3. Lo Moncayo. Puyada ta la Tuca

22-VIII-2.009. Ixen de Zirigoza os tres -M. Pérez, M. Martín y A. Barberán- endreza Logroño por la N-232, durán 52 kms.; se´n esbarran por la N-122 endreza Soria, durán 26 kms.; tornando a esbarrar-se-ne por la Z-372, dica plegar por Bera de Moncayo dica lo Monesterio de Bergüela, en 3 kms.

Vista del Moncayo o Pico San Miguel (2.316 mts.). Ambiesta d´o Moncayo u Pico San Migal (2.316 mts.).

Dend´astí, a 660 mts. d´altaria, por una carretera que s´adintra en o Parque Natural de la Defesa d´o Moncayo, puyan mientres 25 kms. -os 7 zaguers ya bi ye pista- dica la Gospedería y lo Santuario d´a Birchen de lo Moncayo, a 1.620 mts. d´altaria.

Dixan l´auto alparcau a bels 200 mts. d´o Santuario, dende do prenzipiarán la puyada enta lo Moncayo.

Croquis del itinerario a la cima del Moncayo. Espunte d´a cursa ta ra tuca d´o Moncayo.

CURSA TA LA SUSANA D´O MONCAYO U PICO SAN MIGAL

BASE: Santuario de Nuestra Siñora d´o Moncayo (1.620 mts.)

DESTÍN: Zemera d´o Moncayo u Pico San Migal (2.316 mts.)

ESLIBEL: 696 mts. en 2´5 kms.

DURATA: 1 ora 45 menutos (ita)

DIFICULTÁ: chiquica (lebar precura con as rechiradas rebatosas de l´orache)

Cal prener lo sender surtién ent´a cucha d´o santuario y gospedería, chunto ra fuén de San Gaudioso. Lo sender ba puyando y en bels menutos chira ta la dreita, pasando por denzima d´un esperringlero anomenau “el Cucharón”, peña que ye chusto por denzima d´o Santuario d´a Birchen. A la meya ora de puyata se´n ban rematando ros arbols; enfruén se i beye lo “Pozo San Miguel” -fondonera creyata por un antigo ziércol glaziar- y ta la cucha se i contina por o sender qu´en fortal puyatera menará en 1 ora colata enta la tuca de Moncayo.

Abanzan bels metros dende lo Santuario t´amanar-sen dica la fuén de San Gaudioso. Dend´aquí, por endrezera bian marcata, ban caminando pandamén remuntan-do-ie la Peña Negra d´o Cucharón y dentrando en a bosquera. Durán güena ratera marchan implazers, arredoliaus de pompuda bechetazión, baxo ra mosquera de bels abez e -más que más- pins, e pasando al canto de matulleras como lapazualas e manzaneras salbachinas.

M. Pérez y M. Martín junto a unos pinos camino del Moncayo. Migalánchel Pérez y Migalánchel Martín a lo canto d´uns pins camín de ro Moncayo.

Aprofeitan ta discansar un momén a lo que se´n pesguardan de que ra bosquera s´aclarex y disparix y, con era, la guambra mosquera; ya en ixas, b´alufran a mañifica ambiesta d´o puzo u ziércol glaziar de San Migal, u Cullarón.

M. Martín, M. Pérez y Alfredo en el circo glaciar de San Miguel. Migalánchel Martín, Migalánchel Pérez y Alfredo en o ziércol glaziar de San Migal.

Dimpués d´iste discanso lo camín, entre tarterals y enta la cucha d´o ziércol, esdebiene cullebrero por una repingata costera qu´en lo suyo empieze Alfredo -perén a l´aguait- i troba ascape fragas salbachinas, lo cual qu´en i tastan belunas.

En primer término Alfredo, después M. Martín, al fondo somontano norte. En primer plan Alfredo, dimpués Migalánchel Martín, enta lo fundo lo semontano norte.

A l´arreyo d´a puyada ban fendo-ie cualques aturadetas. En os trampos zaguers i acucuta ra lomera güegatiza con l´atro puzo más chicotón -lo de San Gaudioso-, espleitando-ie de lo paisache entre os dos ziércols.

Circo de San Gaudioso, al fondo somontano sur. Ziércol de San Gaudioso, enta lo fundo lo semontano sur.

Arriban en o sarrau de San Chuan (2.260 mts.) e redolían lo ziércol d´o Cucharón, coronando-ie la susana de San Miguel, punto más altero d´o Sistema Iberico.

Cerro de San Juan (2.260 mts.), al fondo el Moncayo o Pico San Miguel (2.316 mts.). Sarrato de San Chuan (2.260 mts.), enta lo fundo lo Moncayo u Pico San Migal (2.316 mts.).

En aber puyau n´istas engüeltas de l´añada no´n han teniu de poblemas, e con os debanmentaus discansez l´han feito en dos oras colatas; ye esclatero que de berano cal aprofeitar os maitíns, pos de tardis poderban i atraziar-sen tronadas.

Al fondo el Moncayo o Pico San Miguel (2.316 mts.) Enta lo fundo lo Moncayo u Pico San Migal (2.316 mts.).

Lis truca pro que n´istas puntas tasamén i corre l´aire pos lo que gosa sonar, por un regular, ye que n´istas alturas i sofla la bentolera de contino; lo cual que güé ye d´agradixer ista calmura, ta poder charrutiar y almirar as ambiestas más tranquilez.

En la cima del Moncayo, Alfredo, M. Martín y M. Pérez en la torreta que indica el vértice geodésico (2.316 mts). Al fondo, los Pirineos. En a zemera d´o Moncayo, Alfredo, Migalánchel Martín y Migalánchel Pérez en a torreta qu´endica lo bertiz cheodesico (2.316 mts.).

Lo que no cambeya pas de ras atras begatas ye lo tipico gallinazo, emboiramién finico que no i dixa atisbar esclateramén l´orizón e i priba d´alufrar, entre atras panoramicas, os Pirinés. Con tó y con ixo l´ambiesta ye impresionán, os lucars bizins se i beyen menutez, os lexanos se i barruntan, e la visual enta l´ampla camparrera i enzuriza la ensonianza.

Desde la cima del Moncayo, la Meseta de Castilla. Dende a susana d´o Moncayo, la Meseta de Castilla.

En diyas bian aclarius se´n esen puisto i biyer esclateramén: enta lo norte ros Pirinés e la Bal de l´Ebro; enta l´este as Siarras de Montalbo, Tablau y la Birchen; enta lo güeste los Picos de Urbión, Sierra Cebollera y San Lorenzo; y enta lo sur o Macizo Central y la Meseta de Castilla; y, pro que sí, os lucars d´o Semontano d´o Moncayo, d´Aragón e de Soria.

Desde la cima del Moncayo, las sierras de Montalbo, Tablado y de la Virgen. Dende a zemera d´o Moncayo, as siarras de Montalbo, Tablau y d´a Birchen.

A baxata la fan amonico, tastando-ie lo retantador paisache que han debán os güellos. Dentrando por as primeras mosqueras d´a selba -pasau lo puzo San Migal- se bi escunzan con un amiu de M. Pérez: Chusé Lois, qui ba alcompañato por a suya apreziata familia. Lis fa goyo d´i enzertar a trobar-sen, e más por istos paraches, espalatiniando-ie un raté coradalmén.

Desde la cima del Moncayo, pueblos del somontano norte. Dende a tuca d´o Moncayo, os lucars d´o semontano norte.

Rematan a escorsa una miallica cansos, pero goyosos d´aber-la feito chuntos. Jopan a chintar un poquico más abaxo, enta la zona d´Agramonte (1.080 mts. d´altaria), do s´achuntan as carreteras de Tarazona, Bera y San Martín. Aquí, de sobremesa, besitan lo “Centro de Interpretación del Moncayo”, en o que s´amuestran as baluras naturals d´a Paquiza d´o Moncayo, cheoloxía, fauna y flora, con o lamín adibiu d´un audiobisual.

De tornata cara ta casa aturan en l´entrador d´o Monesterio de Bergüela. No han enzertau pas con a mingala de biyer-lo, pos en istas se i zilebra lo conzierto de “Urna & Ensemble” (Mongolia), drento d´o Festibal Entrenazional de Mosica “Veruela Música Viva”; isto fa que güé no lo puedan besitar. Con tó y con ixo, amostrarán contino bels datos estoricos d´o mentau monesterio.

Junto a la entrada del Monasterio de Veruela y Torre del Homenaje, Alfredo, M. Martín y M. Pérez. Chunto l´entrador d´o Monesterio de Bergüela y Torre de l´Omenax, Alfredo, Migalánchel Martín y Migalánchel Pérez.

En Aragón se creyan en a Edá Meya bellas fundazions relichiosas, empentadas por os rais d´Aragón con prebilechios e dotes. Os dechusmentaus pertenexeban a la Orden d´o Zistel, indizcata por a de San Bernardo; lo primer, lo Monesterio de Bergüela, fundato lo 1.146; Rueda lo 1.153; Piedra lo 1.194 e Santa Fe de Cuarte lo 1.223. Antiparti se´n arixioron os monesterios de fembras de Trasobares, lo 1.168, (pendién de Bergüela, pero con dominio sobre Tagüenca y Aguarón) y Cambrón en o sieglo XIII.

Os primers monches zistelzienses de Bergüela i plegoron lo 1.171 y alixenzioron la repoblazión d´as redoladas güegatizas poco poblatas, alportando-ie nuabas baluras relichiosas e de mena economica y pulitica. Con a “Desamortización” de Mendizábal lo 1.835, e dimpués d´aber-lo almenistrau en toda la suya estoria 106 abates, lo monesterio estió albandonato dica que os chesuitas -qui yeran estaus os zaguers residens astí- lo tornoron a acupar lo 1.878. Lo 1.973 Bergüela pasa a la Deputazión Probinzial de Zirigoza, recuperando-lo y mantenindo-lo de marabiella.

Torre del Homenaje, de la Iglesia y Muralla del Monasterio de Veruela. Torre de l´Omenax, de ra ilesia y muralla d´o Monesterio de Bergüela.

Bergüela ha una feitura aspriza, sin de guaires ornamens escultoricos, pero i percuten as suyas proporzions. A muralla que redola tot lo monesterio ye d´o sieglo XVI, a ilesia ye considerata romanica con tres naus deseparadas por colunnas sustenederas d´arcadas de meyo punto, e lo claustro ye gotico. A la finitiba, lo conchunto molimental i amuestra una armonía grañaza.

Dende lo Monesterio de Bergüela marchan ta Zirigoza por o mesmo camín d´a ita.

Migalánchel Martín, Milio Grazia, Migalánchel Pérez y Alfredo Barberán. Pilar 2009.

RESUMINDO: han puisto menar ta prefaizión la delera de puyar chuntos ta lo Moncayo, alcompañatos de muito güen implaz por l´amiu  Alfredo. L´orache ye estau sobregüeno y en han esfrutau pro d´a escorsa. Ta rematadura perfeuta d´iste güen diya esen quiesto dentrar ta lo Monesterio de Bergüela pero, disgraziatamén, no ha puisto estar.

Anuncios