Carnaval de Luco. Zarragón.(Foto de la pág. web xiloca.com)

ZARRAGONES: istos son os presonaches más importans, pos mesmamén con iste nome se conoxen as garrastolendas en Luco. Ripresentan o costau goyoso d´a bida. Lur bestimenta son telas de zacutos u arpillera replenas de palla, cubillando tó lo cuerpo; por denzima ba un gambetico y entremeyas de os dos matierals un replenizo de palla qu´aparenta una gran chiba. Arredol d´a zentura se i meten bellas esquillas que fan sonar de trazas suyizas. Se tapullan a cara con una redicula mascaruta y a capeza la zaboyan con un chapelero. Ban furnius d´una tranca y encorren a mozez y chen gran. Antiparti, ye fazil de biyer a rilazión u parentizia d´o termino “Zarragones” con bocables d´a cultura pastoril, como “zarrios”, “zamarra” u “zagones”.

20 Carnaval de Luco. El Diablo (O Diaple) (Foto de la pág. web xiloca.com)

Carnaval de Luco de Jiloca. El Diablo (O Diaple) (Foto de la pág. web xiloca.com)

DIABLOS: son presonaches enfrontinaus de raso ta os Zarragones; os “Diablos” son tristons e, mesmo, maldinos. Lur bestimenta se composa de sayas negras y biellas e inauguas blangas que fan de chambrot. Se tiznaban a cara de negro de tó y se plantificaban en a capeza una güeina u chapelero. Se ficaban en o morro uns dientazos feguraus de trunfa y marchaban aparatiando con estixeras d´esquirador, que ubriban y zarraban armando una escandalera fieriza. Roldaban de nueis por o lucar, mesmo dentrando po´las casas ande qu´abeba mozetes chicotons.

21 Carnaval de Luco. Madamas.(Foto de la pág. web xiloca.com)

Carnaval de Luco de Jiloca. Madamas.(Foto de la pág. web xiloca.com)

MADAMAS: son a bersán fembra d´as garrastolendas, partizipando-ie sólo que con a fin de fer güena burina. Bi eba dos collas de mullers: a primera yeran “d´o común d´a chen”, que lurs disbrazes se composaban d´una siellica plantificada en a capeza, zaboyada con un cobertor u troca -mena de tunica- que lis cubillaba tó lo cuerpo. A segunda colla de mullers yeran “d´a chen de bara alta”, con disbrazes composaus con o millor d´o milloret d´os quirrizios y bestimentas d´ellas.

Os Zerris lis deseyan a os Zarragons muito esito en esdebenideras garrastolendas.

Anuncios