4. Museyo Sarrablo. Sallén. Aproxemanzia t’a Nozito

O sabado 1O de Chulio, como asperaban, amanixe plebendo, asinas que deziden d´amanar-se ta ro museyo Angel Orensanz d´Artes de Sarrablo, situgato en casa Batanero, casa tipica sarrablesa en o bico de ro Puen de Samianigo. Iste museyo etnolochico lo conoxión chuntos por primer begata en l´año 1.983, anque dimpués cadagún por o suyo costau l´han besitato más begatas. En ista ocuasión se i troban a dos presonas de ro Ligallo de Fablans (sezión de Samianigo) con qui pillan güena capazeta arredol de l´esdebenidor de l´aragonés.

O Museyo estió empentato por l´asoziazión Amigos de Sarrablo, qui han consiguito bels premios estatals por a suya buxada de recuperazión de tradizions, trazas de bida y molimentos d´a redolada. O museyo replega – en retulazión biluengue castellán-aragonés y de trazas zientificas y didauticas – un puyal de trastes, aribos y ferramientas d´agricultura, ganadería, ferrería, tixius, trasporte, pesos y mesuras, bodega, mundo d´o pastor, mosica tradizional, cozina y fogar, sala de Pedrón, ezetra; recullitos en os lucars amortatos d´a redolata que mientres muitas chenerazions emplegoron os abitador de Sarrablo y que lis dixoron de fer onra de risultas d´a endustralizazión.

Güe por güe, como museyo bibo y didautico que ye, fa autibidaz de conchunta con Unicef por meyo de Pedrón y O Diaple d´o museyo, tien un ideyario ecolochico y rechira soluzions a ros poblemas d´as rilazions Norde-Sur. Ta Migalánchel Pérez y Migalánchel Martín ye, por tot isto, un museyo mitico y pleno de socherenzias emozionans.

De tardis, como a ratez no plebe, deziden d´amanar-se-ne ta Sallén de Galligo, por tal de beyer a ras amigas sallenutas de Migalánchel Martín, as chirmanas Pili y MariCarmen y de paso alufrar l´ambién de ro festibal ” Pirineos-Sur “. Lis plebe pro cuan i plegan, pero dimpués espaza y pueden estar bel par d´oras con ellas, o fillo de Mamen y a suya lola, Chusefina. S´apasían bel raté por as casetas d´encantes de ro festibal y pasan una tardi muito implazera.

Cementerio e Iglesia de Nocito. Fosal e Ilesia de Nozito

Cementerio e Iglesia de Nocito. Fosal e Ilesia de Nozito

O zaguer diya, dominche 11 de Chulio d´o 2.OO4, como paize que l´orache amillora, enfilan cara ta Nozito, en a bersán norte de Siarra Guara. Ban pu´a carretera enta Güesca y dinantes d´o puyatón t´o puerto de Monrepós s´esbarran t´a zurda pu´a carretera d´a Guarguera qu´endreza ta Boltaña. A ros poquez kms., n´a segunda cruzillata t´a dreita, ye l´esbarre ta Nozito por pista prauticable p´autos de pisada baxa; pasando en primeras por un lugarón no siñalizau que n´un primer inte dan por suposau que ye Nozito. Un chobeñón que troban en a unica casa abitada d´o lugar lis esplicotia que i son en Lasaosa (del latín “Lausa”: losa- de la Sosa: cauce de río; también matas de hierba que pastan los corderos) y que agún mancan más de 10 kms. dica Nozito. A ros de Lasaosa les claman “conejeros” y “cazadores”.

Los Zerrigüeltaires y detrás la Iglesia de Nocito. Os Zerrigüeltaires y dezaga ra Ilesia de Nozito

Los Zerrigüeltaires y detrás la Iglesia de Nocito. Os Zerrigüeltaires y dezaga ra Ilesia de Nozito

Anuncios