12. Sos – Sesué

Sos (esdebien del llatín SUSUM-SURSUM: “entalto”, barián de SUS: “alto”) ye un llugaret pertenesién al munisipio de Sesué, a 134 kms. de Güesca capetal, a 12 kms. de Benás y a 1.220 mts. d´altaria. Tien 23 abitadors.

Vista de Sos, al fondo Tuca de Cambras y derecha Tuca des Corbets. Ambista de Sos; enta´l fundo la tuca de Cambras y enta la dreta la tuca d´Escorbets.

Sos puestá qu´estase un pobllau d´els “Sosiates”, tribus abitaderas de las espllugas. A primers del sigllo XI, Sos yera el núcllio més antigo de la Balle Sositana, perteneseba a Bilanoba y yinclluyiba Sarllé y Benás. Se´n daban trasa t´ateserá-lo tot: es paixenters a las terras del norte, es camps de serials a´l sentro y es biñals a´l mesdia.

M. Pérez y M. Martín delante de la Iglesia de San Andrés de Sos. Migalánchel Pérez y Migalánchel Martín debán de la illesia de San Andreu de Sos.

Per ixas engüeltas del sigllo XI, a´l 1.016, ye asasinau el conte de Ribagorsa, Guillén Isárnez, la suya prima Doña Mayor ba guberná a´l suyo nom la Balle Sositana y s´eba maridau en el conte de Pallars, Raimón III. Bells ans dimpuesas, en está rebuyada pe´l suyo mariu, se´n ba quedá a la Ball encara que, al poc, ba está forachetada per una rebatida d´es abitadors, fuyín ta la suya terra, Castiella.

Arco de piedra del año 1571. Arco de pedra de l´an 1.571.

Sos ye pllantificau a la pllanera susana d´un pueyo; l´auto lo dixan a la pllasa Sositania. Desiguida paran cuenta qu´el llugá ye mol majo, s´aproseman ta la corona´l llugá, an que i son la illesia y l´armita; pe´l camino beden una arcada y una lloncheta de güen pedrame d´es ans 1.571 y 1.792.

Pórtico de piedra del año 1792. Porchegau de pedra de l´an 1.792.

La illesia de San Andreu poría está d´estilo romanico, del sigllo XII y ye feta sobre la solera d´unaltra, encara qu´en i ha abeu de refeturas a l´arreu d´els sigllos. A la lloncheta -d´aparensia renaixentista- igué posada la data de 1.658.

Portada renacentista de la iglesia de San Andrés de Sos. Portalada renaixentista de la illesia de San Andreu de Sos.

A ista ora de la tardada, dende un miradó al costau del llugá -entre la illesia y l´armita- el panorama enta´l mesdia ye marabilloso, en bistas ta l´Esera, la grandaria de la Ball entre Bilanoba y Castilló de Sos y un impresionán paisache de neta berdor primaberal, arredoltiau de choperas, salses, selbatons, montañas, riu….

Castejón de Sos,a la derecha el Tusal de Baziero, al fondo el Turbón. Castilló de Sos; enta la dreta el tusal de Basiero y enta´l fundo el Turbón.

L´armita més biella ye la de la Birchen del Puy, a la que beniban abans tamé els besins de Ramastué y Erisué; l´altra, la que ban a coneixé, ye la de Santa Llusía.

La Ermita de Santa Lucía, al fondo el Gallinero. L´armita de Santa Llusía, enta´l fundo el Gallinero.

La fiesta gran ye la misma que a Sesué, del 20 ta´l 25 d´agosto, el 22 se fa misa baturra y una ronda. La fiesta chicota de Sos ye el 30 de nobiembre, San Andreu, mantenín-ie el costumbre de que a mitat del ball els mayordoms desaparesen pe´las carreras y se´n tornan d´es güerts en unas fuellas grans com tricallons.

Santa Lucía en su ermita. Santa Llusía a la suya armita.

Diquia en fa no guaire de tems ñeba una cofradía qu´achudaba a´ls malichots, lo cual que le´l donaban un campo ta en fé diners. Se feba una misa pe´ls pasats el primé dimenche d´otubre y cada dona de la cofradía i resibiba un llitro de bino.

Ta San Chuan se feba güen foc a la pllasa y a l´armita de Santa Llusía.

Un pajar en Sos. Un pallero a Sos.

Seguntes el llibre “Toponimia de Ribagorza, municipio de Sesué” de J.M. de las Pueblas y María A. Hidalgo, els noms de las casas de Sos son:

Abadía, Alnona, Caballera, Carpintero, Casalero, Caseta, Chongrán, Espada, Fenero, Forringas, Garsía, Guillem, Ixeia, La Mora, Pascual, La Pllana, Rafel, Tramiga y es posible que casa Francho.

Nombre de una casa de Sos que coincide con la Tuca que está justo encima de Benasque, además de ser el nombre de la hija de l'amigo José Luis. Nom d´una casa de Sos ensertadero en el de la Tuca que ye chusto per ansima de Benás, antimás de estar o nom d'a filla de l'amigo Chusé Lois.

D´iste llibre, els toponimos de Sos que les ie chocan més son:

Costera d’Arguilers, Artigalaigua, Borrascal, Prau Carramolins, Barranco Chico, Partida Chilater, Partida de la Corona, Las Costeras, La Cuasta, La Faixa Ferrero, Prau la Farray, La Filadera, Las Forcas, Prau de Francho, Fuertepueyo, Prau l’Ordial, La Paga, La Pagul, Borda Piñana, Prau el Recastiello, La Tallada, Tisiarra, El Tusal.

Torre de la iglesia de San Andrés de Sos. Torre de la illesia de San Andreu de Sos.

A´ls de Sos les disen “fartafabas” y tienen iste dito lligau en Sesué:

“Pitarroy que s’escapa de Sos / y pilsán de Sesué / ya saben lo que ye padesé”.

Tamén conserban ista frase respetibe a altras llocalidats:

“Los de Graus, guardaus; los de Benás, lleban la coda arrastro y comen rebasto; los de Sahún son trabúcs; los de Seira, paneres; los de Sos, de dos en dos”.

M. Martín delante de la Iglesia de San Andrés de Sos. Migalánchel Martín debán de la illesia de San Andreu de Sos.

L´abitadó de la Ball, cuan quiere sabre el tems que fará, en diu: “a bere qué cara fa el mon” y lligats en iste, dos refrans: “Boiras royas per la nit / serenera en el maitino” y “El sol t’al ibert / ye mol peresoso / se llebanta tardi / y se cheta pronto”.

De Sos enta Sesué yay menos de 4 kms., tot baixán.

Sesué (posibllemén esdebien de SOS en acabansa bascona -OI: Sosoi-Sesuei-Sesué; u del nom de persona “SISSUS”, coneixeu a inscrisions de la Galia
Transalpina) ye un llugá en Achuntamén propio al que pertenese Sos, a 133 kms. de Güesca capetal, a 11 kms. de Benás y a 1.050 mts. d´altaria. Tien 138
abitadors.

Mapa de la zona. Mapa de la redoltada.

A l´articllo firmau per “El Cogulo” a la rebista La Mancheta (1.985) i escribe sobre Sesué:

“Sesué ye un llugá del ball de Benás al que si queda mol poca chen si se compara dan els ans pasáus. Al encomensá iste siglo yeba més de 200 personas, güé no mes ni queda uns 50. Fa uns ans yeba teixidós, sastres, farrero,… Güé la chen biu del bestiá, sobre tot de las bacas”.

Vista de Sesué. Ambista de Sesué.

Sesué ye pllantificau al costau del riu, a l´endret de Bilanoba. Els edifisios son masa mudernos, per mor de las casas nuebas fetas ta´l turismo. Tien
illesia romanica d´inflluyensia llombarda y las armitas de San Per y San Sadornín.
La fiesta gran ye ta´l 25 d´agosto en onó de San Chinés, en misa, prosesión y ball. El 19 d´agosto i fan el Mallo: la chobenalla ban ta un selbatón ta
i tallá un abre dreto y altero que quillarán a la Pllasa Mayó. Ta l´armita de San Sadornín ie ban el 1 de mayo.

Seguntes el mentau llibre “Toponimia de Ribagorza, municipio de Sesué”, de J.M. de las Pueblas y María A. Hidalgo, els noms de las casas de Sesué son:
Abadía, Agustín, Antón, Baso, Betrán, Bitorina, Bielsetana, La Borda, La Borda d’Alto, Caseta, Chaime, Chinés, Chuanica, Consensión, Corredor, Cristela, Elías, Esperanseta, Farrero, Franchet, Fustero, Gaspar, Güil, Juanabaso, Lamora, Llibrada, Manolet, Manolo, Manuel, Margarita, Mariana, Marquet, Meregildos, Mestrichoán, El Molino, Morens, Negüé, Pascualet, El Pelaire, Pepe, Petronila, Pey, Porté, Ribera, La Soltera, Teixidó, Toño, Visenta, Visente.

Del mismo llibre, es toponimos de Sesué que més les chocan son: Partida de las Alforchas, Partida las Baches, Fuen de la Basa, Partida de Bets, Partida de Camporredono, Pico el Castellaso (leyenda, desde aquí tiraban los moros bolas de fuego), Partida de Chisnegüé, Partida de Chongairí, Prau de Corbeta, El Coronaso, Griscuén, La Feixana el Castellaso, Fuendedía, La Marradeta, El Molsar, Pllana Chinchuán, El Pueyo, Las Puyadetas, Puyiella, El Quixigar, Las Supilleras, La Tella.

A´ls de Sesué les disen “Paputs” y “Zalandrais” u “Falandraixos“.
Tienen un dito: “De sastres y tixidors / presumen els de Sesué / el que les da moltos doblóns / el siñó Ramón de Negué”, y ist´altro que les cantan els de Sos: “Sesué, pomas y peras y qué”.

El pai y el llollo le diban al cagañedo chicot, agafán-le-ie es dits de las mans: “Iste ye el pai / iste ye la mai / iste fa sopas / iste se las mincha totas / iste fa tilin, tilin”.
Yay una esprisión respetibe a cuan belluno se muere: “Ta ixo biaje, no eban d’amenisté alforcha”.

Del sobregüen llibre de poemas y narrasions en patués “Ta las fuens me´n boi” del escritó naixeu a Sesué, José Mª Ferrer Fantoba, en esllichen la poesía
titolada “Son palabras d´aquel Aragón d´allá galto”:

“Son palabras d’aquell Aragón d’alla galto.

Palabras de sudó, de sueño y de risa / qu’enruna la terra y que se fan uniberso.

Palabras de Aragón / ta charrá de montañas, de mainada y d’ausensias.

Palabras, fillas de pay de may latins, / primas del catalán, del castellano, del fransés, / agarradas a las tucas, als abets y a las bocas.

Palabras de roca, de neu y de ome / que ban sabre caminá per aquells asagadós, / biure dichós de las tronadas, / y que queren cantá t’Aragón”.

T´acabansa esllichen, tamé de l´escritó J.M. Ferrer, el sagué parrafo de la narrasión titolada “El tractó y la memoria” que ba sé premiada a 1.983 a´l
primé premio lliterario “Guayén” del Concurso de Narrasions en Patués:

“…La memoria fa sentí las fragansias d’antes…La memoria fa escultá el canto, els grits, els siulos dels grills, dels saltics, dels muixons…La memoria fa bere els sudós dels pays y dels abuels. La memoria mos amostrará de agón benim y qui som…Corre prisa entrá a casa d’ella perque ya encomensa a tinre ans y…”

Marchan enta Conques ta i fé una escorseta, en ye a 10 kms.

Anuncios