5. Monesterio de San Chuan d’a Peña (1ª Parti)

3-5-1986. Marchan de Santa Cruz d´as Serors por una carretera de montaña. A cursa trascorre entre pinadas y a os 6 kms. s´alcuentran con o primer destín, o Monesterio Biello de San Chuan d´a Peña, acubillau baxo una gran peña  y a 1.115 mts. d´altaria. Maxestuoso y unico, ye Molimento Nazional. Estió berz y pantión d´os rais d´Aragón y o más importán monesterio romanico aragonés de l´alta Edá Meya.

01. Mapa de la comarca de la Jacetania. Mapa d´a Chazetania

Diz a liyenda que o primer abitador d´o monesterio de San Chuan d´a Peña estió un nople zirigozano, Boto, qui estando de cazera en l´año 720 se´n espaldó con o caballo suyo por un xerbigadero, aclamando-se-bi ta San Chuan Baltista, y miraglosamén se´n posó tobamén en tiarra. Sano y sin de nafra en o fundo d´o barrango, i biyó una espelungueta do trobó un oratuero con o cuerpo sincorruto de Chuan d´Atarés. De risultas d´ista bibenzia, Boto i edifica una ilesia en onor a San Chuan; más adebán li s´achuntará tamién lo suyo chirmano Félis.

Añadas dimpués se´n i achuntón Benedí y Marzelo, unicos sobrebibiens d´una furicada sarrazina cuentra o lugar de Pano. Benedí costruyó una ilesia aintro d´a espelunga en onor a San Isteban y Marzelo unatra adedicata a San Pietro.

02. Postal de la Portada mozárabe desde el Claustro. San Juan de la Peña. Postal d´a portalada mozarabe dende o Claustro

A l´empieze d´o sieglo X os contes aragoneses fizioron trestucar o biello armituero en monesterio de San Chullán y Santa Basilisa. A empezallos d´o sieglo XI lo rai nabarro y conte d´Aragón Sancho lo Mayor mudará lo nome en o finitibo “San Chuan d´a Peña”, por a situgazión cheografica y a suya premetiba anomenazión, establindo-bi lo riedo de San Benedí.

03. Postal de San Juan de la Peña desde el Mirador de San Voto. Postal de San Chuan d´a Peña dende o Mirador de San Boto

L´año 1.071 lo suyo nieto y rai d´Aragón Sancho Remírez donó a la orden beneditina de Cluny l´agún chicot zenobio. Desiguida se i costruyó lo claustro y una ilesia d´a qu´en quitoron o rito mozarabe e i plantificoron o romano.

A partir de metá d´o sieglo XII, cuan Alifonso I lo Barallador remena lo poder pulitico enta l´Ebro, os siguiens rais d´Aragón preferirán -en cuenta de San Chuan d´a Peña- atros monesterios como Bergüela, Piedra, Rueda u Poblet.

As cremadas de 1.494 y, más que más, a de 1.675 estieron finitibas pa quitar iste antigo monesterio y costruyir o “Nuebo” a bels zentenals de metros, en a ensolanada planera de San Endalezio, anque diz que se quedón dos monches en o monesterio Biello pa mantenimién d´o que i remaniba.

04. Postal de la Sala de Concilios. San Juan de la Peña. Postal d´a Sala de Conzilios. San Chuan d´a Peña

Enchegan a besita d´o monesterio; tien dos sulers, en o baxo ye a premetiba ilesia mozarabe con dos ausides y arcos de ferratura, adebotada ta os santos Chullán y Basilisa, y a sala-adormituero d´o Conzilio d´o sieglo XI.

05. Postal del Panteón de los Nobles aragoneses, siglo XII. San Juan de la Peña. Postal d´o Pantión d´os Noples aragoneses, sieglo XII. San Chuan d´a Peña

Puyan ta lo sulero d´alto y dentran en o Pantión de Noples, en do los sepulcres i amuestran iscrizions de simbolos con crismons y cruzes. Uno d´els ye lo d´o Conte d´Aranda, D. Pedro Abarca de Bolea, brilantizo nople aragonés d´o sieglo XVIII y que, por proposata d´él, l´antiga sacristía estió retraziada lo 1.770 en Pantión Reyal.

06. Postal del Panteón Real Neoclásico del siglo XVIII. San Juan de la Peña. Postal d´o Pantión Reyal nioclasico d´o sieglo XVIII. San Chuan d´a Peña

Astí se i mantienen 27 lapidas, entre as que se i troban as de os rais d´Aragón Remiro I, Sancho Remírez y Pietro I, lurs mullers, prenzipes y contes.

07. Postal de la Iglesia Alta con los Tres Ábsides del siglo XI. San Juan de la Peña. Postal d´a Ilesia Alta con os tres ausides d´o sieglo XI. San Chuan d´a Peña

Achunta ta lo Pantión Reyal bi ye la Ilesia Alta, consagrata lo 1.094, con tres capiellas en os ausides semizerculars adebotadas ta San Chuan Baltista – a zentral y más gran -, San Climén y San Migal. Por una polida puerta mozarabe, ubierta en un costau, se´n dentra ta lo claustro romanico.

08. Postal del capitel del claustro (Los Reyes Magos y Herodes). San Juan de la Peña. Postal d´o chapitel d´o Claustro (os Rais Magos y Erodes). San Chuan d´a Peña

Iste claustro ye d´os sieglos XI-XII y feitura de dos obradors diferiens. O primero desibe una importán colezión de chapistels con temas d´animals fantesticos y motibos bechetals y en l´atro grupo -de l´artista anonimo conoxiu como “Maistro d´Agüero” u “de San Chuan d´a Peña”- se i desembolican en bente chapistels pasaches biblicos entretallaus con asabelo d´abelidenzia. Rematan a besita en un arracón d´o claustro repretau baxo a Peña, do s´alcuentra la Capiella gotica de San Beturián.

Astí ye lo sepulcre de Chuan Marqués, abate nombrau por Benedí XIII -lo “Papa Luna”- lo 1.412.

09. M. Pérez y M. Martín en el claustro románico de San Juan de la Peña. M. Pérez y M. Martín en o claustro romanico de San Chuan d´a Peña

Alufraus de tot debán d´ista gran contrimuestra artistica, se i fan bels afotos en o solenizo claustro.

Anuncios