18. Cadaqués

13-V-2.OO6. S´aproxeman ta Cadaqués (Cap de Quers-“Cap de les roques”). Situgata en a costa d´a comarca de L´Alt Empordá, probinzia Girona, ha cuasi os 2.OOO abitadors. L´orichen d´ista billa marinera ye en o suyo puerto natural e la faina pesquera, anque ascape calió fortificar-la ta esfender-sen d´es periglos d´a mar.

Cadaqués, conoxito por estar la residenzia durán muitas añatas d´o pintaire Salvador Dalí (lo suyo pai yera d´aquí y él bibiba en un lucaret de pescataires qu´eba mercato n´a bizina cala de Port Lligat), lo cual qu´esdebinió pro besitato por artistas e inteleutuals como Matisse, Picasso, Max Ernst, García Lorca u l´aragonés Luis Buñuel.

M. Martin y M. Pérez en la Bahia de Cadaqués (Gerona). Migalánchel Martin y Migalánchel Pérez en la bayia de Cadaqués (Girona)

M. Martín y M. Pérez en la Bahía de Cadaqués (Gerona). Migalánchel Martín y Migalánchel Pérez en la bayía de Cadaqués (Girona)

Garimboliando por as trucadizas carreras de blancos casals, aguaitan la bayía do, lo 1.285, l´Almirán aragonés Roger de Lauria i tenió una trobata estorica con os mandaders de lo rai de Franzia.

Roger de Lauria naxió en lo sur d´Italia. La mai d´él, dama de Costanza de Sizilia, se maridó con l´infán don Pietro, esdebenider Pietro III d´Aragón. Acorporato ta la nopleza aragonesa, estió armato caballer e pasó a serbir a lo Rai. Lo 1.283 li renden lo mando d´a Flota aragonesa como Almirán e l´encomiendan la esfensa de lo raino de Sizilia. La embasión d´as tierras de lo rai d´Aragón por os franzeses lo 1.285 fa que lo rai Pietro III li cride, consiguindo esfer la flota franzesa. Ixa estió la suya bitoria más remarcable.

Roger remanió en lo puerto de Cadaqués. Por mandato de lo rai de Franzia, lo conte de Foix e Raimond Roger binioron a parlar con él ta en demandar-li de treugua por bel tiampo; la trobata se fazió enfruén d´a bayía de Cadaqués, e Roger de Lauria lis ie rispostió que no´n fereba pas de treugua ni con franchuz ni con probenzals, bi declarindo antiparti lo siguién: ” e cuento que garra galera ni nau no´n gosará d´ir por la mar sin de guidatico de lo rai d´Aragón. E no sólo que galera u nau: estui que dengún pex no´n gosará i nabatiar sin de portiar en a coda l´escuto u siñal de lo rai d´Aragón, t´amostrar lo guidax d´iste nople Siñor, lo rai d´Aragón e Sizilia”.

Lo conte de Foix sonrisó e, cambeyando de tema, se´n dispidió d´él. Con ista rispuesta, os chenerals franzeses fazioron pretar fueco a´s nabiros que lis restaban en Roses ta que no i cayesen en mans d´es enemius. L´exerzito ritornó en Franzia estroxinato y esparricato.

Dimpués de milenta barallas, Roger de Lauria morió lo 1.3O5, pasando ta la Estoria como fegura soprixién en as faxetas pulitica e melitar.

Petenan por os callizos d´o bico biello -con galerías e botigas d´artisans- qu´en ban puyando dende la costa dica la ilesia tardogotica de Santa María, do paran cuenta en que cal jopar ya enta lo lucar de Cotlliure.

Anuncios