1. O Prenzipio

GAMBADA PIRINENCA DENDE TORLA TA CORNUDELLA DE BALIERA(ARÉN) DE LO 16 TA LO 31 DE CHULIO DE 1.982

Migalánchel Pérez Gil y Migalánchel Martín Pardos deseyan dar razón d´as trazas en que se conoxioron y quiénto escaizió ixa primer espedenzia de petenar y entender os Pirinés y lurs chens, combibindo-ie 15 diyas con atros compañers.

Enziertan a trobar-sen por primer begata en os empezallos de l´año 1.982, en a Casa d´a Chobenalla d´o Partito Sozialista de ra carrera Martín Cortés de Zirigoza. Migalánchel Pérez de conchunta con un gran amiu d´er, Carlos Uchenio Béjar Garín, y Migalánchel Martín acuden cadagún por o suyo costau ta un curso d´aragonés atrapaziato por a ” Colla Chobenil d´a Fabla “. Tasamén i charrutían entre ers, pero no dixan de barruntar senglas deleras parellanas por os temas d´Aragón.

Bels meses dimpués , en Chunio, y sin d´aber continato en contauto, saprán por os papels que se ba a fer “una marcha por el Pirineo” durán a segunda quinzena de Chulio, aprestata por bellas asoziazions montañeras , culturals y ecoloxistas, con a colaborazión de : “Asociación Naturalista Aragonesa”, “Asociación de licenciados en Biológicas”,”Consejo de Jóvenes de Zaragoza”, “El Ribagorzano”, “Coordinadora Provincial de Cultura de Huesca”, “Club Pirineos”, “Asamblea Ecologista”, “Campamento Virgen Blanca”, “Guías de España”, “Scouts”, “Sección de Montaña Ixarso”, “Centro de Biología Experimental de Jaca” y “Montañeros de Aragón” y refirmata por a Delegazión de Chobentú d´o Conzello de Zirigoza.

A inscrizión se fa , mesmamén, en a debandita Delegazión, en a carrera Boterón y astí s´apuntan os dos tocayos, cadagún por o suyo costau. En os primers diyas de Chulio toz os partizipans s´achuntan en a siede d´A.N.S.A.R. d´a carrera Colón, en do se i retrobarán os dos Migalánchels. Victor Viñuales, miembro d´a comisión organizadera, esplicotia puntosamén l´oxeto, l´itinerario, autibidaz, albertenzias sanitarias y consellos ta ra gambada. O lema d´ista ye: “Conoxer o Pirineo ta esfender-lo “.

Pegatina oficial de la Marcha Pirenaica. Apegallo ofizial d’a Gambada Pirenenca

Astí, n´istos requilorios d´a gambada pirinenca, do tornarán a enzertar-sen os tocayos, ye l´enchegue y empezipie de lur fruitifera e luanga amistanza, alazetata en o común intrés por os Pirinés, lucars, paisaches, fabla y cultura d´a tiarra nuastra.

As fins d´a organizazión de ro proyeuto son que os componens d´a Gambada, de diferiens edaz, napas sozials e ideyoloxicas, colaboren en ista buxada coleutiba y conoxcan a fundo ros Pirinés y lurs chens.

Se prebará de conoxer o territorio, entendendo que ye posible aprender a espleitar a Natura sin destruyir-la y, más que más, rebindicar a esfensa de l´ome pirinengo, os suyos posibles tradizionals, cultura, fabla, ezetra, por meyo de petenatas, charradas-rufierta, peliclas etnograficas, partito de zumbol, collas folcloricas y lifaras borineras. Que a chen de bara alta pare más cuenta en a ganadería y agricultura de montaña. Que se i potenzie lo torismo umanizato, indizcando as autibidaz economicas de ros abitadors, pribando a malmetedura d´as nuastras mondañas. Ye menister que se consulte e informe a ros intresatos u afeutatos debán de cualsiquier sobatida trestucadera en os Pirinés (costruzión d´entibos). Muito dialogo y comunicazión entre zidadans e lucarins (cambo-zidá ; plana-mondaña), entre as diferiens culturas.

Migalánchel Martín ha tenito espedenzia d´a montaña dende chobeñón, cuan por meyo de ros “scouts” eba puisto nabesar cualcosa por os Pirinés. Por cuantra, Migalánchel Pérez no eba petenato enxamás por a montaña y, mesmo, a “chiri” -un de ros miembros d´a Gambada- li mercó bels diyas antis de l´empieze una muchila de segunda man por 5OO pezetas, pos él enxamás no´n eba tenito.

Anuncios