4. Datos Istoricos

Antis de la llegada de los romanos, bellas tribus bebiban n´ista terreta, sobresallín-ne la de los Ilerchetes, qu´en la lluita contra los zeltibers fan de Graus la suya capetal. La prisenzia romana ba sé contrimostrada por las escabonazions feitas en la redolada.

Enta l´año 1.OOO, a poquez kms. ta´l norte de Graus se i ba situgá la muga entre los musulmans de la Barbitaniya -con capetal en Balbastro- y los crestians, cumpllín Graus una sinificatiba funzión esfensiba con la costruzión d´una muralla y d´un importán castiello arabe, del que i quedan chicoz rebusques en l´altero de la Peña´l Morral. Manimenos, cuan los crestians ban conseguí superá l´entrepuz de los moros, Graus ba sé la primera pobllazión importán ensopegada con anglluzia, y puerta obridera a las ampllas pllaneras del Semontano.

La Bas�lica de la Virgen de la Peña y la Peña del Morral en Graus. La Basilica de la Birchen de la Peña y la Peña´l Morral en Graus

El 1.O63, baixán ende´l monesterio de San Chuan de Pano, el rai aragonés Remiro I -prebán de conquerí la billa enfrontinau ta´l rai Al-Muqtadir de Zirigoza- espirita n´el Campo de Zapata, a los peus de la muralla de Graus; la pllaza é esfendida sin rebllá, lo cualo que contan con l´aduya de l´infán don Sancho II de Castiella -fillo del rai Fernando I- y bells caballers, entre los que paiz que se i ba trobá un choben Zid Campiadó.

Muerto Remiro I, é´l suyo fillo Sancho Remírez qui consigue la finitiba conquiesta l´año 1.O83, acorporando Graus ta´l nuebo Raino d´Aragón. De risultas, la billa queda prou espobllada, lo cualo qu´el rai l´atorga una Carta Pueblla y la dona al monesterio de San Beturián d´Asán, de Sobrarbe, a´l que ba pertenezé lluengas añadas. El 1.428 Alifonso V ordina que los suyos bizins esplleten de los prebilechios del Raino d´Aragón. El podé temporal sobre la billa -de risultas d´un albitrache- pasa ta´l Conte de Ribagorza el 1.48O. Asinas, Graus dintra en la Edá Muderna como feudo de la casa de Billarmosa.

A la fin del siegllo XVI se preduzen regullizios contra´l Conte de Ribagorza, don Martín de Gurreya y Aragón, enfizonaus por la Corona que deseya recuperá´l suyo podé sobre´l condau. Los grausinos se´n ban achuntá ta´l Conte pero los monarcas de la casa d´Austria ban recuperá la pllenera autoridá sobre´l Condau de Ribagorza. El 1.633, Zelipe III (IV de Castiella) atorga a´l Chustizia de Graus la churisdizión zebil y creminal, igual como la eban teniu antis más los antigos Chustizias de Ribagorza.

El siegllo XVIII Graus s´asola como zentro más endustrial y mercantil qu´agricola, con tres ferias añals y los mercaus semanals de los lluns, compllegando-se-ie el comerzio comarcal; se i fan cutiellos, batans d´aigua y botigas de calders y cordells. El siegllo XIX, entremientres la Guerra de la Independenzia, Graus é tomada por los franchuz y en las guerras calristas tamé ñay de tirotazos en la llocalidá entre asolutistas y lliberals. A zaguers del siegllo XIX se i preduz una importán emigrazión de grausinos y ribagorzanos enta Franzia, igual como en la segunda metá del siegllo XX, pero en l´atualidá la pobllazión prenzipia a torná a medrá.

Anuncios