8. Bal d’Ordesa
26-VII-1.985. Se´n debandan pro bian adormitos e discansatos, desayunan y amoniquet se´n bi aprestan ta ra gran andata.
Dixan l´auto en o cámbin y petenan por a carretera, endrezatos enda ro patral d´Ordesa, durán 7 kms. Guana onra lis ne fa como calendamián…. en l´asperanza de qu´istas dos oretas de “presfuarzo” no se´n faigan de sendir masiato miandres a escorsa por Ordesa.
CURSA ZERGULAR POR O PARGUE NAZIONAL D´ORDESA
BASE Y DESTÍN: Patral d´Ordesa (1.31O mts.)- Ziárgol de Suaso (1.8OO mts.)- Coda Caballo (1.85O mts.)- Faixa Pelay- Miralguán de Calzilarruego (1.95O mts.)- Sender de ros Cazataires- Patral d´Ordesa.
DURATA: 6 u 7 oras.
DIFICULTÁ: meyana.
Se pilla ro camín de Suaso que trabiasa selbas de zirgundifuellos y abetes, nabesando por o fundo de ra cuanga de l´Arazas, u Bal d´Ordesa, y promenando chundo ros saldos d´as Arripas, de ro Estreito y de ra Cuaba. Pasatos ros paraxes de ra Cuaba y Frachinal remata ro fabar y amanixen os paixenders con pinetas de nasarro. Por as Gradas de Suaso l´arriu Arazas se´n escualga i fraucando numbrosos escalerons. A ra fin, o camín ba candiplano por os tascals de ro Ziárgol -u Arracón- de Suaso, dend´an que se b´alifra una guana ambiasta de ras Tres Serols. D´istas trazas, en esnabesar por una planera an que l´arriu baixa asusegato, lo camín arriba ta ro saldieto de ra Coda Caballo, rematatura de ro Ziárgol de Suaso.
Se condina por un sender siñalato por un endicatuero, que ba arrecorrindo ra Faixa Pelay -estreito replanieto de yarba situgato a meya aldura de ro cañón- endrezato enda ro guaste. O senderieto abanza candiplano recandillando cualgues bolans en un trazato pinganetiato en os zillos meridionals de ra bal, chusto por aldo de ras silbiachas de ro Pozino d´Arazas. Durán ista cursa se i goya d´una ambliza ambiasta panoramica de ra bal, dica ra plegata en o miralguán de Calzilarruego.
Dend´aquí, a trabiás de ro Sender d´os Cazataires, en periglosa y escamallán baixata endre pins y dimbuás faus, se i plega ta ra planiata poblata por triámols, salzeras, faus, pins, abez y abetochas. Cal esnabesar por bels patros y cruziar l´Arazas por una guallarda pasatuara, rematando en o Patral d´Ordesa.
