6. Risultas d’a baralla

Mureth suposa la trencadura y albandono de l´angluzia d´a Corona d´Aragón sopre os territorios dillá d´os Pirinés e, seguntes Michel Roquebert, a fin d´a posible constimezedura d´un fortal raino aragonesoczitán (a “Gran Corona d´Aragón”) qu´ese cambeyato la cursa d´a Estoria.

Monolito en forma de obelisco que recuerda la batalla de Muret. Peirón con farchas d´obelisco que remera la baralla de Mureth.

Monolito en forma de obelisco que recuerda la batalla de Muret. Peirón con farchas d´obelisco que remera la baralla de Mureth.

Simón de Monfort replega es biscondatos de Carcassona y Béziers, lo condato de Tolosa y lo ducato de Narbona, pero zinco añatas dimpuesas -lo 1.218- Monfort fenex en rezebir un peñazo chitato por as mullers esfensoras d´as murallas de Tolosa; un mes dimpués lo suyo fillo espara l´asitie de Tolosa y lo 1.224 li cal reblar e render as suyas posesions oczitanas ta la dinastía franzesa.

Muret. Mureth

Muret. Mureth

Pietro lo Catolico, escomulgato por o Papa que lo coronó, remanió enterrecato en os Espitalaires de Tolosa, prebablemén en a ilesia d´o Priorato adedicata a San Remichio e San Chuan; dica que lo 11 de Febrer de lo 1.217, Onorio III adempribia la demanda d´o rai Chaime I d´Aragón e lo Prior d´a Orden de l´Espital, a trucas de que no entrebenise pas melitarmén en os asities de Tolosa, autorizando lo treslato d´os suyos repuis, chunto con os d´atros noples, ta lo pantión reyal d´a Capiella de San Pietro d´o monesterio espitalaire de Santa María de Sichena, en Güesca. Lo rai Pietro quereba estar enterrecato n´iste monesterio.

Seguntes a Coronica de San Chuan d´a Peña:

“Fue soterrado en el monesterio de Sixena, el qual su madre Doña Sancha avía hedifficado et stablido convento de mulleres de la orden del Spital de Iherusalem”.

De camín enta lo monesterio de Sichena, os repuis d´o rai Pietro II d´Aragón estioron acubillatos en o monesterio-espital de Santa Crestina de Somport dica que i puyoron as monchas de Sichena a recullir-los. Lo calan en a sepoltura con una espata entre os brazos.

La tumba de Pedro II en el Monasterio de Villanueva de Sigena. Sepulcre de Pietro II en o monesterio de Billanueba de Sichena.

La tumba de Pedro II en el Monasterio de Villanueva de Sigena. Sepulcre de Pietro II en o monesterio de Billanueba de Sichena.

A estoria d´a tomba suya pasa por diferiens contorniellos, y os poquez repuis qu´en i remanen son apedecatos en o fosal común d´o monesterio. Güe lo sepulcre i remane buedo.

Simón de Monfort alzaba encá en costodia a Chaime, l´ereder d´o raino d´Aragón, qui eba quedato lo mesmo 1.213 popiello de pai e mai, en espiritar tamién a raina María de Montpellier. Debán d´ista situgazión, os noples d´a Corona d´Aragón demandan a Simón a torna d´o choben ereu, e nimbían ta Roma una embaxata d´o raino ta que b´entrebienga debán d´Inozenzio III. Iste desiche a Monfort a ritornanza de Chaime, la cuala se fa efeutiba a una delegazión d´o raino en Narbona, en a primabera de lo 1.214, entre os que se i troba Guillén de Montredón, Maistre d´es Templaires en Aragón, qui será l´encargato d´a tutela de Chaime I, estando educato en Monzón como rai dica la mayoría d´edá, que li ye reconoxita lo 1.218, cuan cumple as 10 añatas d´edá.

En bien poco tiampo, as tiarras oczitanas pasan de pender dreitureramén d´a Corona d´Aragón a pender d´a Corona de Franzia, anque l´alcordanza y lo sentimién en Oczitania d´a posible y feitible “Gran Corona d´Aragón” de Pietro lo Catolico, no disparix pas con él, pero lo nuabo rai Chaime I d´Aragón no fa mica plan d´esbandidura d´a Corona por o Midi, sino por o Mediterranio; encá más, lo 1.226 edita un decumén -a demandas d´o legato papal e lo rai de Franzia- por o que refusa ofizialmén a aduyar a es rebels oczitans.

Mapa de Europa de 1235. Aragón existe. Mapa d'Uropa lo 1235. Aragón bi esiste.

Mapa de Europa de 1235. Aragón existe. Mapa d'Uropa lo 1235. Aragón bi esiste.

L´Achuste de Corbeil siñato por o rai franzés Lois IX e l´aragonés Chaime I, lo 11 de mayo de lo 1.258, suposa la deleixa d´o rai d´Aragón d´es suyos dreitos en a mayor partida d´as tiarras oczitanas: Carcassona y lo Carcassés, o Rasés, Laurac e lo Lauragués, Termes e lo Termenés, Minerva y lo Menervés, Fenollet e lo Fenolledés, o castiello de Peirapertusa y o suyo terrén, Albi e lo biscondato de l´Albigés, Rodés e Rouergue, Cahors e lo Quercy, a zidá de Narbona y lo suyo ducato, es castiellos pirinencos de Puilaurens, Quéribus, Castelfizel y a tiarra de Sault, lo biscondato de Grèzes, l´Agenés e lo condato Venaissi, lo condato de Foix, lo marquisato de Provenza y as zidaz d´Arlés, Aviñón e Marsella y redolada.

A Corona d´Aragón mantién os suyos dreitos sopre os siñoríos de Montpellier, Carlat y Omeladés, manimenos lo 1.349 s´acorporan ta la Franzia. Lois IX deleixa d´os biellos dreitos feudals sopre os condatos de Barzelona, Urchel, Besalú, Ampurias, Conflent, Vic, Girona, Osona, Rosellón e Cerdaña. Antimás s´establix por primer begata una muga en os Pirinés, As Corberas, o Rosellón y a Cerdaña. Peirapertusa, Quéribus, Puilaurens, Termes y Aguilar, Montségur y atros sonatos castiellos cataros, antigas fortalezas reyals, marcarán durán cuatro sieglos as güegas. Rosellón y a Cerdaña s´acorporan ta Franzia lo 1.659, zagueras posesions d´a meyebal Corona d´Aragón en l´atra bersán d´es Pirinés.

Anuncios