2. San Bizién d’a Buerda

San Bizién d´A Buerda ye una aldeya plantificata en un solanero costeruto, pertenexién a ro monezipio d´A Buerda y a 780 mts. d´alzaria. Tien 2O abitadors y as fiastas se i zilebran o 2O de Chenero e lo 17 d´Agosto.

A ros de San Bizién lis izen “bisorios” e tienen iste dito:

“San Vicente

culo caliente

sopas hervidas

y sin aceite”.

Paran cuenta que b´ha un brendador-restorán an que i chintarán de bien güen emplaz.

Cementerio y esconjuradero de San Vicente de Labuerda. Fosal y esconchuradero de San Bizién d´A Buerda

Cementerio y esconjuradero de San Vicente de Labuerda. Fosal y esconchuradero de San Bizién d´A Buerda

Dimpués besitan o chiqued pero intresantismo casalar, aproxemando-sen ta ra susana d´o lucar -bel poqued exapartata- an que s´i troba l´esconchuradero; ye una costruzión ubierta enta ros cuatro puntos de l´orizón que cubillaba a lo mosen mientres i prenunziaba ros conchuros cuentra ras tronadas y dende ra que s´alufran os terrens d´o lucar. Aquí s´esconchuraban as tronadas ta que marchasen a fer mal t´atros puastos.

A un biello mosen de San Bizién l´acumulaban ista aclamanzia:

“San Vicente y Labuerda…..¡Detente!……….El Pueyo y Araguás…..¡Zis Zas!”.

Con o “zis-zas” s´esprisaba o diapolico son de ros eslampius.

Atra bersión conoxita en sereba: “Boiretas de San Bizién, boiretas ta San Lorién. ¡No bi apedreguez cuan t´o lugar en sigaz!, ¡no mos caigaz, e marchaz t´Araguás!”.

Conjunto monumental de San Vicente de Labuerda. Conchunto molimental de San Bizién d´A Buerda

Conjunto monumental de San Vicente de Labuerda. Conchunto molimental de San Bizién d´A Buerda

L´esconchuradero fa d´entrador ta ro conchunto molimental, li sigue o fosal e ra desinforme ilesia romanica con auside d´o sieglo XIII, adebotata a San Bizién y que da ro nome a ra localidá. De tornata s´amanan a biyer menuzelmén a mañifica casa Buil, con torraza esfensiba y capiella particular.

La iglesia románica del siglo XII de San Vicente de Labuerda. A ilesia romanica de ro sieglo XII de San Bizién d´A Buerda

La iglesia románica del siglo XII de San Vicente de Labuerda. A ilesia romanica de ro sieglo XII de San Bizién d´A Buerda

Os nomes de ras casas de San Bizién d´A Buerda son:

Antón, Billamana, Bisorio, Buil, Cabolugar, Carpintero, Fontanal, Garzía, Manoleta, Mur, Olibar, Perico, Sampietro, Sarrato, Soro.

L´armita ye plantificata en un ballón en a Sarra San Bizién y adebotata a San Bisorio, santo local d´orichen gascón naxito en Cadeilhan-Trachére, que bibió d´armitán en o sieglo XI e que seguntes a tradizión lo matón chunto con dos desziplos; os restos suyos son alzatos en a ilesia de San Bizién. Ta ista i puyan en romería lo 15 de Mayo as chens de Banastón, San Bizién y A Buerda y -cualques añatas- de ro lucar gascón de Cadeilhan-Trachére.

Lis ha cuacato muito San Bizién pero, como izen en o lucar: “por astí arriba está escuro como una boca lobo”, se i mete asabelo nuble y cal marchar-ne.

Enfilan a carretera A-138 dica L´Aínsa, an que s´esbarran por a N-26O dica Torla, aturando por o camín en Fiscal, a bels 3O kms.

Anuncios