9. Zirigoza. O Pilar. O Ligallo

ESCORSA ENTA UNA TORRE D’O PILAR Y LO BALCÓN D’A SIEDE D’O LIGALLO, EN ZIRIGOZA, LO 1 D’ABRIL DE 1985

Una conoxita mazada diz: “esto es la obra´l Pilar”, u bien: “dura más que las obras del Pilar”.

A razón ye simpla: as feituras d´o templo escomenzipioron lo 1.675. L´enguero ofizial estió lo 1O-X-1.872. A primers d´o sieglo XX solamén se´n yeba rematato una torre. As dos zagueras -que dan enta l´arriu- se costruyoron entre 1.95O y 1.961.

Mesmamén, enta una d´istas tors enfilan: a unica ta ra que ye premitiu i puyar. Por a dentrata d´a puerta ozidental de ro costato d´Ebro arriban dica l´unico puyador esistén, amontando-sen-ie; cuan en salen d´o puyador, encá cal continar bels menutos por unas escaleretas dica ta ro cabalto d´a torre. Alí, a trabiés de bitrieras trasparens aguaitan a grañaza ambiesta de ra zidá con a catedral “del Aseo” (como l´izen os biellos d´a redolada), o torreyón d´a Zuda, as murallas romanas, a ilesia de San Juan de los Panetes, o Mercato Zendral, l´Ebro, os puens, lo Rabal e , a ro luen, lo Moncayo e -con poca claredá por o gallinazo- os Pirinés. En fan cualques d´afotos.

Vista del casco viejo de Zaragoza desde una de las torres del Pilar. Ambiesta d´o Bico Biello de Zirigoza dende una d´as torres d´o Pilar.

A catedral-basilica de Nuestra Siñora d´o Pilar (“la Pilarica”, en plan rozero) ye o temlo barroco más gran d´España e se considera lo primer templo d´a Estoria d´a Crestiandá, pos se i guarda ra colunna u pilar de xaspe sopre ra que -seguntes a tradizión- lo 2 de chinero de l´año 4O a Birchen s´aparixió en carne mortal ta l´apóstol San Chacobo, en Zirigoza. Os desziplos de l´apóstol costruyoron una capiella, debantando-ie dimpués una ilesia romanica, más adebán unatra mudéxar -que se´n pretó fueco e se´n cremó de raso-, dimpuesas una ilesia gotica, orichen de l´autual d´estilo barroco con decorazión nioclasica.

Migalánchel Martn junto al cartel de la antigua sede del Ligallo de Fablans de L’ Aragonés en Zaragoza. Migalánchel Martn chunto a lo retulo  de l´antiga siede d´o Ligallo de Fablans de l´Aragonés, en o Coso Baxo de Zirigoza.

Rematan a besita e s´endrezan enta ra siede d´o Ligallo de Fablans de l´Aragonés -en a carrera d´o Coso- do M. Pérez e M. Martín acucutan por o balcón, primero l´uno e dimpués l´atro, ta fer-sen-ie senglos afotos dende a carrera con o retulo de l´asoziazión fablesa a ra que pertenexen, con lo que completan gambada y religato d´afotos.

Anuncios