2. O Danze de L’Almolda

O Danze aragonés ye a represientazión popular qu´esprisa os sentimiens d´un drama sagrato, complegatos en danzas (mudanzas d´espatas, tochos, arcos, zintas, torretas umanas), poyesía (soldadesca, pastorada, dialogos) y mosica. Con alazez antiguismos, a enchaquia prenzipal d´o Danze aragonés ye a zilebrazión d´as bitorias crestianas cuentra os moros -con endreza enta lo sur y enzertanza con as mugas- asinas como a posterior esfensa d´o Crestianismo, enfrontinato a la menaza de turcos y berberiscos. Atra enchaquia remeratiba sereban as cabañeras por as que baxaban os rabaños d´a Montaña ta ra Tiarra Baxa, d´agüerro, y se´n tornaban ta ros Puertos de primabera.

Placas distintas en una calle de La Almolda. Diferiens placas en una carrera de L´Almolda

En L´Almolda a lo danze l´izen tamién “mudanza”. No tien dialogos de Moros y Crestianos, pero sí “Pastorada” y “Dichos”. Se i represienta os diyas 22 y 23 de mayo, p´as fiestas de Santa Quiteria, y pa San Urbez -en agosto- os danzans i entrebienen en a prosezión. Os bailes con a mudanza de tochos -beluna d´espatas y pasacarreras- se i fan en zinco cuadros de cuatro danzans cadaguno: o zentral y os atros qu´esboluzionan a l´arredol, alcompañaus d´o “Mayoral” bestiu de calzón, con chapelo de Sastago y tocho rematau en ramo de flors, y a compaña mosical d´o gaitero.

Iglesia de Ntra. Sra. de la Purificación de La Almolda. Ilesia de ntra. Sra. d´a Purificación de L´Almolda.

A mosica s´entrepetaba con a gaita de botico aragonesa. O pastor y gaitero almoldano Cristóbal Falceto Aznar “El Brujo”, qui morió en 1.953, tocó durán 37 añadas y estió lo más famoso de toda la comarca, tanto qu´en diziban: “ir de pueblo en pueblo como el gaitero de L´Almolda”. Por as luengas andatas que feba pa yir a tocar de fiesta en fiesta demandaba , en pagas, un par d´albarcas; por exemplo en Billanueba de Sixena en 1.926, a lo son d´a mosica d´a gaita, os d´o lugar li cantaban ista copla:

“El gaitero de L’Almolda

ha venido con abarcas

y el pueblo de Villanueva

le ha comprado alpargatitas”.

M. Pérez a las 12,55 h. delante de la Iglesia de La Almolda. M. Pérez a 5 menutos pa la 1 d´a tardi, debán d´a ilesia de L´Almolda.

En a bispra d´a fiesta de Santa Quiteria os alcompañans d´o gaitero recorreban as carreras cantando l´estrebiello d´ista copla:

“A repuñetera de mi gaita

cuando tiene vino que bien canta

y cuando no tiene se enfada y se aguanta”.

Cristóbal Falceto li dijió a lo medico, poco antis d´espichar-la: “le voy a cantar una folía”, que yera como l´iziba él a l´afizión suya por fer coplas y cantar-las.

Un labrador rezentaba, en tocante a lo son d´a gaita de botico: “Después de fiestas, estabas en el campo, lejos del pueblo, y te parecía seguir oyéndola”.

Agora i son mirando de recuperar p´alcompañamién mosical en o danze de L´Almolda, la tradizional gaita de botico aragonesa; lo cualo que lo consiguirán poquetas añadas dimpués.

O gaitero y cantador de gaitatas de L´Almolda, Ezequiel Zaballos, recuperó cualques mudanzas -belunas xuplidatas- y ye autor de coplas como ista:

“Trista ploraba a gaita,

¡qué chillos en daba!

Y o gaitero soniaba

En a suya aimada…”

Amuestran una conoxita copla con ridmo de Seguidilla y unatra en a que se contrimuestra o poder d´os danzans en as fiestas:

“En la Almolda es costumbre

de los danzantes

cargarse un cahiz de trigo

pa entrar al dance”.

Fan bels afotos a o lugar y chintan al reser d´unas escaleras. Dimpués de chintar marchan ta Burxalaroz, que ye a 7 kms. nomás.

Anuncios