16. Salas Bachas. Burzéa. Crexenzán

Salas Bachas ye un lugar plantificau en planera a 6O kms. ta l´Este de Güesca capetal y a 46O mts. d´altaria. Tien 25O abitadors, alto u bacho. En tó iste terreno se culle zerial, olibas, almendras y, más que más , ugas. I son risaltables casa Olibera de ro sieglo XVII y ra ilesia parroquial barroca de ros sieglos XVII y XVIII.

A ros de Salas Bachas les izen “litons” porque as cambanas fan n´iche lugar ” litón, litón “, y tamién “chicos guapos”, como l´albera iste dito:

“En Balbastro están os nenes
en Nabal os cazoleros,
en Salas os chicos guapos
y en Pozán os embusteros”.

Astí aturan bel poqued solamén, pos les cal rematar a chornada en Burzéa (de l´arabe “Borg”:torre y “cid” u “said”:siñor; “torre de ro siñor”) ye situgau a menos de 5 kms. de Balbastro y a 436 mts. d´altaria. Tien 5O abitadors, alto u bacho. Farchau alredor de ra suya carrera d´atrazau poco regular, risalta ra ilesia parroquial barroca de primers de ro sieglo XVII.

Olivos y almendros, camino de Burceat.

A zaguer nuey de ro biache la pasan en Burzéa, lugarón chicotón y tranquiled. Se notan cansos, no sólo que de güei, amás de ra cansera abotinada de toz istos diyas de trachín; asinas que plantan a tianda , zenan y a adormir.

Güei, luns 23 d´abril de 1984 (diya de San Chorche, patrón d´Aragón), zaguer diya por istas tiarras, se´n ban enta Balbastro pasando en primeras por Crexenzán, a 1 km. de Burzéa.

Crexenzán (de ro latín “Crescencius”, u bien de “credentius”:creyén) ye a 4 kms. de Balbastro y a 479 mts. d´altaria. Tien 12O abitadors, alto u bacho. Debantau en planera, ye remarcable ra ilesia parroquial de zagueras de ro sieglo XVI.

A os de Crexenzán les izen “os de ra corte” y “pinzanos”, y bel par de ditos:

“Cregenzán en un altero,
Costeán en una valle
y los rabosos de Guardia
sólo tienen una calle”.
“En Coscojuela, albaricos
pinzanos en Cregenzán,
los tinacos en Enate,
los burros en Costeán”.

Dend´aquí fan ya d´un tirón os 4 kms. qu´en quedan dica Balbastro.

Anuncios