3. Orichen d’a baralla

Lo Papa Inozenzio III -como capeza d´a Ilesia- repuya las creticas emplantillatas por os cataros, qui medran a redolé por bels endreiz de ra Crestiandá, más que más en os biscondatos de Carcassona, Albi, Béziers e Narbona y os condatos de Foix e Tolosa. Inozenzio III aprofeita ra enchaquia de l´asasinato d´o legato suyo, Pèire de Castelnou, lo 1.208, ditando una bula en a que crida la Cruzata cuentra es cataros, ta poder b´escorquitar la erechía y arronzar-se-ne ra Ilesia oczitana, fazilitando es parlamens, pero enzurizando la conquiesta d´a tiarra d´es erexes.

Mapa histórico de las Cruzadas. Mapa estorico d'as Cruzatas.

Mapa histórico de las Cruzadas. Mapa estorico d'as Cruzatas.

A Cruzata se fa en nome de lo Papa, refirmata por lo rai de Franzia e bisurata relichiosamén por l´abate de Cîteaux, Arnaut Amalric, antigo prior d´o monesterio de Poblet. Con iste prelau, l´exerzito cruzato dentra lo 1.209 en dominios de proteutors d´os cataros, es Trencavel, biscontes de Carcassona e Béziers. Inozenzio III ofrex as tiarras e biens d´istos, e lo ziel a qui muera en a luita, pero a lo que ban a troxar dengún d´es grans siñors s´apropia d´as tiarras conqueritas; os espritos feudals no beyen mica bian quedar- sen con ixas posesions.

Ta encapezar a Cruzata ye eslexito entre los noples cruzatos Simón de Monfort, conte de Leicester, estratega melitar de gran espedenzia e fidel a ra Ilesia; perfeuto, doncas, ta enrestir os territorios d´es contes de Tolosa e Foix.

A l´empieze de lo 1.211 Peiro II preba d´esmeyar en o pleito cualques begatas, con o compromís de casorio d´o fillo suyo, Chaime d´Aragón, -de 3 años d´edá- con a filla de Simón, Amiçie de Monfort; mesmo lo dixa en piñora a Monfort dica que seiga mozo feito, pero lo rai d´Aragón empezipia a barruntar que, a la finitiba, ra diplomazia con él no li ferá mica d´onra.

Muret. Mureth.

Muret. Mureth.

En april de lo 1.211 lo rai d´Aragón emologa ra suya aliganza con Raimón VI, conte de Tolosa, meyán lo casorio d´a suya terzena chirmana -Sancha d´Aragón- con o fillo d´o conte, Raimondet de Tolosa.

Seguntes a Coronica de San Chuan d´a Peña:

“Et la terçera (hermana) Sancha dio al fillo del dito compte de Tolosa e procreó della una filla, la quoal fue muller de Alfonso, compte de Pitheus, hermano de Lodevic, rey de Francia”.

A guerra enanta y Simón de Monfort enfila enta Tolosa, asinas qu´en setiembre de lo 1.212 lo conte Raimon VI, alcompañato por atros noples oczitans, marchan enta la Cort d´o rai d´Aragón ta demandar-li-ne d´aduya. O flamián esito de Pietro lo Catolico en a baralla de Las Navas de Tolosa chenera la mingala aparén ta una nuaba entrebenenzia y dende l´ambiesta presonal, pulitica, monarquica y familiar, encara más. Con istos abíos, en a Uropa d´empezallos de lo sieclo XIII, lo rai d´Aragón ye l´unico que paix poder retaliniar l´embordiello.

Poema histórico en lengua provenzal que relata los hechos de la Cruzada Albigense. Poyema estorico en probenzal que rezenta es feitos d´a Cruzata Albichesa.

Poema histórico en languedocian antiguo que relata los hechos de la Cruzada Albigense. Poyema estorico en languedozián antigo que rezenta es feitos d´a Cruzata Albichesa.

Seguntes la “Cançon de la Crotzada” composata entre 1.212 e 1.219 por Guillén de Tudela y un continador anonimo:

“Lo reis Peyr’ d’Arago una seror doná / Al comte de Tolosa, e puis s’en maridá / Un’ autra a so filh, malgrat d’aquels de sa. / Er s’es mes en la guerra e si ditz que vindra / Ab be mil cavaliers, que totz pagatz les a; / E si los crozatz troba, ab lor se combatra. / E nos si tant vivem veirem cals vencera, / E metrem en estoria so que nos membrara, / E escriurem encara so que nos sovindra, / Aitant cant la materia ad enant durara / Tro la guerra er finea”. (Astí remata a parti de Guillén de Tudela)

Peiro II, meyán embaxadors nimbiatos ta Roma, proposa a Inozenzio III una pachería talentuda ta ra custión oczitana. Lo Papa bi ye tan consiente, que a los poquez diyas i da lo conforme y entrerrompe la Cruzata albichesa.

Inozenzio III escribe a Simón de Monfort lo 15 de chinero de lo 1.213, izindo-li:

“L´ensine rai d´Aragón nos partizipa….. que no has abito pro con engalzar erexes, encara has enfilato as armas d´es cruzatos cuentra poblazions catolicas; qu´has redamato la sangue d´uns inozens y encorrito con maltuelta las tiarras d´es contes de Foix e Comminges e de Gastón de Verán, basallos d´el, magueras qu´es lucars d´ixas tiarras no fuesen estatos de garra mena suspeitosos d´erechía…. asinas doncas, no deseyando pribar-li (a lo rai) mica d´es dreitos suyos ni exapartar-li d´os suyos emponderables desiños, t´ordinamos que ritornes ta el e ta´s basallos suyos toz es siñoríos qu´has embadito cuentra els, no seiga cosa que, emparando-los sinchustamén, se´n diga que triballas en esquimen apropio, e no pas por a causa d´a Fe….”.

Simón de Monfort y Arnau Amalric continan barallando e refusan adempribiar as ordens d´Inozenzio III, e Simón sin d´obedir a lo suyo siñor feudal, lo rai d´Aragón. Es mainates d´a Cruzata fan complegar un Conzilio a Lavaur, do deziden d´apetecar en a cuentrofensiba diplomatica aclapadera d´a boluntá papal.

Territorios del rey Pedro II de Aragón. Territorios d´o rai Pietro II d´Aragón.

Territorios del rey Pedro II de Aragón. Territorios d´o rai Pietro II d´Aragón.

Pietro II tresmuda la suya Cort enta Tolosa a zaguers de chinero. O diya 27 os prenzipals caporals de lo Midi churan omenax e fidelidá a lo rai d´Aragón -es anomenatos “Churamens de Tolosa”-; reculle lo basallax d´o conte de Tolosa e lo suyo ereder, de lo de Foix e Fillo, d´o de Comminges e primochenito, d´o bisconte de Verán e d´o conte de Bigorra, atrapaziando legalmén una situgazión de feito e manifestando un compromís d´esdebenidor. Istos Churamens ripresientan a esbandidura d´a suya autoridá feudal sobre a mayor partida d´o Midi. A esprisión proposata por o prestichioso estoriador Martín Alvira Cabrer t´anomenar iste conchunto de territorios estoricos enligamatos ta lo rai d´Aragón por parentizia, feudalidá e sangue ye: “la Gran Corona d´Aragón”.

Lo 21 de mayo de lo 1.213 tot cambeya. Inozenzio III fa zircunduzir a ordenanzia d´aturar a Cruzata qu´eba nunziato en o mes de chinero, partizipando a lo rai d´Aragón y a es mainates d´a Cruzata la suya dezisión, contraria a apachar-se con a nopleza oczitana acorredera d´es erexes. Simón de Monfort, bisconte de Béziers e Carcassona y, doncas, basallo de lo rai d´Aragón -agora que se i siente refirmato- creba lo basallax e reta a Pietro II. Lo rai aragonés, sin mica de dandalos, declara la guerra a la Cruzata e confita en a baralla como chudizio debino e retalinie dreiturero enta la paz.

Anuncios