2. Plans de L’Alarri

Ban a empezipeyare la escorsa ta unnaltra bal.leta amanata, repingata 24O mts. més entalto d´an que i son, – en es Plans e arriu de L´Alarri – an que i amallatarán ixa nuet.

CURSA TA ES PLANS DE L´ALARRI.
PARTIDER: Ziércol de Pineta (1.248 mts. d’altaria)
DESTÍN: Es Plans de L´Alarri (1.560 mts. d’altaria)
DURATA: una ora e cuarto
DIFICULTÁ: chiqueta
Se sale dende la zaga de l´Armita de la Birchen de Pineta. Lo sendere dentra a trabiés d´un repolindato fabar, conoixito como Selba Pochas. Camín ixamplato e bien siñalato dica que s´arriba ta una pineta. Astí lo camín ye més amansito dica que recute enna pista forestal de L´Alarri. Se contina per la pista puyando güena panta e, dimpués d´arrienda marradas e zerrigüeltas, s´arriba dica ta´s Plans de L´Alarri.
M. Mart�n en buena postura, al fondo cascadas de Pineta. M. Mart�n bien plantato; enta lo fundo, es Saltos u Churros de Marmurés.

Lo camín naix dezaga de l´Armita de la Nuestra Siñora de Pineta. La Birchen de Pineta ye benerata dende´s tiempos antigos; ye un culto precristián e, seguntes la leyenda, ye apareixita ta un pastore enna cocoroza d´un pin. Més que més ye onrata lo 12 d´Otubre e -a´l talle- dica fa no guaire se i pelegrinaba dende Bielsa espetequiando mientres las 3 oras que duraba lo promenache.

Bi ha una conoixita canta popular referén a la Birchen de Pineta:

“La Virgen de Pineta, tan alta y sola
entre peñas y foces como pastora.
La Virgen de Pineta tiene una huerta
toda llena de flores hasta la puerta”.

Empezipeyan la escorsa a´l canto una fuen d´augua fresquiza e sapia muto güena. Lo sendere dentra per la Selba Pochas fendo-ie milenta marradetas e debenindo més e més costeruto; bien se les bale de l´agundán e fresqueta güempra mosquera que i fan es abez, orébels, buixos e faus. En zagueras, dimpués d´ora e meya de paso e en momentos d´arribare, lo sender s´amansix pro.

Llanos de La Larri. Es Plans de L´Alarri.

Es Plans de L´Alarri (de lo bascón “LARREA”: prato) atrazeyan una bal plana, ampla e funda, con percuchituers patrals d´una berdore brilán e un arrigatuer d´augua cristalina promanán de lo Barranco d´es Ibons de L´Alarri-L´Amunia. Lis pareix un puesto marbielloso: per un costato lo carapuerto de la sarra de Las Zucas, Las Parez de Pineta -u de la Man Pazina- e Las Puntas de Treserols; e ta lo costato d´escuentra -t´an que s´adrezarán maitín- Es Saltos u Churros de L´Alarri, Las Puntas de Lo Tromacal, La Meseta, La Pala e Puntas Blancas -Alta e Baixa- que fan güega con la Franzia. Astí n´Es Plans deziden de plantar la tienda de cambaña; en istas, e ya cuasi a l´escurezito, escutan un son de motor promanán de lo ziel e ixulufran sosprenditos un alicoter bolando enta par de Las Parez de Pineta. (Dica 2 diyas dimpués no saprán que bi eba una rechira de cualques nabesans que i yeran quedatos enfeixanatos en bel.la garrotera de las fendriechas de Las Parez, no guaire leixos de la Collata d´Añisclo. Dimpués de firme rechirata, diz que a la fin es troboren).

M. Mart�n de pie, al fondo Glaciar de Monte Perdido desde el camino a los Ibons de La Larri. M. Mart�n dreto; enta´l fundo lo Chelegar Gran de Treserols- u Glaziar de Mon Perdito- dende´l cam�n ta´s ibons de L´Alarri-L´Amunia.

Dimpués de zenare, entre qu´atisban lo limpismo ziel rebutito d´estrelas, ixulufran enta par de lo Ziércol e Salto de L´Alarri una luzeta e, per tal que no´n tienen encá mica de soñera, se´n ban amanando per curiosidá enta ixa luminaria e, dimpués de 1 kmt. de gambiata, paran cuenta que ye una foquera feta a´l canto d´una tienda de cambaña. Se´n i aplegan ta saludare a las 2 presonas que i son chunto lo fueco, qu´en primeras pareixen esfuriatos de biyer-les i arribar, pero cuan compreban que las intinzions d´es Zerrigüeltaires son ” d´esplorazión de lo esconoixito “, alabez se´n susiegan e i fan güena parolata con ers. Er ye de Madril e era d´Asturies e fan una parella bien agradable. Se´n dispiden a´l ratet es Tocayos, e ritornan ta la suya tienda fendo-se-ne bien goyosos de poder adormire n´un parache tan polito.

Anuncios