18. Güesca

En Güesca se zelebra o Diya d´Aragón, más que más, en l´armita de San Chorche (d´o sieglo XVI). Por ixo deziden d´amanar-se-ie y chentar en a pineta d´o Tozal de San Chorche, do se i fan tamién diferiens autibidaz festeras. De tó lo que i beyen , lo que más les cuaca ye l´atuazión d´o Grupo Folclorico de Sallén de Galligo.

Grupo Folclórico de Sallent en la Ermita de San Jorge de Huesca.

Güesca (radiz prelatina aska/osca:”poblazión”) ye a capetal de l´Aldo Aragón; debantata en a Plana, Fueba u Foya d´o mesmo nombre, ye una ziudá situgata a 488 mts. d´altaria y pasa de ros 4O.OOO abitadors que s´adedican a buxadas comerzials, almenistratibas, un poqué d´industria y serbizios de toda mena.

Son de risaltar, entre atros, o palazio de Villahermosa, a Catedral, molimental obra gotica empezipiada en o sieglo XIII y rematada en o barroco sieglo XVII, con o suyo mañifico retablo mayor d´alibastre de Damián Forment, San Pietro lo Biello con o suyo caustro romanico, e ilesias como a de San Agostín, Santo Domingo y a Basilica de San Lorién.

A os de Güesqueta les izen “fatos” porque iz que salión a regar dimpués d´o Dilubio….

Tienen bels ditos:

“Huesca, ermitas y serranías”.
“Más sonado que la campana de Huesca”.
“Quien va a Huesca y no ve casa Lastanosa, no ha visto cosa”.
“Cuan as formigas ban en ringlera,
u fa sol, u fa boira,
u fa zierzo, u bochornera”.

Tamién fa unas dezenas d´añadas, cuan en Zirigoza s´enrufaban de tener trambías, les iziban os “cheposos” en plan farute: “el tranviíca de Güesca!”, isto yera enchaquia de pleitinas y zarzallatas , y más d´un “cheposo” salió de Güesca con a lomera bien calién, por ista custión.

A fiasta contina en o Tozal de San Chorche, pero ya no les ne baga, y les cal amontar en o tren enta Zirigoza.

Resumindo: l´orache ye estato güenaz y han podiu besitar bels lugars d´o Semontano de Balbastro, en risaltando a molimental e istorica billa d´Alquezra y l’albandonato y amagato lugarón de San Pelegrín. Han conoxito direutamén l´aragonés semontanero, que se fabla ande más en Alquezra y Salas Altas, y han tenito ra implazera espedenzia d´adormir en lur nuaba tianda de cambaña.

Anuncios