1. Abizanda

TORLA, ARMITA D´A ESPELUNGA, IBÓN E PUERTO BIELLO DE BIELSA, DE LO 16 TA LO 21 DE CHUNIO DE LO 2.OO7

Iste año ros Zerrigüeltaires deseyan pasar o bentenozinqueno cumplañatas de l´empieze de lurs escorsas en o mesmo lucar an qu´escomenzipioron a 1er. Gambada Pirinenca: Torla.

16-VI-2.OO7. Seguntes o pornostico de l´orache güe pleberá por os Pirinés, asinas que cambeyan a rota precoxitata preferindo -en cuenta d´ir dreitureramén ta Torla- besitar bels lucars por o camín.

Marchan por l´autobiya ta Güesca, dend´astí enfilan ta Balbastro por a N-24O y en continén por l´A-138, endreza ta L´Aínsa, con a primer aturata en Abizanda.

Vista de Abizanda. Ambiesta d’Abizanda

Una begata más dentran en iste majizo lucarón; ista ye ta conoxer o Museyo de Creyenzias e Relichiosidá Popular d´os Perineyos Zentrals.

O museyo se troba en a retraziata badía, entre a ilesia de l´Asunzión d´o sieglo XVI y os estrazios d´a muralla d´o rezingle fortificato. Preba de fer conoxer güena rabañera de prauticas relichiosas e creyenzias populars con as que, dend´antis más, os abitadors d´os Perineyos miraban de protexer lurs casals, biens, y a els mesmos.

Lo primer que i fan ye biyer un bidio sopre ro tema, d´Eugenio Monesma. Os oxetos d´a esposizión son situgatos en saletas con escarapates y retulos enformatibos y, antimás, esplicotiatos por un “rezentador automatico” (audioguida) que lis ha amprato ra ofiziala d´o museyo.

A colezión de 2OO piezas unicas abraca dende ra puenda ibero-romana dica ro sieglo XX e ye trestallata en tres parz: a protezión d´a casa (esteriors, salas, alcobas e fogaril); a de l´endebido (libratura e baltizo, comunión, edá adulta, malotías e muert); y a de ra comunaldá (prauticas agricolas e ganaderas). Se i quedan birolos en biyer a caterbada d´amoletos, talesmans, relicas e simbolos proteutors, atrenatos siguindo as güeltas de l´añata, a trabiés d´as suyas fiastas relichiosas, romerías e robatibas, ritos e creyenzias.

Lis ha paixito una esposizión bien intresán y aplenadera, y en salen con o remugallo de que, por más que no´n creigan mica d´istas cosas, muitos d´istos elementos e trastes son estatos calitratos como protezión cuentra os fenomenos sinesplicables acumulatos a fuarzas soprenaturals; sapendo agora a lo rispeutibe que, dica no fa guaire, en esistiba un binclamién común a tota ra umanidá, e que n´os Perineyos istas creyenzias han esboluzionato notoriamén con os cambeyos sozials. Una contrimuestra en o mesmo lucar d´Abizanda sereba lo tuberclo d´o lilio, que se i tallaba en ronchas como collar y asinas sanar as andaderas.

A canto lo museyo se i troba ra imposán torraza esfensiba d´o sieglo XI, an que s´amuestran afotos trigatos ta ro premio “Lucien Briet” adedicato a ro patrimonio artistico, molimental y etnografico d´o Biello Sobrarbe y atraziato por a comarca de Sobrarbe; asinas qu´en aprofeitan y, antiparti de biyer a esposizión, espleitan como atras begatas -dende ro cabalto ra torre- d´a sopregüena ambiesta d´una ampla redolata sobrarbenca con Tres Serols de fundo.

La aldea y casa La Lueza en Abizanda. L’aldeya y casa A Lueza en Abizanda

Os nomes de ras casas d´Abizanda son:

Pedrasanz, Castillón, Olibera, Encuentra, Mora, Benito, Trallero, Carlos, Román, Armisén, Guatas, Prinzipe.En l‘Aldea: casa A Lueza.

Continando ra cursa y pasando por A Insa, a bels 28 kms. arriban en A Buerda y se´n esbarran enta ra ezquerra mientres 2´5 kms., dica ro lucar de San Bizién d´A Buerda.

Anuncios