2. Graus por Luis Aguilar Cristóbal

Dimpués de chentá enchegan la besita por la llocalidá y fabllan con bells bizins que lis ban dezín bellas frases en grausino; pero lo milló é que describa la billa de Graus, y en la llengua suya, el conoziu escribidó llocal Luis Aguilar Cristobal:

El Caballé y el Baile del Dance en la plaza mayor de Graus. El Caballé y el baile del Danze en la Pllaza Mayó de Graus

“Graus, é un pueblo d’ixos del Alto Aragón que no é gran ni chico, tiene la mida chusta y one toz mos conocén, ixo é cosa importante pos cada uno está n’el sitio que ocupa y mos mirán de respetá; aunque cada cual é como é, mos tenín que tolerá ya que no podén prescendí de denguno porque entre toz formán el llugá.

Descrebí como é Graus me penso que n’estos tiempos é como los otros llugás, con güenas calles de zemento, blloques de casas siempre más grans, autos por toz los sitios montaus en las azeras, i cuasi no puez caminá. Pero igual que otros llugás tiene la otra cara que gusta si te bas mirán pa dentro y tamé mirán p’atrás, pos sales un día por la noche dán tu sólo una gambada por pllazas y callejóns, y segun los años que tiengas empezarás a recordá: astí bebiba fulano, pos fa años que no está, u dás güelta a una esquina: el caserón de D. … desfecho u abandonau… Con un poco d’imaginazión y sin tení que comprobá datos irás recomponén ixe otro pueblo que con los ojos de la cara muchas bezes no beyén.

La istoria de Graus é llarga y rezia, ñai testimonios ben demostraus y no é ocasión de conta-la ahora, está llena de leyendas, cuentos y refrans, a bezes cosas de pueblos que no podén comprobá pos mos las contaban los biejos los días d’ibierno alrededó del fogaril, siempre en la llengua nuestra que é una fabla prou bariada, pos é la mezclla de tó un poco y mirán de conserba-la, unque el tiempo y el progreso mos la quieren desformá nusotros són más tozudos que ellos yo creigo que é la tradición más populá que mos caracteriza a nusotros, los de Graus. Las otras cosas ban pasán, pero lo aprendíu de chicó en casa, ixo no se borra en la vida, y tenín la obligazión de tornar-las a contá… Mos én de meté tozudos y pesaus pa que no se beiga acabán ixa fabla tan querida de la que tan orgullosos están.

Igual qu’en rezibíu d’erenzia la forma d’abllá, tenín tamé la fama de desprendíus, generosos y de l’ospitalidá, one denguno é forastero pos siempre en i cabe uno más, unque llebe poco tiempo con nusotros reseguida dize que é de Graus. Caso ben demostrau con D. Joaquín Costa, el “León de Graus” queriba tanto ésta tierra, los ríos, las peñas…, queriba y conozeba tanto a la chen que cuan beyeba un crío se le miraba a la cara y diba: no me digas como te llamas, sólo con beyé-te sé de la casa que és; y en to la defizil vida que le ba tocá bebir, siempre ba dí con argullo que tamé él eba de Graus:

Tradición ñai en las Fiestas que to los años celebrán en onó al Santo Cristo, que San Vicente Ferrer mos bá dejá –se bei que tamé a él le ba tocá ixe duende que tiene Graus los pocos días que ba’stá sermoneán- la reliquia del cristo que llebaba en las misións. Pa desprenderse de un puntal así un misionero algo bería él en Graus. En el pueblo que ñai tradición tamé s’achunta d’alguna forma la cultura y Graus dende mui antiguo eba famoso por los artesanos, las chens de güenas lletras, los afizionaus al teatro…, por ixo represéntanse anda zarzuelas y tamé ñai un nutríu orfeón con güenas bozes pa’l canto, y son muchos los descendientes seguín el mismo camino, unque sólo sea por “jobi”, ixo me paeze que ya é algo.

Graus está empllazau one s’achuntan dos ríos, el Esera y el Isabana, i s’acaban los dos en el Pantano de Joaquín Costa. Unque mos podén aprobechá d’ixa aigua, mos sentín orgullosos de que otros la puedan emplleá, regán en los secanos u fen lletrezidá, ¡qué le ban a fé!, nusotros són asinas de desprendíus y generosos, ixo no’l podén remediá”.

(Publlicau en el llibro: A L’Aire (Garbas), Colección O pan de casa nuestra. Edita Diputación General de Aragón, Zaragoza, 1985.)

Anuncios