7. Dispidida – Basilica – Luisón de Fierro

14-IX-1.985. Los Zerrigüeltaires ban seguí chuntos to´l maitino pero, por custions de treballo, a M. Martín li cal torná enta Zirigoza y -por más que lis pene- M. Pérez prebará de continá aprofitán la estada lo masimo posiblle. Garimbolían por la billa, i fabllan con bizins y uno d´istes -Luisón de Fierro, poyeta en grausino- lis diz que i tien en casa la lletra d´una bersión biella de la más famosa Albada de Graus, pero como lis se fa tardi,quedan en que ya s´amanará dimpués M. Pérez ta casa Fierro pa escuitá-la y grabá-la.

Dimpués de chentá, se´n dispiden en l´autolinia que ba ta Balbastro.

La Bas�lica de la Virgen de la Peña y Graus camino de la Peña del Morral. M. Pérez en el claustro externo de la Bas�lica de la Virgen de la Peña.

Desiguida, M. Pérez fa una escorseta enta la basilica de la Birchen de la Peña y ta la Peña´l Morral, de 565 mts. d´altaria. Ba empezá´l camín n´el cabalto de la pllaza Coreche, po´l carrerón de la Birchen, on la costera ba puyán más y más, contina por una pista -de pedras en los zaguers metros- que desenfila en l´entradó d´un pasé porchegau. Astí n´el meyo se i troba´l polpito de San Bizén Ferré. Chirán ta la dreita se pasa ta´l cllaustro esterió, que i fa de rezebidó de l´entradó de la basilica; ha siu una gambadeta de bente menutos, maja de berdá.

El templlo datau el 1.543 é de pedra sillá y costruyiu denzima d´una premitiba capiella de l´año 1.2OO. Los adintros ban sé estricallaus en la guerra zebil. End´aquí ixulufra unas ambistas manificas de los rius Esera e Isabena, chuñín las suyas aiguas en Graus.

M. Pérez en el claustro externo de la Bas�lica de la Virgen de la Peña. M. Pérez n´el cllaustro esterió de la basilica de la Birchen de la Peña

Enfrón de la escalinata de l´entradó i é l´encomenze de la puyada ta la Peña´l Morral. P´allegá-ie ba pasá chunto un alchibe; contino, el camín é inseriu en pllena paré, a pur d´escalerons y zerrigüeltas. Dispués sigue por una pllaneta, cuasi en la pinganeta del cantil por la que -andán 15 menutos- ba allegá ta´l Sagrau Corazón de Chesús, pllantificau en un miradó con una preziosisma ambista sobre Graus.

La tonadeta de la Llega (Amadrugan) se baila por parellas a´l son d´una polCa en las fiestas patronals. Los miembros de las parellas s´estallan en dos collas: los “verdes” y los “volantes”, istes zaguers ban yí bestius de mullé encara sén omes, ara ya i son mullers.

La lletra de la tonadeta qu´amuestran desiguida é una bersión antiga de Graus, cantada por Luisón de Fierro y arrepllegada por tradizión familiá, segunte´l suyo agüelo, en 1.865.

Amadrugan

“A llebantá-se que biene l’aurora,

que los muixóns ya están rebolotián,

ya sale’l sol dán brincos por las Forcas

y ya rebota’n la Peña el Morral.

Amadrugan, drugan, drugan

los conejos en Soláns,

a baixá las baixadetas

camino de los Botalls.

Amadruga, druga, druga

amadruga repatán,

a buscá a la repatana

que la fiesta ya ba a empezá.

Tra-liro-lán, que las ubas son berdes

y que muy pronto ya madurarán

liróls y figas, almendras y nuezes

tiene mi agüelo en la biña d’Esguarz.

Amadrugan, drugan, drugan

amadrugan los zagáls,

a cogé-sen las zirezas

que maduran pa San Juan.

Amadruga, druga, druga

amadruga el sacristán,

que dispués del rosario l’Aurora

tiene que ísene a bendimiá.”

(Grabazión manetofoníca, feita por os Zerrigüeltaires a Luis Aguilar Cristóbal, en Graus, setiembre 1985) y publicata dimpués en Orache, Rebista Literaria y d’opinión n’aragonés nº 6, pág. 10. Edita: Ligallo de Fablans de L’Aragonés, Zaragoza, 1986.

Anuncios