3. Ibons de L’ Alarri

Güe, 24 de Chulio de 1.984, se debantan muito discansatos pero lis aguarda un escamallo d´es grans; desayunan e replegan la tienda de cambaña.

CURSA TA´S IBONS DE L´ALARRI-L´AMUNIA .
PARTIDER: Plans de L´Alarri (1.58O mts. d´altaria)
DESTÍN: Ibons de L´Alarri-L´Amunia (2.53O mts. d´altaria)
DURATA: 4 oras, u más
DIFICULTÁ: meyana
Prenendo un sendere enta par dreita per enmeyo d´es paixenters dica la fin de lo Ziércol de L´Alarri, e lo suyo polito Salto d´augua, lo caminet contina con firme panta enta lo norte dica la canal de Lo Tormacal. S´arriba ta lo Barranco de la Fuen Santa enta l´este per la marguin dreta e puyando més e més entre patrals, dica arribar n´es Ibons de L´Alarri-L´Amunia. Ta l´Ibón Alto se i puya per entremeyas de pennas e tascals, dimpués d´abere arredoliato l´Ibón Baixo.

Es Tocayez, muito contentez, pretan a marchar per lo caminet que s´adreza enta´l fundo de lo ziércol; astí empezipeya l´escamallo de la luenga puyata enta´s ibons, a cada trango més e més feixuta, arribando ta la fuga de la permenanza cuan Migalánchel Martín fa lo planto, con mareyos grans e güellos enluzernatos e boirosos. Acatan a´l talle que se trata de lo “mal d´altaria” e discansan güena ratera, dica que le´n ba pasando la eslanguita. Con tot e con ixo, e t´aprebenire, Migalánchel Pérez portiará la tienda de cambaña enno güembro tota la puyata, per més que a Migalánchel Martín no li fa mica goyo que l´amigo tienga d´ir cargato de contino.

M. Mart�n en el Ibón bajo helado de La Larri. M. Mart�n enno chelato Ibón Baixo de L´Alarri-L´Amunia.

Con mutas aturadetas per tot lo camín pa discansar, minchar e ixulufrar lo paisache, arriban a la fin pro escamallatos ta´s Ibons de L´Alarri-L’Amunia e se i foten firme percuchita en biyer-los chelatos cuasi de tot. Bi son arredoliatos de lo ziércol glaziar de L´Amunia, coronato per las zemas Penna Blanca (2.9O6 mts.), Rubinnera (3.OO5 mts.) e L´Amunia Gran (3.134 mts.)

M. Mart�n abrigadico en el Ibón alto de La Larri, al fondo Pico La Munia (L’Almunia Gran). M. Mart�n, una miqueta tapato, en l´Ibón Alto de L´Alarri-L´Amunia; enta´l fundo la tuca de L´Amunia Gran (3.134 mts.)

A l´Ibón Alto de L´Alarri-L´Amunia s´enziertan per suspresa con la parella que charroren la nuet d´antis, e continan estorlicando e fendo güena pacha con ers altra meya oreta; lis cuentan qu´ista nuet amallatarán astí, n´es ibons, e maitín bien de maitins puyarán ta L´Amunia Gran. Se´n dispiden d´ers, pos es Zerrigüeltaires, dimpués d´afotiar-se-ie, ban a continar la suya escorsa baixando enta la bal de Chisagüés t´amallatare muito més abaixo. Lo Tocayo M. Martín ya se´n ye refeto de la malotía e, d´agora enta debán, se turnarán es dos enna carga de la tienda. Baixan per la Collata de las Puertas e per un sendere -enta la dreita del Barranco del Clot d´Es Gabachos- a trabiés d´un baixán pelato de bechetazión, e dimpués d´espetequiare de firme per una callagüera arriban dica ta´l furcallo con la Sobrestiba, a cualques 2.OOO mts. d´altaria, on que chusto les bendrá t´amontare la tienda de cambaña e poder cubillar-se-ie de la plebita d´un rezio tronazil de luenga durata.

Anuncios