7. Biescas

Plegan en Biescas ya cuasi de nueys sin tener mica esclatero cómo ban a adormir. Remeran que astí bibe un siñor, un tal Maisimo Palazios que lis suena de pertenexer a l´asoziazión “Chen”, pionera en fer cursez d´aragonés. Dimpués de güena ratera prebando de trobar-li ta preguntar-li por un puasto calián t´adormir y apercatando-sen de ra fridor que fa por as carreras, rechiran alox en bella casa. Preguntando, lis nimbían ta una bizina qu´en loga de cambras.

Por pocos diners ban a amallatar en una cambra con dos leitos, caliens y comodos. Dinantis de i chitar-sen, se duchan, dixan as muchilas y jopan ta un bar a zenar.

3-O4-1983. De maitíns se debantan pro tardi y discansatos, con a sensazión de que ya lis ne caleba; lebaban tres diyas petenando y dos nueys adormindo malamén.

Biescas ye a segunda billa de ro Sarrablo dimpués de Samianigo y capital d´a zona conoxita como Tiarra Biescas. Ye plantificata en os dos costatos de ro Galligo atraziata en 3 bicos, os de ra marguin cucha, San Salbador Aldo y Baxo y en a dreita, San Pedro. En o cabaldo de ros bicos se i troban as ilesias; a de San Salbador con auside romanico de ro sieglo XII.

Sobrexe como arquiteutura tradizional más importán, o casal-castiello de ros Azín, de cuatro sulers, conoxito popularmén como “A Torraza”, de ro sieglo XVI. Ne b´ha d´atras contrimuastras intresans con finestrals, portalatas, pozaleras de balcón, fronteras y chamineras trongoconicas en casas como Pepe Estaún, Pedro Paula, Sebastián u Francho Sanz.

Vista de Biescas; escondido Migalánchel Pérez. Ambiesta de Biescas, M.A.P. bi ye á amagatons

A ros de Biescas lis izen “pelaires”, “perifollers” y “güeis de pata blanca”. Cualcosa bi´n aberba, pos no yeran guaire baluratos por os foranos.

“Pelaire que pela pela
os fillos en la cazuela
la madre se muere de hambre
anda a la mierda, pelaire.”
“No compres caballo viejo,
ni te cases en Canfranc,
ni trates con los de Biescas,
mira que te joderán.”
“Si bas ta Biescas,
chugarás y aprenderás
pero nunca ganarás.”

Atros ditos diferiéns y dos bandos de ro Conzello:

“Cuatro cosas tiene Biescas
que no las tiene Madrid:
Fajaleta y Zarciñena
Casa Miranda y Larzín.”
“La pelairina de Biescas
se ha dejau de dezir
que con manzanas pudridas
nos haría fuir”.
“De parte del señor alcalde
de esta villa de Biescas
se hace saber:
que todo el que tienga
armas cortantes y punchantes
que baiga ta o Pinarillo
qu’en hay un bicho que fa:
cucú, cu, cu …”
“De orden del siñor Alcalde:
Queda prohibido jugar a la pilota
en las paredes del templo,
porque antiayer a pilotazos
saqueron a San Pablo de su puesto,
y pagará la multa según qui siga”.

Pillan l´autobús enta Samianigo, ta bella miqueta dimpués prener o rastraz canfranero enfilatos ta Zirigoza.

Quiaren rematar con un apunde: a par de ro Sarrablo qu´han conoxito -a más poblata- no son solo que as ilesias chiquetas, pobrichonas, diferiens y esconoxitas dica no fa guaire; son tamián os suyos paisaches, as casas suyas y, más que más, as suyas chens y a despeito d´iste dito:

“Gente de Serrablo gente del diablo”, u”Serrablo, tierra del diablo”; ta Migalánchel Pérez y Migalánchel Martín son estatos istos diyas tota una escubillanza, espezialmén a grandiza faina desembolicata por l´asoziazión cultural “Amigos de Serrablo”.

Anuncios