1. Castiello de Chaca. Billanobilla

BAL D´A GARZIPOLLERA, BAL D´ACUMUER Y SIARRA GUARA POR NOZITO D´O 8 T´O 11 DE CHULIO D´O 2.004

Ista añada as miras de Migalánchel Pérez y Migalánchel Martín son yir por a Bal d´a Garzipollera ( antis más ” Bal Zepollera ” ) besitando sta. Ma. D´Iguázel , prebando de plegar ta l´Ibón de Bucuesa por a Bal d´Acumuer y d´amanar-se ta Nozito y a suya amagata Badina d´Estañonero.

Marchan de Zirigoza lo maitín d´o chuebes 8 de Chulio d´o 2.004 camín de Samianigo (Antrotopónimo latino “Sabinius”) , en do amallatarán as 3 nueis siguiens.

A ros de Samianigo les dizen “tenazetas”, “lapizeros” y “robacampanas” y tienen un dito:

“No te cases en ta Biescas

ni ta Búbal, ni Saqués;

cásate’n Samianigo

y berás pasar o tren.”

Dimpués de dixar l´equipache en l´ostal, enfilan por a carretera Chaca endrezaus ta Canfrán, aturando-sen en Castiello de Chaca (castillo), lugar do se troba l´esbarre ent´a Garzipollera. Como empezipian a aber-ne de fambretas , fan a güena dezisión de chintar astí.

A ros de Castiello les claman “esbarranqueaus”, y tienen un dito: “Castiello, malas lenguas”.

En rematar a chinta continan en auto por a carretera d´a Garzipollera, pasando en primeras por a grancha esperimental d´a D.ch.a. en l´amortau lugarón de Bescós. D´agora enta debán ya no bi´n ha de gudrón y a carretera se torna una pistota con o sulero más malmetiu contra más zerqueta yes de Billanobilla. Dimpués de pasar o puén sobre o rio Ixuéz plegan en Billanobilla (nueva villa), un lugar bien chocante pos, por un costau lo son recuperando, dimpués de que yera amortau (como toz os d´a Garzipollera). Bi ha güen faxo casas retraziadas y esbielladas, muito polidas, bel chalet y un albergue, pero por atra man a ilesia d´o lugar ye asabelo estrochinada y en menaza d´enrona.

Iglesia semiderruida de Villanovilla. Ilesia cuasi espaldata de Billanobilla

Iglesia semiderruida de Villanovilla. Ilesia cuasi espaldata de Billanobilla

Os de Billanobilla tienen a motada de “aguaitamates”, y a bal d’a Garcipollera tiene un dito:

“En Larrosa hay un rosal

y en Acín una noguera

en Villanovilla una balsa

pa toa la Garcipollera.”

Iglesia semiderruida de Villanovilla. Ilesia cuasi espaldata de Billanobilla

Iglesia semiderruida de Villanovilla. Ilesia cuasi espaldata de Billanobilla

Os tocayos se son quedaus con l´alufrada d´ista bal y lugars muito quedos y, de bez, amanaus t´a clamada zebilizazión y no se desimen de tornar unatra begada y agüespar-se en l´albergue de Billanobilla pa conoxer millor ixa zona y, tamién, petenar dica l´Armita Romanica de Sta. Ma. D´Iguázel, pos agora paran cuenta de que l´auto de pisada baxa que leban no ye a lo consonán ta poder puyar por a pista que ba ta o lugar d´ Azín, a bels 5 kms., dende do empezipia la caminata ta Iguázel. Asinas que deziden pasar a resta d´a tardi en Castiello de Chaca, que M. Pérez tasamén conoxeba dica iste inte, sabendo agora tamién que por o mesmo lugar pasa o camín de San Chacobo.

Torre de la Iglesia de Castiello de Jaca. Torre d\'a ilesia de Castiello de Chaca

Torre de la Iglesia de Castiello de Jaca. Torre d'a ilesia de Castiello de Chaca

M. Martín estió en Castiello en Marzo de 1987 charrando y grabando a bellas presonas biellas d’o lugar: una muller de casa Fatás, un ombre de casa Tejedor y un poquer con un ombre naxito en un lugar amortau a man de Biescas clamato Bergusa.

Castiello de Jaca y al fondo la Peña Oroel. Castiello de Chaca y a ro fundo a Peña Uruel

Castiello de Jaca y al fondo la Peña Oroel. Castiello de Chaca y a ro fundo a Peña Uruel

Lis nombra os nomes d’as casas, d’os bicos y toponimos de Castiello:

Nomes de casas:

Piqué, Inazio, de la Bal, Cafetero, Churro, Fatás, Bizenta, O Ferrero, Garroso, Yerno, Tejedor, L’Aguazil, Calbo, Liana, Cabalero, Palazín, Sastre, Santa María, Pascualé, Roldán, Pelaire, Ambrosio, Manuel.

Nomes de bicos:

Casadioses, Alto, L’Anglata, Plaza, Iglesia.

Toponimos:

Barranco Redigüé, Landigüé, Solanieto, Fiñés, La Corona, Es Peñas Caldés, San Bartalomé, O Petrizo, El Balón, Las Biñazas, Carrascas, Piñés, La Sierra, La Cuasta, Pedrosín, Santa Ugenia, La Selba, Canals, Nuestra Señora, Paco Zenarbe, El Biaduto, Los Gorriales, Catironeros de Miranda (Arto).

Sobre l’aragonés d’a redolata:

Antes era corriente, pero tuvimos un buen maestro que nos quitó radical la lengua d’aquí y nos enseñó a hablar bien. Hay palabras que no las “estiramos” ya, por ejemplo “cruxidar”: guardar o recoger las ovejas. Recuerdan que al médico y al veterinario les llamaban “o zijuano” y “l’albeita”. Atras parolas que dizen: “retolica”, una “lurte”,”monón” “esclafar”.

Fablan d’a Garzipollera:

Todos s’han marchau de la Garcipollera, “hasta los santos de la iglesia s’han marchau”. Comentan la procesión el 2 de junio a la ermita de la Virgen de Iguázel o Santa Isabel y las reliquias de Castiello.

A ro cabo d’a charrada se chunta un ome biello naxito en Bergusa, con o que M. Martín aprofeita y li demanda por os nomes d’as casas de o suyo lugar.

Nomes d’as casas d’o lugar amortau de Bergusa:

Esteban, Blas, Tejedor, Racimo, Francho, O Piquero, Chuanico, Pepico.

Anuncios