14. Balurazión

A ro canto d´os más marabiellosos paisaches, han puisto comprebar que bi ha lucars entegros albandonatos, guarz malmesos, casas e ilesias enrunatas. Han alufrato añatas y añatas de triballo umán y tota una cultura en periglo de disparixión. Han nabesato por senders que d´antis chunioron lucars y güe i son enchargatos de tot.

Han alufrato escualas albandonatas y lucars sin de ninons, sin d´asperanza, sin d´olusión. Han alberato a total mancanza de trasportes publicos y lo lexizos que se troban de cualsiquier espital.

Muitos son os fautors qu´influyoron en a espoblazión. As casas pasoron d´un unico ereu ta unatro durán muitas chenerazions; os tions i remaniban como aduya de poco gasto y as chirmanas se´n yiban de chobenas t´atras casas u a serbir ta ras zidaz, do cuasi totas se i maridaban. Se bibiba d´escusar y no gastar. De ros años 6O enta debán, con a endustrializazión y as posibilidaz que ufriba l´atrautibo d´a zidá, os tions podeban yir a triballar ta ras zidaz á truca d´o chornal. Como lis yiba bian, muitos ya no´n tornoron. A economía de ros lucars de l´Aldo Aragón s´enfeblió asabelo y con ixo, casas y lucars entegros s´abuedoron.

A pulitica de costruzión de grans entibos y replandatas forestals ha feito espoblar-se-ne redolatas y bals entegras y a mancanza de comunicazions tamián ha causato que muitos d´istos lucars, y mesmo bals, se´n seigan itos enta baxo sin de remeyo dengún.

Han bibito una Gambada sinxuplidable, un conoximián umán en o que lo güen implaz d´as chens se´n ye achundato con os más sincreyibles paisaches. S´ha contrimuestrato n´a prautica que ta fer bella sobatida coleutiba no bi ha cosa millor que atrapaziar-la con delera, magueras que pueda paixer esfargallata.

Quiaren que a suya reyalizazión aduye a establir una colaborazión á ixena entre zidadans y/u ecoloxistas por un costau y nabesaires por atro en esfensa de ros Pirinés y as suyas chens. Han comprebato que ye posible un torismo diferién inserito en o paisache y n´as suyas chens rispetuosas con l´ecosistema. Mantener y esfender – meyán l´amostranza y en a mida de ro posible – un meyo natural de montaña que l´ome pirinengo ha contrebuyito a creyar autuando con modos sopre a Natura.

A esfensa d´a sapienzia rural y popular que portia tota cultura umana ye estata amarguinata dica agora. Han alufrato quiénto a luenga propia tradizional ye en l´alazet d´ixa cultura y a situgazión autual con as barians suyas y a de ros aragoneses que parlan lo catalá amuestra esclaters siñals d´un grau chusdesembolique cultural.

Estando más angluziosos, calerba mesmo refirmar tota mena d´autibidaz umanas como contrimuestras que son d´a cultura local; dende cantas, falordias, bailotes, manifestazions festibas y relichiosas, dica buxadas como labar a ropa, cozinar, fer y apañar trastes, ezt. u rilazionatas con o meyo natural, como fainas d´o pastor u lo triballo d´as tiarras.

En Aragonés,Camins d’a Gambada Pirinenca

A comisión enfiladera d´a Gambada Pirinenca quiare esplanicar – y Migalánchel Pérez y Migalánchel Martín se´n ie aplegan – qu´ista abentura no fuese estata posible sin a entrebenzión de muita chen; agradixen l´aduya alportata por muitas presonas y entidaz por as esfugatas y refirmes complegatos, mentando-ne más que más a: Luis Pallaruelo, de Puyarruego; Jesús Agraz, d´A Enfortunata; Rafael Mur, de Serbeto; o Churato Gran d´A Enfortunata; lugar de Sín; equipo de zumbol “Unión Deportiva del Alto Cinca”; l´alcalde de Plan; Federico Fillat, incheniero agronomo chefe de redolada d´I.C.O.N.A. en Benás; Fonchanina; Castanesa; Bonansa y o suyo alcalde, Marcelino Iglesias; Sisco Pascual y demás chen de Cornudella de Baliera.

Anuncios