3. Bestuere. O zaguere Gaitere

Juan de Campo li fabla a M. Martín de ro zaguere gaitere de Bestuere, y de Sobrarbe. Se diziba Juan Cazcarra Sesé, de casa Orosieta; li rezenta un feto que gosó escaizir-se en Bielsa: “Ta Bielsa pa os Carnabals beniban l´obispo de Balbastro y o gaitero de Bestué; se´n fuen toz a rezibir a ro gaitero y a l´obispo no querión beyer-lo ninguno”.

Respetibe a ro gaiter Juan Cazcarra Sesé, quiaren resumir en cualques ringlas a rilazión d´él con l´estrumento mosical:

Foto de Juan Cazcarra Sesé, gaitero de Bestué, Huesca (Foto Cortesa de Mario Gros). Afoto de Chuan Cazcarra Sesé, gaitere de Bestuere, Güesca (afoto por fineza de Mario Gros).

Aprendió a tocar a gaita indo 3 añatas pastore en o monesterio de ra Birchen de ro Pueyo de Balbastro. Juan Cazcarra recorrió tota ra comarca tocando en as fiastas. Yera alcompañato á menuto por o suyo chirmán Juaquín -muarto en a guerra zebil- y por atros gaiters d´Escuain e Puertolás con gaita, u solo que o clarín, y a begatas con bigulín. Li feba firme goyo d´alcompañare cantas  y á menuto cantaba él tamién -entre que tocaba ra gaita en os “gozos”- en os estrebillos, de bez que a demás chen de ro lucar. Ye bian remenata, más que más, una ronda conoixita como ro “baile d´as chiretas”, u “ronda chireta”,un “cascabillo” -en o qu´es danzans pasaban una piarna sopre una tenalla de bin- y una Polca que ra composizión li´n acumulaban a él. En 1.947, con o grupo femenín de danzas de Bielsa, se prisentó en Madril enta un concurso estatal, consiguindo-ie lo segundo premio.

Achuntan una rezentata: iz que l´escaizió a ro gaitere una nuat que gosaba tornar de tocare en as fiastas d´un lucare proxemo:

“No se´n trobaba ya guaire luañes de ro lucare, cuan por as esbarrungateras proxemas ta ro camín se´n bi aplegó una lupata: Chuan Cazcarra pretó á acorrir dica ta una buarda amanata a ro camín, puyando-ie ta ro pallere, entre qu´es lupos l´arredoliaban prebando de blingare dica ta él. Remanió astí posato guana ratera, sin que ros lupos en reblasen; entremistanto él ros espiaba per una finiastra. Ta esfuriar a feredá, dezidió de pretar a chuflare a gaita; a l´inte, os lupos que i deixón de blingare, se i posón pandamén e i remanión escutando-li-ne dica l´amanixita, que a ra fin se´n marchón”.

O gaiter Juan Cazcarra muere o 13 de chaziambre de 1.963, a ros 82 años. A gaita suya se troba güe en deposito en a Casa ra Billa d´A Insa, e ye esdebenita ro modelo de referenzia de ra gaita de botico aragonesa.

Bestuere lis ha feto muito goyo, mantién l´encantuch tipico d´es lucars pirinengos con rezios casals de piatra, finiastras y puartas labratas con escutos, tellatos de loseta y politas chamineras, refleixando-ie l´adautazión de l´ome a ro meyo natural dende ros tiampos d´antis más.

Salindo enta Ballibió -por entalto de ra garona Balliñisclo- se i trafucan de carretera y dentran por una pistota estretiza y de sual muito petruso, que ba apiyorando cuantra más i abanzan, con más y más piatras, claperas y tollos. Se´n i beyen bian apuratos ta poder rebirar-sen pero -a ra fin- surten entegros os tres (os dos y l´auto).

Anuncios