1. Aproxemazión. Billa de Lobarre

ESCURSIÓN ENT´A BILLA Y CASTIELLO DE LOBARRE, O 31 DE MARZO D´O 1.985

N´ista escursión de güei quién conoxer mayormén o castiello meyebal de Lobarre, teste d´os empezallos d´a istoria d´o raino d´Aragón y una d´as más importans fortalezas d´o romanico uropeyo.

Salen de Zirigoza en o “canfranero” y se´n baxan n´a estazión d´Ayerbe. Dend´aquí petenan bels 5 kms. por una carretera estreita y muito arretaliniada , dica que plegan en Lobarre.

Lobarre ye una billa i 45O abitadors, plantificada a 773 mts. d´altaria baxo a Sierra d´o mesmo nombre, pertenexién a la Plana i Güesca y a 27 kms. ent´o norgüeste d´a capetal. Abraca tamién os lugars y lugarons de Linars de Marcuello, Liso, Xabarriello, Noballa, Santangrazia y Sarsamarcuello.

Iglesia del pueblo de Loarre Ilesia d´a billa de Lobarre

En Lobarre se i fan una gambadeta plegando t´o suyo cocollé, en do afotían a ilesia parroquial de San Isteban, escapurrida o 15-V-1.5O5. Solamén se´n mantién la torre renaxentista, de pietra y d´estilo gotico, pos tó lo demás s´escatumbó y la fízon de nuebas n´o sieglo XVII. De tó iste cudiau casalar en sobreze a Plaza Mayor, que tien bels edefizios notables como a Casa d´a Billa, majisma costruzión renaxentista d´estilo aragonés d´o sieglo XVI, d´a qu´en truca o suyo porchegau y arcadas, y una fuen de tres xetas feita por Chuaquín Aísa o 1.552.

Por os alredors de Lobarre en yay d´atros molimentos importans: l´armita romanica de Santagueda d´o sieglo XII y, más que más, o´nluzernador castiello romanico -detallau con amplaria n´atros capetulos- situgau n´a Sierra.

As fiestas son adedicadas a San Dimetrio, o 8 d´Otubre. Pa Santagueda, o 5 i febrero, atrapazian romería ent´armita. O 15 i mayo, en onor a San Isidro, unatra romería popular ent´armita i Santa Marina.

O Lobarre autual empezipió como aldeya d´o castiello, clamada San Isteban d´a Güerta, y dimpués Luar, Logar y Loharre.

A poblazión musulmana fue conquistada l´año 1.O7O por o rai Sancho Remírez. En marzo d´o 1.O99 o rai Pietro I d´Aragón emologó a o monesterio de Mondaragón a posesión d´a ilesia de “Luar”. O 24 i setiembre d´o 1.381 o rai Pietro IV d´Aragón bendió Lobarre y as aldeyas suyas a Pietro Churdán d´Urriés. O 29 d´otubre d´o 1.4O8 o rai Martín I d´Aragón bendió lo castiello y billa de Lobarre a Remón de Mur.

En o´spazio entre a muralla y os muros d´o castiello i bibiban 45 “fuegos” o 1.5O5, a lo que -en perder poder o castiello- se´n baxón ent´o puesto do ye agora la billa.

Anuncios