7. A Fuensanta

19-VI-2.OO7. Ixen de Torla endrezatos t´a Ribera d´a Zinga (A Buarda, Escalona, Aspuña).

Plegan en l´ostal, an que i dixan os astimentos, y se piensan que ye millor chentar ya ta marchar dimpuesas a fer as dos cursas emplantillatas.

A primera ye ra d´a Fuensanta (6 kms). Marchan en l´auto ent´Aspuña, dimpués O Casal, y dos kms. y meyo antis de San Lorién cal esbarrar-se por una pista de 4OO mts. que plega dica l´armita de ra Fuensanta. O parache ye bien petón, con muita bechetazión y firme tranquilidá.

Aquí ye a fuen an qu´encara i mana l´augua dimpués de tantos de sieglos, seguntes en rezenta ra tradizión d´orichen bisigoto:

La fuente de la ermita de la Fuensanta inscrita en 1692. A fuen de l´armita de ra Fuensanta, con iscrizión de 1.692

La fuente de la ermita de la Fuensanta inscrita en 1692. A fuen de l´armita de ra Fuensanta, con iscrizión de 1.692

“San Beturián arribó ta istas tiarras en o sieglo seiseno, probinién de ra Franzia, con bels compañers. A lo que nabesaban por istos endreiz, se b´escaizió que se´n eslanguiban de sete y cansera. Beturián tocó con o gayataz suyo un catén y en surtió una fuan d´augua lempeda, que güena onra lis ie fazió”. A fuan ye de tres chetas y en a losa susana bi ye picata ra calendata de 1.692.

Ta ra suya ezquerra se i costruyó l´armita de ra Fuensanta en o sieglo XVII, ta ra que dend´antis más se i son aplegatos os lucarins d´a redolata, ta en demandar d´augua a ro santo en puendas de sequera e que -por un regular- portiaban l´arca de plata con os repuis d´o santo dende ro monesterio de San Beturián dica ra Fuensanta, an que la capuzaban en una basa proxema.

La ermita de la Fuensanta del siglo XVII. L´armita de ra Fuensanta, de ro sieglo XVII

La ermita de la Fuensanta del siglo XVII. L´armita de ra Fuensanta, de ro sieglo XVII

Ent´a ezquerra de l´armita se i troba ro casal de l´armitán. Ye un edefizio rezién esbiellato, de piatra, con tellato de losetas y una gran chaminera a l´estilo d´o payís. En ista b´ha una iscrizión que i diz: “Domingo Lecina, primer ermitaño de la Fuensanta. 1.697”.

Anuncios