4. Charrada en Burxaraloz

Migalánchel Martín publicará poco tiampo dimpués en a rebista “Orache”, en a sezión de “Diziendas”, iste resumen d´a charrada feita en Burxalaroz:

O diya 31 d’Otubre pasato se dio una charrada sobre o tema “La lengua aragonesa en los Monegros” en O Salón d’Autos d’o Conzello de Buxaraloz; os organizadors estión: Mariano Villagrasa y atros chobens buxaralozenses, en colaboración con a concellala de Cultura d’ixa billa monegrina. Os ligallers Miguel Angel Martín y Miguel Ángel Pérez charroron sobre custions istoricas, literarias y filoloxicas rilazionatas con dita redolada.

Tamién bi-abió leuturas de poemas y falordias y audizión de cantas en aragonés. L’auto, que s’en yera empezipiato a ras 9 d’a nuey, se prolargó en un animato coloquio siguito por unos 50 asistens dica ras 11 oras bien colatas. A l’acabanza, sin atro remeyo, toz s’en fueron a zenar.

Asperamos que os contautos con ista chen s’intensifiquen, refirmatos en l’esbulligue cultural que bi-ha entre a chobentú de Buxaraloz; antiparti que os repuis de l’aragonés en ista redolada son grandizos, como exemplo bos i metemos tres bocables que as chens de Buxaraloz alzan en o suyo charrar cutiano: CAZINGLOS, FARTAR Y FILLO”.

Vista de Bujaraloz. Ambiesta de Burxaraloz.

M. Pérez leyerá durán la charrada la poesía “Monegros” d´Anchel Conte, con as miras de motibar a la chen con as custions d´a suya tierra y os bocables aragoneses d´a comarca, consiguindo-ie emozionatos aplausos de toz os asistens. Istos bersos son de 1.968 y s´han considerato de ras primers obras conoxitas en aragonés común:

MONEGROS

“Planura d’os míos Monegros, / planura de a mía tierra, / qu’o zierzo airoso secute / y l’ardiente sol calienta.

Planura de tintes grises / baixo una lluna de zera, / qu’en a nuey fosca y escura / t’alumbra y no te refresca.

Planura que naide quiere, / planura que toz disprezian, / a tu quiero yo cantá-te / con a mía boz serena, / quiero chitar ent’os aires / bellas estrofas zereñas, / quiero qu’as chens puedan bier / as tuyas probes casetas / masadas con cheso y agua / amarga, sudor y penas; / os tuyos campos sedientes / qu’a primabera berdeya / y dora o sol d’estiu, / caliente canzión eterna / d’amor, esperanza y oro.

Planura seca y reseca, / n’un infinito horizonte / os míos güellos recreyas, / sin maticals, mons ni abres / qu’a mía güellada entorpescan.

Sangre de milenta añadas / ruxó as tuyas cosechas; / sangre de mullers y omes / qu’agora no son que tierra, / aspra tierra d’os Monegros, / gris, roya y amarillenca; / tierra de yo que no’n quieren, / tierra de yo que disprezian.

Quiero ixe suelo pisar / o día que yo me muera / y dormir o suenio eterno / baixo ixa planura inmensa / qu’o zierzo azeto castiga / y o bochorno atormenta”.

En a tongada d´as preguntas uno de ros amigos de Mariano -estudián de Filoloxía Ispanica- fa una pregunta que sosprende a lo charrador: “¿en qué se ha basado la creación del aragonés común?”.

Remeso d´a sospresa , M. Martín escribe en a pizarra, como exemplo grafico, una mesma frase en tres bariedaz d´aragonés -cheso, ansotano y pandicuto- y en aragonés común, contimparando encontinén lurs semellanzas y esferenzias.

Bi´n ha d´atros muitos exemplos de bocables emplegatos en o charrar de Burxalaroz, como: Tiengo, Cayer, Glarima, Orache, Dorondón, Melico, Tieda, Difuera, Azaite, Trautor y Llonganiza.

Por fortuna, en o tiampo pasau dend´allora, s´han publicato bels bocabularios d´a zona, replegatos en o Bocabulario Monegrino de Francho Rodés y atros.

En rematar a recharrada marchan a zenar t´o restaurán “Español” con Mariano y atros chobens -beluns ya conoxitos- de Burxalaroz. De muito güen implaz rufertían con istos bizins de tot lo tocante a l´aragonés, tradizions populars, ezetra y pasando-ie un raté pistonuto. M. Martín -tan satisfeito d´as risultas d´a chornada- canta bel par de xotas n´aragonés en zagueras.

Aduermen en casa de Mariano, a lo qu´agradixen asabelo a suya empenta y espitalidá, asinas como a la suya familia.

1-XI-1.985 . Desayunan agundanmén y se´n dispiden de Mariano, d´a suya parentalla y de Burxalaroz. Ixen con destín Alcañiz, probinzia Tergüel, a 6O kms. ta lo sureste por a carretera A-23O y dende Caspe por a N-211.

Anuncios