1. L’Almolda

L’ALMOLDA, BURXARALOZ, ALCAÑIZ, ÍXAR Y BELCHIT DE LO 31 D’OTUBRE TA LO 1 DE NOBIAMBRE DE 1985

M. Martín y M. Pérez ban a fer una charrada en Burxalaroz sopre a Luenga Aragonesa en os Monegros, grazias a l´intrés e combit de Mariano Villagrasa, de Burxalaroz, compañer de ra “Gambada Pirinenca” l´año 1.982. E ya i mesos, quieren conoxer bels lucars de Zirigoza y Tergüel.

31-X-1.985 . Dica meya tardi no lis cal plegar en Burxalaroz, por ixo aprofeitan de maitins ta besitar o lucar de L´Almolda, a  63 kms. ta l´Este de Zirigoza capetal por a N-II y dimpués l´A-23O.

L´Almolda (en arabe “destribuzión d´augua d´arriego”) ye una billa de os Monegros zirigozanos situgata en as estrimeras d´a Sierra Alcubierre, en o pedero d´un tozalé do s´alcuentra l´armita de Santa Quiteria y a 41O mts. d´alzarria. Tien 8OO abitadors, alto u baxo, que s´adedican más que más a criyar obellas y cautibar zerials. As fiestas grans son pa Santa Quiteria, o 22 de Mayo.

La villa de La Almolda. A billa de L´Almolda

A os de L´Almolda lis izen “botejos”, “corruscos” y “los de la ballena” y tienen bels ditos y cantas, os dos primers rilazionatos con una d´as motadas:

“A Velilla voy por higos

a Gelsa por pimentones,

a La Almolda por botejos

y a Castejón por amores”.

“En La Almolda hay un moro

que hace botijos

y se ha convertido

al cristianismo”.

“No te vayas de L‘Almolda

a’ justá-te d’agostero

ti harán aventar de noche

y cobrarás igual sueldo”.

“No te fíes de pasiego

ni te fíes de montañés

ni trates con los de Almolda

que te “joibarán” los tres”.

“El secreto de la Almolda, publicado en Bujaraloz”.

Edificios de estilo renacentista aragonés en La Almolda. A billa de L´Almolda.

Aquí emplegan bocables aragoneses muito intresans, por exemplo: boira, boque, chezo, langoste y pochaquiar.

L´Almolda paiz un lugar asabelo calmudo. Quieren saper si lo ton d´aquí ye tan suyizo como lis han comentato. En un reser pillan güen capazo con dos biellos que lis fablan un poqué de tó: toponimos, bocables, achiquidors, rematanzas en -É y siembra de zerials. Uno d´els lis diz iste dito chanzoso:

“Estos son los Monegros

toda la fama,

las chicas más guapas

que hay en España”.

A berdá ye qu´istos almoldanos tienen un ton espezial y muito dibertiu; en que rematan de i charrutiar ban a garimboliar por o lucar, alufrando bels casals remarcables d´estilo renaxentista aragonés, con polidas arcadas y trucadizos rafes; plegan ta la ilesia parroquial d´o sieglo XVI adedicata a Ntra. Sra. d´a Purificazión, situgata en l´altero d´o lugar.

En a cocota d´un tozal se mantienen quillaus dos menimos torrions retangulars y una muralleta de l´antigo castiello musulmán; por os materials i trobaus, podreban estar d´o sieglo X. Iste puesto yera un güen atisbadero d´a planura monegrina.

A decumentazión más antiga de L´Almolda y o castiello suyo ye de 1.195, cuan Alifonso II los endonó a lo monesterio de Bellpuig de les Avellanes. O castiello quedó albandonau en o sieglo XIV.

L´Almolda, dende 1.417, estió l´alazé d´una baronía propiedá de os Bardaxí, fegurando a billa en o testamén de Berenguer de Bardaxí, Compromisaire y Chustizia d´Aragón. En 1.61O pertenexeba a os Torrellas.

O paisache artigal de L´Almolda (igual que lo de Burxalaroz) preduze plandas a´l consonán, como rumers, espartos, tremonziellos, ontinas, sisallos y -ya menos- pins, carrascas u lezineras y sabinas negrals. Istos dos zaguers arbols son os que baltizan a os Monegros (Mons Negros), pos yeran os pobladors de grans selbas entre Güesca y Zirigoza en a Edá Meya; en tiampos de Zelipe II fueron talladas de raso pa la costruzión d´a sonata “Armada Invencible”, i dixando como alcordanza o disierto autual.

Anuncios