8. Armita de ra Espelunga

Marchan de ra Fuensanta en l´auto dica Os Molins, pasando por San Lorién y Torrelisa; continan por Onzins dic´arribar ta ro monesterio de San Beturián (13 Kms); en ista segunda cursa ban a petenar dica ra “Ermita de la Espelunca”.

Ermita de la Espelunga. Armita d'a Espelunga

Ermita de la Espelunga. Armita d'a Espelunga

CURSA TA L´ARMITA DE RA ESPELUNGA

BASE: Monesterio de San Beturián, 1.1OO mts. d´alzaria

DESTÍN: Armita de ra Espelunga, 1.35O mts. d´alzaria

DURATA: una ora y 15 menutos (ita)

DEFICULTÁ: chiqueta

O camín prenzipia en o cobalto de ro monesterio de San Beturián, puyando capiplano a meya costera por o tozal d´O Castellar. Aparix en primeras l´armita de San Antón, agora lo camín contina enta l´este entre carrascas y buxos, más y más encosterato dica plegar en l´armita de ra Espelunga.

Os Zerrigüeltaires prenzipian o camín por a zaguera d´o monesterio, siguindo un sender entre maticals que lis mena desiguida dica l´armita de San Antón, de ro sieglo XVII. Se i fan bels afotos y paran cuenta, güellando-la por os aintros, en que ye emplegata como cubilar d´o bestiar. Fa güen orache pero nuble cuasi de contino, lo que ye bien d´agradixer.

M. Martin delante de la ermita de San Antón. M. Martin debán de l’armita de San Antón

M. Martín delante de la ermita de San Antón. M. Martín debán de l’armita de San Antón

Continando por lo sender, esnabesan por un barranqué baixo as parez d´a Peña San Beturián -en plena Sierra Ferrera- y dentran n´una selbeta de pins, carrascas y buxos; esnabesan por a fuen Labanera b´espleitando d´un parache bien plazenter. O camín escomienza a prener alzaria, con güena costera, dic´arribar ta unas estrabiellas enronalatas. Siguen o sender dica que bel poqued más adebán xulufran l´armita, qu´en ye bien proxema. Parix como si estás pinchata de ro calzil d´una paret bertical de calzina; dend´ista alzaria ye afitable toda ra bal d´A Fueba, con una ambiesta marbiellosa.

Valle de la Fueva desde la ermita de la Espelunga. Bal de A Fueba dende l´armita d´a Espelunga

Valle de la Fueva desde la ermita de la Espelunga. Bal de A Fueba dende l´armita d´a Espelunga

L´entrador y ra frontera de l´armita ye en o mesmo forato de ra Espelunga y a trabiés de l´edefizio -que ye feto un ronal, pero paix estar que lo ban a recuperar- se plega ta ro fundo de ra Espelunga, an que se i bey a “chaminera” natural de ro teito rocazer, d´una alzaria de bels 15 mts.; lo suyo cabo ye simposible de i xulufrar, por a total escureldá de ro puesto.

Detalle decorativo en la ermita de la Espelunga. Detalle decoratibo en l´armita de ra Espelunga

Detalle decorativo en la ermita de la Espelunga. Detalle decoratibo en l´armita de ra Espelunga

San Beturián bibió astí en o sieglo VI como eremita, durán bel tiampo, antis d´esdebenir l´abate de ro monesterio. En o sieglo XVII se costruyó en alcordanza suya -protexitas por a Espelunga- una capiella y una casa d´armitán de cuatro sulers, abitata de cutio por un monche. A l´arreyo de ros tiampos ista armita s´emplegó ta ro culto y, a begatas, como cubilar de paqueters, fuyitibos y maquis. O 22 de Mayo se i fa una romería de ros lucars de Baixo Peñas.

M. Martin, en la entrada de la ermita de la Espelunga. M. Martin en l´entrador de l´armita de ra Espelunga.

M. Martín, en la entrada de la ermita de la Espelunga. M. Martín en l´entrador de l´armita de ra Espelunga.

Ne b´ha una liyenda enzerringlata con l´armita de ra Espelunga: San Beturián fuyiba de Santa Maura, pos teneba zerina d´as tentaderas de ro pecato carnal; a santa bebió l´augua de ra Fuensanta y -de risultas- se´n ie adormió, aprofeitando ra mingala ro santo t´acubillar-se-ne bien amagato en a Espelunga.

Se´n tornan almiratos de ra politeza de ro paisache y ro fantestico amagatallo de ro santugario. S´aturan ta remullar o garganchón en un bar de Os Molins, antis de ritornar ta l´ostal a discansar.

Anuncios