7. A tornata. “Rincón de Mariano”

De tornata enta Sallén, zenan y dimpués marchan ta ra tabierna-restorán “Rincón de Mariano”. Astí capazían con Mariano de casa Tomasico, con Lauriano Urieta de casa Chicoy, Pili Otín de casa Lucas y más presonal. As dos oretas que i remanen, lo pasan de pistón. Migalánchel Martín, como ye de dar en él, goyoso y rozero, canta bellas xoticas anque -como sólo qu´el s´anima- no ye posible alberar lo que diz ista xota:

“Ponen o morro torzito

toz os que cantan bien,

pa bier s´ixo ye asinas

que canten os de Sallén ”

Tejados de casas de Sallent. Tellatos de casas de Sallén

Tejados de casas de Sallent. Tellatos de casas de Sallén

Fablan sopre ra importanzia de recuperar o tensino, modalidá conserbadera de belgunas de ras trazas más puras, chenuinas y antigas de l´aragonés zentral;( cualcosa se´n remena a lo respeutibe por a Bal, con a entrebenzión de ro “Calibo” de ro Ligallo de Fablans de l´Alto Galligo, os Serbizios Culturals de ra Comarca y a peña zaragozista “Bal de Tena”). Comentan con os sallenutos que agún be son a tiampo, lis cal conzenziar-sen d´ixa riqueza lingüistica y s´han d´establir midas como a motibazión, informazión y consiguién recosiro argulloso de ros fablans latens, potenzials u ocasionals (agún ne b´ha güena rabañera); asinas como a protezión y amostranza d´iste biello legato cultural patrimonial. Anque en primeras amenistarán refirme material y umán pa tot isto, más adebán bellas presonas -como es ruferters Mariano de Tomasico y Lauriano de Chicoy (tocan, respeutibamén, mandurria y guitarra en o Grupo Folclorico de Sallén)- serban perfeutamén baleras p´aconsiguir l´ochetibo -á calendata entremeya- de que ros intresatos d´a chobenalla y a chen gran de Sallén podesen fablar l´aragonés tensino plaziblemén.

Continando con ista custión, achuntamos unas contrimuestras de ra fabla tradizional de ra Bal:

“Con os zapatungos rotos,

os calzones sin bufera,

a camisa esperrecada

y sin un duro n’a pocha,

¡güena sanmigalada m’aspera!”

“Si yo sapese mozeta

qu’autro amarbas más qu’á yo

ni cantarba ni rondarba

ni pasarba pu’astí, rediós!”

“En o barranco de a Ripera ha caito un charratamplán, qu’iz que no puén pasar ni es perros ni es cans. A Perra Mallatas por atrebita ha ito á pasar; s’ha clabato un tarranco debaxo de ra coda que seguntes ha dito ro mariscal no tié cura”.

Anuncios