10. Collau de Chistau-Ball d’Estós-Benás

26-O7-1.982. CURSAS: A) Virgen Blanca (1.55O mts.)- Collau de Chistau (2.6OO mts.)- Benás (1.138 mts.) B) Virgen Blanca (1.15O mts.)- Punta Lardana ( Posets ) (3.375 mts.)- Grist (1.118 mts.)- Benás (1.118 mts.).

Es más fortals salen de nuet ta puyare la Punta Lardana (“Llardana” u “Posets” a la Ball de Benás). Es de demás – tocayos incluyius – pe´l Collau de Chistau y la Ball d´Estós. Atro escamallaz que Migalánchel Pérez entre el de güe y el rezién partiu de fúrbol, el ba pagare n´es diyas siguiens. Beluns esnabesan pe´l puesto més altero de tota la Gambada; es menos fuertudos per es 2.6OO mts. del Collau de Chistau.

Ixulufran nieu y petenan per ella baixán enta Estós. !Qué ball més marabillosa con bacas y caballs, y qué aigua més freda leba l’arriu an se fican despullats!; lis cuesta prou arribá ta Benás. Duermen a la escuela.

Seguntes les notes de Migalánchel Martín, : “…. uey diya 28 de chulio (se trafuca dan el 27) semos escansando a Benás, ayer rematamos a chornada muito cansos, pus fuemos dende o campamento Birxen Blanga (n´o fundo d´a bal de Chistáu) dica Benás. Ye cuasi con toda seguranza a gambadeta más polida de todas, pus nabesemos a bal d´Estós ta enfilar n´a bal de Benás. Yera una etapa luenga, m´en metié tres pars de calzetins y enduré pro bien a caminata; a bal d´Estós ye una d´as más polidas d´o Pirineo, en meyo l´estíu bi´n-ha de nieu en as tucas más altas d´a bal, que no están solamén en o fundo, sino tamién por os costáus d´a bal. De risultas d´isto l´augua surte por cualsiquier puesto y toda la bal ye emplida d´una bexetazión qu´enarca a cualsiquier presona…. lo rio Estós ye enluzernador, fa una güeltas, unos mayencos(sic)y unas clamórs que te dixan fundamén enarcáu y caducando que cal esfender tanta polideza y tanta naturaleza birxen…… a begatas l´augua se fica por debaxo d´a tierra ta surtir dimpués con forteza y corambre renobadas(sic). Se fan espelungas , pasiellos, pozetas y atras marabillas d´a naturaleza….”.

27-O7-1.982. Güe discanso y tot el dia a Benás. Ta de tardis proyesión d´una pelicula sobre els glasiars pirinencs y altra sobre el romanico pirinenco. Ta de nits zenan en a terrasa d’o ristorán Ball de Benás e dempús berbena dan el grupo “Brasilia”. Seguntes les notes de Migalánchel Martín: “…. Adormiemos n´as escuelas por dos nueys, anque n´a segunda risultó pro difizil dica ras cuatro y meya d´a maitinada, primero por o baile (dica ras tres y a lo costáu mesmo d´as escuelas) y dimpués por as collas de chen que canturriaban y esberrecaban por puestos amanáus a ras escuelas….”.

A ros de Benás se les dize “llaminés” y “tripas de queses”, y ditos molts majizos:

“Chen de Benás
chen de Barrabás,
patas, gola y nada más”.

“De Benás, benasqueso
real de a cuetre,
tripes de diaplle,
Benasqueso, tripa de queso”.

“Los de Benás
llevan la coda arrastro
y comen rebasto”.

“Mosetetas de Benás,
cascarrietas de Ancils”.

“A Benás tots sáben agón les muérde l’abarquéra”.

“A Benás, yey dos cáses de tracás,
tracás del cábo la bíla y tracás
del suél de la bíla”.