3. Burxaraloz

Burxalaroz (en arabe Bury al-Arus:” a torre d´a festella “) ye una billa d´os Monegros zirigozanos situgata n´una plana a 69 kms. ta l´este de Zirigoza capetal y en a mesma carretera nazional II, a 327 mts. d´alzarria y con bels 1.1OO abitadors. Por mancanza d´augua ye tierra de secano zerialista. L´augua pa beber plegó ta o lugar fa 1O añadas nomás; dic´antonzes crompaban l´augua u la bebeban d´as basas espardidas por o termino monezipal. As fiestas son: o 15 de Mayo adedicatas a San Isidro Labrador, o 23 d´Abril romería ta San Chorche, o 5 d´Agosto ta Nuestra Siñora d´as Nieus y d´o 27 ta lo 31 d´agosto as fiestas grans adedicatas a San Agostín.

Vista de Bujaraloz. Ambiesta de Burxaraloz.

A os de Burxalaroz lis izen: “cabezudos” y “cabezas gordas” y tienen bels ditos, güen faxo d´istos tocantes a la falta d´augua:

“Ya se van los segadores,

ya se van por los secanos

a beber agua de balsa

toda llena de gusanos”.

“De Bujaraloz al mar

se marchó Martín Cortés

para poder ver el agua

que en Bujaraloz no ve”.

“Bujaraloz en un llano,

La Almolda está en un altero,

Valfarta está en un valle

y Peñalba en un aujero”.

“En Peñalba hacen el vidrio

y en Almolda las jarretas,

en Bujaraloz la sal

y en Caspe las olivetas”.

“En Lanaja comen paja,

en Bujaraloz salvau,

en Monegrillo menudillo

y en Castejón bocau”.

“Ése ha de ser de Bujaraloz, porque está con la mano a ver si llueve”.

Yay un dito muito sonau por os Monegros, diz asina:

“Los Monegros, tierra de jauja, porque

cuesta menos el vino que el agua”.

Ban a´scar ta casa suya a Mariano Villagrasa, sobregüén compañer d´abenturas tres añadas dinantes en a Gambada Pirinenca, que tantas güenas alcordanzas lis eba dixau. Dimpués d´as salutazions familiars marchan a dondoniar por a billa. Plegan ta la ilesia parroquial de Santiago lo Mayor, d´una sola nau retraziada en o sieglo XVI, con posible orichen n´una capiella d´o sieglo XII; alufran tamién o palazio de Torres-Solanot, d´estilo mudéxar aragonés, en estau de mantenenzia prou azeutable. Burxalaroz atresora dos armitas: a de San Antonio d´o sieglo XVII y a d´a Birchen d´as Nieus d´o sieglo XVIII.

Como datos estoricos, esisten bels chazimiens arquioloxicos romanos -con troballas de monetas y zeramicas- chunto a la bía Caesaraugusta-Ilerda: a calzata, conserbata en bel trampo, ye conoxida como “Camino de Los Fierros”.

En 1.218 Chaime I prene Burxalaroz en captenenzia; dimpués lo riende a lo prior de San Chorche d´Alfama, iste lo bende en 1.229 -de conchunta con o castiello- a lo monesterio de Sixena por 25O morabetins. Lo 1.254 doña Urraca d´Entenza, priora de Sixena, atorga la Carta Puebla a os suyos abitadors. Aquí naxió a metá d´o sieglo XVII Martín Cortés, qui esbielló as cartas de nabego d´a suya epoca.

“Los Despertadores” ye a tradizión millor mantenita, feita en as fiestas de San Agostín y Nuestra Siñora d´as Nieus. Recorren as carreras d´o lugar un coro cantando coplas, alcompañaus por una rondalla.

Burxalaroz perdió l´año 1.9O8 lo Danze adedicau a San Agostín, con mosica de gaita de botico tocata por o gaitero “Lamberto Serrate de la calle Baja” y con o famoso “Baile de la Gaita”, en o qu´entrebeniban 16 ombres fuertudos que bailaban en a prosezión y dimpués en a plaza. En 1.9O7 o “Heraldo de Aragón”, en una rezeña d´as fiestas, comenta: “La fiesta comenzó ayer, alegrando el vecindario la gaita de boto, cantándose después de vísperas unos hermosos cánticos al aire libre…”

Sapen de l´intrés d´os burxalarozins en mirar de consiguir, antis con antis, recuperar o Danze, lo Baile d´a Gaita y a gaita de botico aragonesa; custions que consiguirán cuallar a la fin en 1.994.

Arredol d´as 8 d´a tardi se´n amanan t´o salón d´aztos d´a Casa la Billa do, desiguida, s´efetugará la charrada sobre “a luenga aragonesa en os Monegros”. M. Martín -conoxedor de cualques luengas- ye qui fablará d´aspeutos estoricos y lingüisticos.

Anuncios