1. Torla-San Nicolás de Buxargualo

TORLA, BUXARGUALO, GAVARNIE, PIERREFITTE Y BAL DE TENA DE RO 28 DE CHULIO TA RO 3 D´AGOSTO DE 1.983

A intinzión d´iste biache por os Pirinés Zentrals ye conoxer una d´as rotas qu´emplegaban os ganaders de Torla ta marchar ta ro lucar franchut de Gavarnie (“Gabarnía” en aragonés y gascón, bocable prelatín que sinificarba puasto agundán en “gabas” u arrius de montaña) por o puarto de Buxargualo, camín de pasata, asinasmesmo, de biachers, pelegrins y paqueters de ra Franzia; dimpuesas se prebará de conoxer Pandicosa y a suya fabla, u ro que plegue a esdebenir.

28-O7-1983: Surten de Zirigoza en o rastraz canfranero dica Samianigo y dimpués prenen l´auto-linia que lis dixa en Torla. Cuan i plegan ro primer que fan ye chindar a ro cando d´una fuan en a que uns catalans ya i son chindando.

Migalánchel Martín enguera un algagüet que s´ha mergato en Zirigoza, con os catalans. Istos se claman Miquel y Joan y son uns mondañers aimables y rallans que i son de bacanzias por os Pirinés aragoneses. Os tocayos fablan n´aragonés y o catalans en catalán ( a begatas no se´n replecan porgue fablan a tot estruzio ). Toz lo pasan de pistón, esmelicando-se-ne sin d´aturar. Joan s´agana a candar una canda roñadera en catalán de Lluis Llach tetulata “La gallina”.

Migalánchel Pérez y Migalánchel Martín yeran de tan guan imblaz con os catalans que no se´n yeran presguardatos de qu´iban a ser as zingo d´a tardi, asinas que con as muchilas rebutitas a caramuallo de minchars y ros zacutos d´adormir deziden de pretar a petenar enda Gabarnía por a carretera que ba ta ro Pargue nazional d´Ordesa.

Vista de Torla. Ambiesta de Torla

CURSA TA GABARNÍA ( GASCUÑA, FRANZIA )

BASE: Torla (1.O33 mts. d´aldaria)

DESTÍN: Gabarnía (1.374 mts. d´aldaria)

DURATA: de 1O ta 12 oras

DIFICULTÁ: meya

Se surde dende Torla por carretera engudronata durán 3´5 kms., endreza ta ro Pargue nazional d´Ordesa, en o Puan de ros Nabarros (1.O64 mts. d´aldaria) se i prene ra pista piatrusa que puya amoniquet durán 6 kms. remuntando l´arriu Ara, endreza ta ro Mesón de San Nicolás de Buxargualo (1.338 mts. d´aldaria).

Dend´astí se cruzia un puan de piatra meyebal sopre l´arriu Ara y se condina por un sender que puya en primeras endre arbols y dimbuesas por un paxender pasando por debaxo d´una linia d´alda tensión.

Camín escamallán con fuarde costerota dica ro puardo de Buxargualo u Gabarnía (2.27O mts. d´aldaria); astí naxe una carretera engudronata que baxa durán 11 kms. dica plegar en o lucar de Gabarnía, a 1.375 mts. d´aldaria.

Os Tocayos, dimbués d´una ora de petenata, plegan en o Puan Biallo de ros Nabarros, an que s´esbarran enda ra zurda por una pista que dendra en Buxargualo – nome referito a l´agundanzia de buxo – que abraca tota ra cursa superior de ra cuanga de l´ arriu Ara. N´iste inde engara no s´han presguardato de ro tardi que ye ni de ra longaria que lis desepara de ro suyo destín.

O camín ye una micota costeruto y piatruso, redoliato de pombuta bexetazión con abez, faus, nasarro, buxo y atros maticals y ba en paralel ta ro bullatico, caudaloso y lembedo arriu Ara.

Pasan por o Puan Nuabo de Sanda Ilena y fren ta un cubilar de pescataires ye plandificato tamián un cámbin; 3 kms. dimbués plegan ta un patral planet e tranguilot an que se i troba ro Mesón de San Nicolás de Buxargualo, u casa Biu; estando iste casal en o siaglo XII un espital de pelegrins.

Puente medieval de Bujaruelo sobre el r�o Ara. Puen meyebal de Buxargualo supre l’arriu Ara

Una micachona dinandis de cruziar o puan de piatra de Buxargualo de ro siaglo XII, baxo ro que pasan as auguas d´o rezián naxito Ara, be aparix prauticamén enrunata ra famosa armita de San Nicolás; estió ro primer temblo que trobaban os pelegrins dimbués d´esnabesar dende ra Franzia por o puardo de Gabarnía, u Buxargualo.

Restos de la Ermita románica de San Nicolás de Bujaruelo.Repuis de l’armita romanica de San Nicolás de Buxargualo

Anuncios